Zvak. 15 - NOVO TESTAMENTO EM NDAU

Mushongano wo Jerusarema

¹ Vandhu vakatikuti vakabzuka vechibva Judhiya, vakajijisa vakoma, vechiti: “Ngo kunja kwokuti muchekwe, kudari ngo chirovejeso cha Mosi, amungaponeswi.”

² Naapo Pauri na Bharnabha vaitirana hasha no kubvunjisana navo, vakoma vakasana Pauri na Bharnabha, no vamweni vakatikuti kuti vakwire Jerusarema kuna vapostori no vakuru ngoiyi ndava.

³ Naava vechitumwa ngo chiara, vakafamba ngo mu Fenike no mu Samariya, vechiparajira kutenderuka kwo vo majinja, navo vakayita kuti vakoma vese vadakare kakurutu,

⁴ naapo vaguma Jerusarema, vakaashihwa ngo chiara no vapostori no vakuru, navo vakaverenga zvese zvayinga ayita Mwari ndivo.

⁵ Asi vakamiruka vamweni vo rusinga rwo vafarisi, avo vakatenda, vechiti: “Kunosisira kuti vachekwe, no kupangwa kuti vangwarire Mipango ya Mosi.”

⁶ Vapostori no vakuru vakaungana kuti vajijisane ngoiyi ndava.

⁷ Kwakaitika vachapshakisisa kakurutu, Pedru wakamuka, akati kwavari: “Hama, munoziva kuti kubvira mazuva okutanga Mwari wakatsanangura pakati penyu kuti ngo kubudikija ngo muromo wangu vo majinja vazwe vhangeri, vatende.

⁸ Mwari uwo unoziva mwoyo, wakayita chapupu ndivo, ngo kuvapa Mweya Wakachena kudari ngo zvaakayita kwetiri;

⁹ naye aazivi kuyita mupauko pakati pedu navo, echichenesa mwoyo yavo ngo kugonda.

¹⁰ Ndizvo zvino, munoeja ngenyi Mwari, ngo kudira kanga mu musipa mwo vajiji, yo vasikazivi kukona kutwara majibaba edu nokuti isisu.

¹¹ Asi tinotenda kuti tinoponeswa ngo nyasha ja Mambo Jesu kudari ndivo.”

¹² No mbungano yese yakanyarara, yakapurutana kuna Bharnabha na Pauri vechiverenga zvivoniso no mishamiso zvaakayita Mwari ndivo pakati po vo majinja.

¹³ Ngosure vakanyarara, Jakobe wakapingura, echiti: Vanarume, hama, mwechindizwanyi.

¹⁴ Simoni wadurujira njira yaakatanga kufambira Mwari ndiyo kuno vo majinja, kutora kwaari vandhu vozina rake.

¹⁵ No mazwi ovaprofeti anotenderana no izvi; kudari ngo zvakatahwa.

¹⁶ “Ngosure kwo izvi ndinozohwirira, ndinozovakisazve ugaro hwa Dhavhidha hwakapwanyika, neni ndinozovakisazve matongo ahwo, ndinozohuimisa.

¹⁷ Kuti vakasara vo vandhu avo vamupshake Jehovha Mambo, no vo majinja ese, avo vanodanijwa ngo zina rangu, unonanga Jehovha uwo unoyita izvi zvese.

¹⁸ Zvinozivikanwa kuna Mwari, mishando yake yese kubvira mukutanga kwo nyika.”

¹⁹ Ndizvo kugura kwangu kuri kuti tisazotambuja avo vo majinja vanotenderukira kuna Mwari;

²⁰ asi kuti tivatarire kuti varege kusvipiswa ngo zvemiezaniso yo kudira, no kuomba, no kubva kuno zvinojipwa no ngazi.

²¹ Ngokuti kubvira kumibarihwana yokare, Mosi unavo ku madhoropa ese vanomuchumaira, echijijwa mu nyumba jo kudira masabatha ese.

Tshamba ku zviara

²² Naapo kwakavoneka kwakanaka kuno vapostori no vakuru pamwepo no chiara chese, kuti vatsanangure vanarume kubva pakati pavo kuti vavatume kuenda Antiyoki, pamwepo na Pauri na Bharnabha, vayiva Judhasi unozwi Bharsabhasi, na Sirasi; avo vayiva vakuru pakati po vakoma:

²³ Vakatara tshamba vechiti: “Vapostori no vakoma vakuru, kuno vakoma vo majinja vari mu Antiyoki, no mu Samariya, no vari mu Kirikiya, tinomuchungamija:

²⁴ Ngokuti takazwa kuti vamweni vakabva kwetiri vakamutambuja ngo mazwi, vechipaukisa mweya yenyu, kwavari atizivi kuvapa mupango;

²⁵ kwakavoneka kwetiri kwakanaka, apo taungana ngo chisungo chimwe, kuti titsanangure vanarume no kuvatuma kwomuri pamwepo no vanodikana vedu, Bharnabha na Pauri.

²⁶ Vandhu avo vakadira kupona kwavo mungozi ngo ndava yo zina ra Mambo wedu Jesu Kristu.

²⁷ Ndizvo tatuma Judhasi na Sirasi, ivo vanozomubvunjazve ngo muromo.

²⁸ Ngokuti kwakavoneka kwakanaka ku Mweya Wakachena no kwetiri kuti tisazomuthikisa mutwaro kupinda izvo zviro zvinosisira;

²⁹ kuti muregere izvo zvinobaihwa miezaniso, no ngazi, no zvinojipwa, no kuomba; nokudari mwechijingwarira kubva kuno izvi, kunozonaka kwomuri. Chisaranyi mwese.”

³⁰ Ndizvo ava vatendehwa kuti vaende, vakabzuka Antiyoki, naapo vayinga vaunganija mbungano pamwepo, vakavapa iyo tshamba.

³¹ Naapo vayinga vaijija, vakadakara ngo kuembezera kwaiyo.

³² Judhasi na Sirasi vambhwine vayiva vaprofeti, vakaembezera vakoma ngo mazwi mazhinji, no kuvagwinyisa.

³³ Ngosure vayinga vagara apo kamukuvo, vakatendehwa ngo vakoma kuti vaende ngo kunyarara kuno avo vakavatuma.

³⁴ (Asi kwakanakira Sirasi kugara apo).

³⁵ Asi Pauri na Bharnabha vakagara mu Antiyoki, vachijijisa no kuchumayira izwi ra Mambo, no vamwenivo vazhinji.

Kuparajana kwa Pauri na Bharnabha

³⁶ Ngosure kwo mazuva akatikuti, Pauri wakati kuna Bharnabha: “Ngatihwirire zvino, tifambire vatendi mu madhoropa ese etakachumaira izwi ra Mambo, tivone kugara kwovanoita.”

³⁷ Asi Bharnabha wayida kutoravo navo Johani, waizwi Marku.

³⁸ Asi Pauri wakakarakaja kuti akuzivi kunaka kutora navo uwo wakajipaura kubva kwavari vari mu Pamfriya asikazivi kuenda navo ku mushando.

³⁹ Jakavapo hasha huru, kwokuti vakaparajana umwe kuno umweni, na Bharnabha wakatora Marku kuenda naye, akahluza kuenda Kupro.

⁴⁰ Asi Pauri wakatsanangura Sirasi, akaenda, akapihwa kunyasha ja Mambo ngo vatendi,

⁴¹ naye wakaparura mu Siriya no mu Kirikiya, echigwinyisa zviara.