Zvak. 19 - NOVO TESTAMENTO EM NDAU

Pauri mu Efesu

¹ Kwakaitika apo Aporo uri mu Korinte, Pauri ayinga apeja kuparura nyika jakakwira, wakaguma Efesu, akavona vajiji vakatikuti;

² naye wakati kwavari: “Mwakaashira Mweya Wakachena here apo pomwakatenda?” Navo vakati kwaari: “Haiwa, atizivi no kutongozwa kuti uripo Mweya Wakachena.”

³ Naye wakati: “Mwakabhapatiswa ngo rubhapatiso rwenyi?” Navo vakati: “Ngo rubhapatiso rwa Johani.”

⁴ Pauri wakati: “Johani wakabhapatisa ngo rubhapatiso rwo kutenderuka, echinanga kuna vandhu kuti vatende uwo waizoviya sure kwake, kunangira Jesu.”

⁵ Naapo vazwa izvi, vakabhapatiswa ngo zina ra Mambo Jesu.

⁶ Naapo Pauri adira nyara jake panyezuru pavo; Mweya Wakachena wakaviya panyezuru pavo, navo vakavereketa ngo ndimi, vakaprofeta.

⁷ Ndizvo vese vayiva vanonga vanarume vari gumi na vaviri.

⁸ Naye wakanghwina mu nyumba yo kudira, wakavereketa ngo kushinga ngo mukuvo wo mweji mitatu, echiphikisana navo no kuvaonga ngo ndava yo zvo Umambo hwa Mwari.

⁹ Asi apo vamweni vakaomesa mwoyo, no kuramba kutenda, vechivereketa zvakashata ngeiyo Njira, pamberi po vandhu vazhinji, wakabva kwavari, akaparajanisa vajiji, echipangana zuva ngo zuva muchikora cha Tiranu.

¹⁰ No izvi zvakavangirira kuitwa mukuvo wo makore maviri; kwokuti avo vese vayigara mu Aziya vakazwa izwi ra Mambo, vese vaJudha no vagiriki.

¹¹ Na Mwari wakayita mishamiso yo simba ngo nyara ja Pauri.

¹² Kwokuti kubva kumuviri wake kwakatohwa madhuku nokuti machira, kuenda nazvo kuno avo vaihwara, no ndhenda javayiva najo jakabva kwavari, no mweya yakashata yakabuda kwavari.

¹³ Asi vamweni vakatikuti vo vaJudha vayiva vapepesheki, vari n'anga vakaeja kudanija panyezuru peavo vayiva no mweya yakashata zina ra Mambo Jesu, vechiti: “Ndinokupikisa ndi Jesu uwo unochumaihwa ndi Pauri.”

¹⁴ Vayiva vana vanomwe vo umwe waizwi ndi Sikevha, mujudha, uri mupristi mukuru, avo vakayita izvi.

¹⁵ No mweya wakashata wakapingura, ukati kwavari: “Jesu ndinomuziva, na Pauri ndinomuziva; asi imwimwi muri yani?”

¹⁶ No mundhu wayiva no mweya wakashata wakavanyandukira, akavanyisa vese, avakurira, kwokuti vakatiza kubva munyumbemwo vari mutitinini, vakaremajwa.

¹⁷ No izvi zvakazivikanwa kuna vese vaJudha no vagiriki vayigara mu Efesu, no kutya kwakavagumira vese. No zina ra Mambo Jesu rakakuriswa.

¹⁸ Vazhinji vavo vakagonda, vakaviya vechitenda, no kupangijira zviito zvavo.

¹⁹ No vazhinji veavo vaishandisa zvo masaramuso, vakazisa mabhuku avo pamwepo, vakaapisa mukuvona kwavo vese, navo vakaverenga mutengo wao, vakavona kuti wayiva makumi mashanu o zviuru (50.000) o zviguhwa zvo sirivha.

²⁰ Ngo njira iyi izwi ra Mambo rakakura ngo simba, rakanyisa.

Bope mu Efesu

²¹ Nazvino ngosure kwokupera kwo izvi, Pauri wakaemesa mu mweya mwake kuti ngosure kwokuti afamba Makedhoniya, no mu Akaya, aende Jerusarema, echiti: Ngosure kwokuti ndagumeyo, kunosisira kuti ndivone Roma naro.

