Zvak. 12 - NOVO TESTAMENTO EM NDAU

Kuurawa kwa Jakobe no kubatwa kwa Pedru

¹ Zvino ngo uwo mukuvo Herodhi mambo wakatambanuja nyara jake kutambuja vamweni vo chiara.

² Naye wakauraya Jakobe mukoma wa Johani ngo shoti.

³ Avona kuti izvo zvakadakajisa vaJudha, wakaenda mberi kubatavo Pedru. Ao ayiva mazuva ochimanda chisina mumera.

⁴ Naapo iye amubata, wakamunghwinisa mu guniya, akamupira kuzvikwata zvirongomuna, zvino masocha marongomuna, kuti amurinde; echipinimija kumubudisa kuno vandhu ngosure kwo Phasika.

⁵ Ndizvo Pedru wakangwarihwa mu guniya, asi chiara chakavangirira kumukumbirira kuna Mwari.

Kusununguhwa kwa Pedru

⁶ Asi apo Herodhi ayinga oda kumubudisa, ngo usiku uhwo Pedru ayinga akavata pakati pomasocha maviri, akasungwa ngo magaragajero maviri; no varindi vayiva pa musuvo vechingwarira guniya.

⁷ Vonayi, ngirosi ya Mambo yakayima phedo pake, no kujeka kwakajeka mukamera ro guniya; nayo yakarova Pedru ngo parutivi, ikamumusa, yechiti: “Kasira kumiruka.” No magaragajero akasununguka kubva munyara jake.

⁸ No ngirosi yakati kwaari: “Jisimije usunge magwada ako”, naye wakayita kudaro. Yakati kwaari: “Pfeka chokufuka chako, unditevere.”

⁹ Naye wakabuda kunja wakaitevera; aazivi kuziva kuti chayiva no gwinyiso chakaitwa ngo ngirosi, asi wakapinimija kuti wakavona chivoniso.

¹⁰ Naapo vapinda varindi vokutanga no vochipiri, vakaguma pa musuvo wo simbi wo kunghwina ndiwo mu dhoropa; nawo wakajibewukira kwavari wega; vakabuda, vakafamba ngo njira imwe; paripo ngirosi yakamusiya.

¹¹ Naapo Pedru apembenuka, wakati: “Zvino ndinoziva kuti ngo gwinyiso Mambo wakatuma ngirosi yake, akandinunurira kunyara ya Herodhi, no kubva mukugarira kwese kwo vandhu vo vaJudha.”

¹² Naapo ayinga apinimija ngo icho, wakaguma ku nyumba ya Mariya, mayi wa Johani, waizwi Marku; apo pavayinga vakaungana vazhinji; vechikumbira.

¹³ Asi aguguja pa musuvo, musikana zina rake raizwi ndi Rodha, wakaviya kopurukira.

¹⁴ Asi apo aziva izwi ra Pedru, aazivi kubewura musuvo ngo kudakara, asi wakagogoma kunghwina, akavabvunja kuti Pedru wakayima pa musuvo.

¹⁵ Asi vakati kwaari: “Unopenga!” Asi iye wakavangirira kugwinyisa kuti ndizvo. Asi vakati: “Ingirosi yake.”

¹⁶ Asi Pedru wakavangirira kuguguja: Navo vabewura, vakamuvona, vakashamiswa.

¹⁷ Asi iye wakayita chivoniso ngo nyara kuti vanyarare, wakadurujira kwavari njira yaakamubudisa ndiyo Mambo mu guniya. Wakati: “Zivisanyi izvi kuna Jakobe nokuno hama.” Wakabvapo, akaenda kundau imweni.

¹⁸ Zvino kwaeja, kwayivapo bope guru mukati mwo masocha, kuti chinyi chayinga chaitika kuna Pedru.

¹⁹ Naapo Herodhi amupshaka, asikazivi kumuwana, wakabvunjisisa varindi, akapanga kuti vaurawe. Na Pedru wakabzuka kubva Judhiya, akaenda Khesariya, akagareyo.

Kufa kwa Herodhi

²⁰ Zvino Herodhi waitsenekera kakurutu avo vo Tire, no vo Sidhoni: Navo vakaviya kwaari ngo chisungo chimwe, kwakati vaiyana na Brastu, nduna yo kamera ra mambo vakakumbira kuti vaiyaniswe, ngokuti nyika yavo yaiwana zvokuha kubva ku nyika ya Mambo.

²¹ Na ngo zuva rakaemeswa, Herodhi wakajisimija zvokufuka zvo umambo, akagara pa dendemaro, wakavereketa kwavari.

²² No vandhu vakadanijira, vechiti: “Iri izwi ra Mwari, haiwa ro mundhu.”

²³ Paripo ngirosi ya Mambo yakamurova, ngokuti aazivi kukuja Mwari: Naye wakahiwa ngo honye, akafa.

²⁴ Asi izwi ra Mwari rakakura, no kuwanjiswa.

²⁵ Bharnabha na Sauri vakahwirira kubva Jerusarema, apo vayinga vapeja mushando wavo, vechitora navo Johani waizwi Marku.