Zvak. 14 - NOVO TESTAMENTO EM NDAU

Pauri na Bhernabhe mu Ikoniyo

¹ Kwakaitika vari mu Ikoniyo, vakanghwina vari vaviri mu nyumba yo kudira yo vaJudha, vakavereketa kwokuti vazhinji vese vaJudha no vagiriki vakatenda.

² Asi vaJudha vasikatendi vakaveruja mweya wo vo majinja kurwisana naavo vakoma.

³ Ndizvo vakagara apo mukuvo wakareba, vechivereketa ngo kushinga ndi Mambo, iye wakayita chapupu kuno izwi ro nyasha jake, echitenda kuti zvivoniso no zvishamiso zviitwe ngo nyara javo.

⁴ Asi uwandu hwo vandhu vo dhoropa vakaparajana; rupande rwavo rwakaima no vaJudha, no rupande rumweni rwakaima no vapostori.

⁵ Naapo vakavamukira vese vo majinja, no vo vaJudha, no vatongi vavo, kuti vavaitire zvakashata, no kuvafura ngo mapuwe,

⁶ vechiziva, vakatizira kuenda ku madhoropa o Rikoniya, ari Ristriya no Dherbhe, no ku ndharaunda jawo.

⁷ Naapo vakachumaira vhangeri.

Mu Ristriya no mu Dherbhe

⁸ Kwayiva mu Ristriya mundhu wakatikuti wayiva chigwadara mutshoka jake, uri chirema kubvira mundani ya mayi wake, aazivi kumbofamba.

⁹ Uwo wakamuzwa Pauri echivereketa, iye amuringisisa, avona kuti wayiva no kutenda kuti aponeswe,

¹⁰ wakati, ngo izwi guru: “Ema ngo tshoka jako.” Naye wakanyanduka, akafamba.

¹¹ Naapo mbungano yavona izvo zvakaitwa ndi Pauri yakadanijira yechiti, ngo rurimi rwo Chirikoniya: “Zvimwari zvakabzuka kwetiri, zvino muemo wo vandhu.”

¹² Navo vakaduja Bharnabha kuti, Jupiteri, na Pauri, kuti ndi Mekuri, ngokuti iye wayiva muvereketi mukuru.

¹³ No mupristi wa Jupiteri uwo themperi rake rayiva pamberi po dhoropa, wakazisa n'ombe no maruva pa musuvo, wayida kuyita mubairo kwavari, pamwepo no mbungano.

¹⁴ Asi apo vapostori Bharnabha na Pauri vayinga vazwa, vakamwesa zvokusimira zvavo, vakagogoma kuenda pakati po mbungano, vechidanijira

¹⁵ vechiti: “Vanarume, munoita izvi ngenyi? Isisuvo tiri vandhu kudari ndimwi, tinozisa kwomuri masoko akanaka kuti mutenderuke kubva kuno izvi zvisina shwiro, kuviya kuna Mwari unopona, uwo wakarura denga, no nyika, no jombe, no izvo zvese zviri mukati mwazvo.

¹⁶ Uwo ngomikuvo yo majinja akapinda wakaatendera ese kuti afambe ngo njira jao.

¹⁷ Asi aazivi kusiya asina uchapupu pachake, echiita zvakanaka, echimupa mvura inonaya kubva mu denga, no kukotora zvokuha zvakawanda, echizarisa mwoyo yenyu ngo zvokuha, no kudakara.”

¹⁸ Pikija vakavereketa izvi, zvakavanesera kurambisa mbungano kuti isazopira mudiro kwavari.

¹⁹ Asi kwakaguma apo vaJudha vechibva Antiyoki no Ikoniyo, navo vakaonga mbungano, vakafura Pauri ngo mapuwe, vakamukweva kumubudisa kunja kwo dhoropa, vechipinimija kuti wafa.

²⁰ Asi vajiji vaungana kumutendeneja, wakamuka, akanghwina mu dhoropa; no chimangwanani wakaenda na Bharnabha Dherbhe.

Kuhwirira mu Antiyoki yo Siriya

²¹ Naapo vayinga vachumaira vhangeri mu dhoropa iro, vakayita vajiji vazhinji, vakapetuka Ristriya no Ikoniyo no Antiyoki,

²² vechigwinyisa mweya wo vajiji, vechivapota kuti vavangirire kugara mukutenda, nokuti kunosisira kuti tinghwine mu Umambo hwa Mwari ngo kupotya matambujiko akawanda.

²³ Naapo vayinga vagaja vakuru muzviara zvese, vakakumbira ngokuera kuha, vakavapira kuna Mambo wo vayinga vakatenda kwaari.

²⁴ Navo vakaparura mu Pisidhiya, vakaguma Pamfriya.

²⁵ Naapo vayinga vavereketa izwi mu Perga, vakabzuka kuenda Atariya;

²⁶ no kubva apo vakahluza kuenda Antiyoki, apo po vakapirwa munyasha ja Mwari, kuyita mushando uwo wo vayinga vapeja.

²⁷ Naapo vayinga vaguma, vakaunganija chiara pamwepo, vakashumira zvese zvaakayita Mwari ndivo, no njira yaakabewurira ndiyo vo majinja musuvo wo kugonda.

²⁸ Navo vakagara apo no vajiji mukuvo wakareba.