Zvak. 11 - NOVO TESTAMENTO EM NDAU

Pedru unodurujira mu chiara cho Jerusarema

¹ Zvino vapostori no hama jaigara mu Judhiya, vakazwa kuti majinja nao ayinga aashira izwi ra Mwari.

² Naapo Pedru ayinga akwira Jerusarema, avo vovakachekwa vakayita hasha naye,

³ vechiti: “Iwewe wakanghwina kuna vandhu vasikazivi kuchekwa, wakaha navo.”

⁴ Asi Pedru wakatanga kuvabvunja zvese ngo kutevererana kwazvo, echiti:

⁵ “Ndaiva ndiri mu dhoropa ro Jopa ndechikumbira; ndakabatwa mu mweya, ndakavona chivoniso cho ndiro yakatikuti inonga jira rakapetwa, yechibzuswa ngo makhona marongomuna kubva mu denga; nayo yakaviya kwendiri.”

⁶ Apo ndairingisisa, ndakapinimija, ndikavona zvinyama zvo mu nyika zvino mirenje mirongomuna, no zvikara zvo mushango, no zvinogwezva, no shiri jo mu denga.

⁷ Ndakazwa izwi rechiti kwendiri, Miruka Pedru, uuraye, uhe.

⁸ Asi ndakati, Haiwa, Mambo; ngokuti apana chiro chisina shwiro nokuti chikasvipiswa chakambonghwina mumuromo mwangu.

⁹ Asi izwi rakapingura kwochipiri rechibva mu denga, rechiti: Chaakachenesa Mwari, usati chiro chisina shwiro.

¹⁰ No izvi zvakaitika katatu, nazvo zvese zvakakwijwazve mu denga.

¹¹ Vonanyi, paripo vanarume vatatu vayinga vakayima pamberi po nyumba yo taigara, avo vayinga vatumwa kwendiri vechibva Khesariya.

¹² No Mweya wakandibvunja kuti ndiende navo, ndisina mutsananguro. Naava vakoma vatandhatu vakaendavo neni, nesu takanghwina mu nyumba yo mundhuwo.

¹³ Naye wakaerenguja kwetiri ngo njira yayinga avona ngirosi yechiima mu nyumba mwake, yechiti: Tuma ku Jopa, uviise Simoni uwo unozwi Pedru;

¹⁴ iye unozovereketa kwouri mazwi ounozoponeswa ndiwo, iwewe no vo nyumba yako vese.

¹⁵ Naapo ndichatanga kuvereketa, Mweya Wakachena wakabzuka panyezuru pavo, kudari ngo zvowakabzuka panyezuru pedu pakutanga.

¹⁶ Neni ndakacherecheja izwi ra Mambo raakavereketa, kuti: “Johani, ngo gwinyiso wakabhapatisa ngo kumwa, asi imwimwi munozobhapatisa ndi Mweya Wakachena.”

¹⁷ Ndizvo, kudari Mwari akavapa chipuwo chimwecho icho chaakapavo kwetiri, apo takatenda kuna Mambo Jesu Kristu, inini ndayinga ndiriani kuti ndingarwisana na Mwari?

¹⁸ Naapo vazwa izvi, vakanyarara, vakakurisa Mwari, vechiti: “Ndizvo, Mwari wakapavo kuno vo majinja kutenderuka kuti vapone.”

Chiara cho Antiyoki

¹⁹ Ndizvo avo vakaparajikira kundau jese ngo ndava yo kutambujwa ukwo kwakaitika ngo ndava ya Stefano, vakafamba mbhera kuguma Fenike, no Kupro, no Antiyoki, vasikavereketi izwi kuvamweni, asi kwega ku vaJudha.

²⁰ Asi vayivapo vamweni vayiva vanarume vo Kupro, no vo Kureni, avo vayinga vaguma mu Antiyoki, vakachumaira ku vagiriki navo, vechichumaira ndi Mambo Jesu.

²¹ No nyara ya Mambo yayiva navo, no vazhinji vakatenda, vakatenderukira kuna Mambo.

²² No mbiri yavo yakazwika munjeve jo chiara chayiva mu Jerusarema. Navo vakatuma Bharnabha kuenda Antiyoki.

²³ Uwo apo ayinga aguma, no kuwana nyasha ja Mwari wakadakara; wakavapanga vese kuti vabatirire kuna Mwari ngo mwoyo unogwinyisira.

²⁴ Ngokuti wayiva mundhu wakanaka, akazara ndi Mweya Wakachena na ngo kugonda; no vandhu vazhinji vakaengejehwa kuna Mambo.

²⁵ Bharnabha wakaenda Tarsu koopshaka Sauri.

²⁶ Naapo amuvona, wakamuviisa Antiyoki. Kwakaitika kuti vakapeja gore rese vakaungana pamwepo no chiara, vakajijisa vandhu vazhinji; no vajiji vakatanga kudujwa kuti “vakristu” mu Antiyoki.

²⁷ Ngo mazuva ao vakabzuka Antiyoki vaprofeti vechibva Jerusarema.

²⁸ Kwakaitika umwe wavo zina rake raizwi ndi Agabhu, akavapangijira ndi Mweya kuti njara huru inozogumira nyika yese; iyo yakaitika ngo mazuva a Kraudhiyo.

²⁹ No vajiji vakatenderana, mundhu wese kudari ngo zvaaikona, kuti atumire zvingabesera hama jaigara mu Judhiya.

³⁰ Navo vakayita kudaro, vakazvituma kuno vakuru ngo nyara ja Bharnabha na Sauri.