²² Naapo ayinga atuma vaviri veavo vaimudetsera kuti vaende Makedhoniya, ndi Timoti na Erastu, iye ambhwine wakagara mukuvo mu Aziya.

²³ Ngo uwo mukuvo kwakamuswa bope guru ngo ndava yo iyo Njira.

²⁴ Ngokuti mundhu wakatikuti waizwi Dhemetriyo, mupfuri wo sirivha, waipfura miezaniso yo sirivha ya Dhiana, wakapfumisa vapfuri ngo mare yakawanda.

²⁵ Avo, iye wakavaunganija pamwepo no vashandi vo mushando umwewo, akati: Vanarume, munoziva kuti ngo uwu mushando tinopfumiswa ndiwo.

²⁶ Nemwi munovona no kuziva kuti uwu Pauri wakaonga no kutenderuja vandhu vazhinji, haiwa mu Efesu mwega, asi mu nyika yese yo Aziya, echiti, kuti akuna zvimwari zvakaitwa ngo nyara.

²⁷ No ngozi iripo andiopi yega yokuti uwu mushando wedu ushoohwe; asi kuti themperi ro chimwari chikuru Dhiana riverengwe kuti arina shwiro, nokuti ukuru hwake huparajwe, uwo unodihwa ndivo vese mu Aziya no mu nyika jese.

²⁸ Apo vazwa izvi vakazara ngo ushungu, vakadanijira, vechiti: “Uri mukuru Dhiana wa vaEfesu.”

²⁹ No dhoropa rakazara ngo hohoho; navo vakagogoma ngo chisungo chimwe kunghwina mundau yo kutambira, vayinga vabata Gaiyo na Aristaku, vayiva vanarume vo Makedhoniya, avo vaiperekeja Pauri muhwendo hwake.

³⁰ Naapo Pauri echida kunghwina kuno vandhu avo, vajiji avazivi kumutendera.

³¹ No vamweni vakatikuti vo nduna jo Aziya vayiva shamwari jake, vakatuma kwaari, vakamupota kuti aregere kunghwina mundau yo kutambira.

³² Ndizvo vamweni vakadanijira chiro chimwe, no vamweni chimweni; no mbungano yakakangaijwa, uzhinji hwavo avazivi kuziva chovakaunganira.

³³ Navo vakabudisira mberi Arixandreu kubva pakati pochiunga, vaJudha vechimusukumijira mberi, na Arixandreu wakakopera ngo nyara, echida kujirwira kuno vandhu.

³⁴ Asi apo vaziva kuti uri mujudha, vese ngo izwi rimwe vakadanijira kwo mukuvo wayida kuyita nguva mbiri: “Uri mukuru ndi Dhiana wo vaEfesu.”

³⁵ Apo mutari wo dhoropa anyararisa chiunga, wakati: “Imwimwi vanarume vo Efesu, uri pari mundhu usikazivi kuti dhoropa ro Efesu riri mungwariri wo themperi ra Dhiana mukuru, no muezaniso wakawa kubva kuna Jupiteri?

³⁶ Ndizvo kwechivoneka kuti izvi azvingarambiki, kunodikana kuti munyarare, musikaiti chiro musati mwapinimija.

³⁷ Ngokuti imwimwi mwazisa pano ava vanarume, vasiri majongoni o mathemperi, nokuti vatuki vo chimwari chedu.

³⁸ Ndizvo kudari Dhemetriyo no vapfuri vanaye, kudari vane ndava kuno mundhu nokuti ngouri, aripo mazuva o kuvereketa ndava, aripo no masamukuru. Ngavamangarirane umwe no umweni.

³⁹ Asi kudari munopshaka ngo ndava yo chiro chimweni, chinozoguhwa ngo makota akaemeswa.

⁴⁰ Ngokuti ngo gwinyiso tine ngozi yo kuitihwa ndava, ngo ndava yo bope raitwa nyamasi, apana shwiro yotingapa kupembeja bope iri.”

⁴¹ Naapo ayinga avereketa kudaro, wakaparaja chiunga.