Zvak. 17 - NOVO TESTAMENTO EM NDAU

Kutambujika mu Tesaronika

¹ Zvino vaparura Amufipori na Aporoniya, vakaguma Tesaronika, apo payiva no nyumba yo kudira yo vaJudha.

² Na Pauri, kudari ngomuitiro wake, wakanghwina kwavari, na ngo masabatha matatu wakapangana navo ngo matahwa.

³ Echidurujira no kugwinyisisa kunanga kuti kwaisisira kuti Kristu atambujwe no kumukazve kwo vakafa, nokuti, Uwu Jesu wo ndinochumaira kwomuri, uri Kristu.

⁴ No vamweni vavo vakaongwa, vakaiyana na Pauri na Sirasi; zve, no mbungano huru yo vagiriki vaidira, no vazhinji vo majimayi aireremejeka.

⁵ Asi vaJudha, vayiva no ndurumwa, vakatora vandhu vakashata vari vapepesheki, navo vechiunganija mbungano, vakayita kuti dhoropa rive no hohoho; navo vakarwisa nyumba ya Jasoni, vakaeja kuvabudisa kuno vandhu.

⁶ Naapo vasikazivi kuvawana, vakakweva Jasoni no hama jakatikuti pamberi po vatongi vo dhoropa, vechidanijira, vechiti: “Ava vanoshaishira nyika, vatoguma pano.

⁷ Avo Jasoni wakavaashira, navo vese vanoyita zvinopesana no zviemeso zva Khesari, vechinanga kuti uripo mambo umweni ndi Jesu.”

⁸ No mbungano no vatongi vo dhoropa vakakaruka apo vazwa izvi.

⁹ Naapo vayinga vatora chibatiso kubva kuna Jasoni, nokune vamweni, vakavatendera kuti vaende.

Pauri na Sirasi mu Bhereya

¹⁰ Paripo vatendi vakatuma Pauri na Sirasi usiku kuti vaende Bhereya: Avo apo vagumeyo vakanghwina mu nyumba yo kudira yo vaJudha.

¹¹ Zvino ava vayinga vakapinda kururama kuno vo Tesaronika kwokuti vakaashira izwi ngo kutendera kwese kwo mupinimijo, vechipshakisisa matahwa mazuva ese kuvona kuti izvi zvakadaro here.

¹² Ndizvo vazhinji vakatenda, no majimaizve aireremejeka o vagiriki, no vanarume vazhinji.

¹³ Asi apo vaJudha vo Tesaronika vayinga vaziva kuti izwi ra Mwari rakateketeswa ndi Pauri mu Bhereya, vakagumapovo vechiveruja no kutambuja mbungano.

¹⁴ Paripo vatendi vakatumira Pauri kuti aende ku jombe: Asi Sirasi na Timoti vakavangirira kugara apo.

¹⁵ Asi avo vakaperekeja Pauri vakamugumisa Atena: Naapo vakapangwa kuti vadanije Sirasi na Timoti kuti vaviye kwaari ngokukasira, vakaenda.

Pauri mu Atena

¹⁶ Zvino Pauri achavagarira mu Atena, mweya wake wakatambujika zvikuru, echivona dhoropa rakazara ngo miezaniso yo kudira.

¹⁷ Ndizvo wakaphikisana no vaJudha naavo vaidira mu nyumba yo kudira, no mundau yo musika mazuva ese wakapangana naavo vakashongana naye apo.

¹⁸ No vamweni vakatikuti vo vaEpikurio no vaStoiko, vaida ungwaru, vakashongana naye. No vamweni vakati: “Uwu muvereketi wo zvisina shwiro unoti kudini?” Vamweni vakati: “Unonga muteketesi wo zvimwari zvo nyikanja, ngokuti iye wakachumaira kwavari ndi Jesu, no kumuka kwo vakafa.”

¹⁹ Navo vakamubata, vakamuzisa pamberi po Ariyopagu, vechiti: “Tingaziva here kuti uku kujijisa kupsha kunovereketwa ndiwe kunonangenyi?

²⁰ Ngokuti unozisa zviro zvisikazwiki kunjeve jedu: Ndizvo tinoda kuziva kuti izvi zvinoti kudini.”

²¹ Zvino vese vo Atena no vo nyikanja vayiva zvigarandimo apo avazivi kupejera mukuvo wavo kuzviro zvimweni, asi kwega kunanga nokuti, kuzwa chiro chipsha.

²² Na Pauri wakayima pakati po Ariyopagu, wakati: “Imwimwi vanarume vo Atena, ngo zviro zvese ndinovona kuti munonyanya kudira.

²³ Ngokuti ndichapinda, ndechiringira zvo munodira, ndavonazve altari rine aya matahwa: ‘KUNA MWARI USIKAZIVIKANWI,’ ndizvo uwo wo munodira musikamuzivi, uwu ndiye wo ndinoteketesa kwomuri.

²⁴ Mwari uwo wakarura nyika nazvo zvese zviri mukati mwayo, iye uri Mambo wo mu denga no wo nyika, aagari mu mathemperi akavakwa ngo nyara;

²⁵ zve aashandihwi ngo nyara jo vandhu, kudari ngo unotama chiro, kwechivoneka kuti iye unovapa vese kupona, no kufema, no zviro zvese;

²⁶ naye wakayita majinja ese o vandhu kubva kuna umwe, kuti vagare panyezuru po hope yo nyika, wakaemesera nguva javo no migano yo kugara kwavo.

²⁷ Kuti vapshake Mwari, kuti pamweni vambarambasire, vamuwane. Pikija asiri ndhambo akadi kubva pana umwe ngaumwe wedu;

²⁸ ngokuti kwaari tinopona, no kufamba, tino undhu hwedu, kudari ngo zvo vakavereketazve vamweni vakatikuti no vatari venyu vo nduyo: Ngokuti isisu tiri mibarihwana yake.

²⁹ Ndizvo tiri mibarihwana ya Mwari, akudikani kuti tipinimije kuti uMwari hunonga hwakadari ngomukore, nokuti sirivha, nokuti buwe rakachechwa ngo nghwazi no mazano o vandhu.

³⁰ Ngo mikuvo yo kusikaziva uku, Mwari aazivi kuringisisa; asi zvino unopangisisa vandhu kuti vese kundau jese, vatenderuke.

³¹ Kwechivoneka kuti wakaemesa zuva raanozotonga ndiro nyika ngo kururama ngo uwo mundhu waakagaja; uwo waakagwinyisa ku vandhu vese ngo kumumusa kwo vakafa.”

³² Asi vazwa ngo kumuka kwo vakafa, vamweni vakayita jee; asi vamweni vakati: “Tinozokuzwazve ngoiyi ndava.”

³³ Ngokudaro Pauri wakabuda kubva pakati pavo.

³⁴ Asi vandhu vamweni vakanamatira kwaari, vakatenda: Pakati pavozve Dhionusi muAriopagu, no mujimayi zina rake raizwi ndi Dhamarisi no vamweni navo.