Zvak. 10 - NOVO TESTAMENTO EM NDAU

Pedru na Kornorio

¹ Kwayivapo mundhu wakatikuti mu Khesariya, zina rake raizwi Kornorio, nduna yo chikwata cho masocha chaizwi cho Itariya.

² Waiya mundhu unodira, no unomutya Mwari pamwepo no vo nyumba yake yese, wakakovera kakurutu ku vandhu, no kugara echikumbira kuna Mwari.

³ Iye wakavona ngo chivoniso pambhene kunonga nguva yo chipfumbamwe yo zuva, ngirosi ya Mwari yechinghwina kwaari, yechiti kwaari: “Kornorio!”

⁴ Asi iye aringisisa kwoiri, echitya, wakati: “Chinyi, Mambo?” Nayo yakati kwaari: “Mikumbiro yako no kukovera kwako zvakakwira kuyita chicherechejiso pamberi pa Mwari.

⁵ Nazvino tuma ku Jopa vanarume, uviise mundhu unozwi Simoni, uwo unozwi Pedru.

⁶ Iye unogara no mundhu unozwi Simoni musukuti, nyumba yake iri phedo po jombe (iye unozokubvunja icho chinosisira kuti uite).”

⁷ Apo ngirosi yakavereketa kwaari yayinga yaenda, wakadanija vaviri vo varanda, vo nyumba yake, no socha raidira raavo vayigara vechimushandira;

⁸ naapo ayinga adurujira kwavari zvese, wakavatuma kuenda Jopa.

⁹ Zvino ngo zuva raitevera avo vachafamba, vechikwedera ku dhoropa, Pedru wakakwira panyezuru po nyumba kookumbira, kunonga nguva yochitandhatu.

¹⁰ Wakazwa njara, echidisisa kuti ahe; asi vachanasirira, wakabatwa mu mweya;

¹¹ naye wakavona denga rakabewuka, no ndiro yakatikuti yechibzuka inonga jira rakapetwa rechibzuswa pa nyika ngo makhona aro marongomuna.

¹² Mukati mwaro mwayiva no mbewu jese jo zvinyama zvino mirenje murongomuna, no zvese zvinogwezva zvo mu nyika, no shiri jo mu denga.

¹³ No izwi rakazwika kwaari, rechiti: “Miruka, Pedru uraya, uhe.”

¹⁴ Asi Pedru wakati: “Haiwa, Mambo, ngokuti andizivi kutongoha chiro chisina shwiro no chakasvipiswa.”

¹⁵ No izwi rakazwika kwaari, ngo kwochipiri, rechiti: “Icho chaakachenesa Mwari, usati achina shwiro.”

¹⁶ Ichi chakaitika mukuvo mitatu, no ndiro yakaashirwazve mu denga.

¹⁷ Nazvino Pedru achakangaijwa mukati mwake kuti chinorevenyi chivoniso icho chaayinga avona, vonayi, avo vanarume vakatumwa ndi Kornorio, vayinga vechibvunjisa nyumba ya Simoni, vakayima pa musuvo.

¹⁸ Navo vakadanijira, vakabvunjisa kuti Simoni unozwi Pedru unogara apo here.

¹⁹ Na Pedru achapinimija ngo chivoniso, Mweya wakati kwaari: “Vonayi, vanarume vatatu vanokupshaka.

²⁰ Asi miruka ubzuke uende navo, usikagonondi; ngokuti ndini ndakavatuma.”

²¹ Pedru wakabzuka kuna vanarume avo, akati: “Vonanyi, ndini uwo wo munopshaka, ndizvo ndava ngoyenyi yamwafambira?”

²² Navo vakati: “Kornorio, nduna yo zana, mundhu wakarurama, no unomutya Mwari, uno mbiri yakanaka kujinja rese ro vaJudha, wakapangwa ngo ngirosi yakachena kukutumira kuti uviye ku nyumba yake, no kuzwa mazwi anobva kwouri.”

²³ Ndizvo iye avadanija kunghwina mukati, akavapa po kuvata. Ngo zuva raitevera, wakamuka, akaenda navo, no hama jimweni jo Jopa jakaendavo naye.

²⁴ Ngo zuva raitevera vakanghwina mu Khesariya. Na Kornorio wayivagarira, wayinga adanija pamwepo no hama jake no shamwari jake jinodikana.

²⁵ Kwakaitika apo Pedru anghwina Kornorio, wakashongana naye, akawa pa tshoka jake, akamudira.

²⁶ Asi Pedru wakamumiruja echiti: “Miruka nenivo ndiri mundhu.”

²⁷ Achavereketa naye, wakanghwina mukati, akavona vazhinji vakaungana.

²⁸ Wakati kwavari: “Imwimwi mwambhwine munoziva kuti chiri chiro chisikatendehwi ngo mupango kuti mundhu uri mujudha ashonganiswe nokuti aviye kuno mundhu uri wo jinja rimweni, asi Mwari wakandipangijira kuti ndisazonanga kuti mundhu chiro chisina shwiro, nokuti uno svina.”

²⁹ Ndizvozve ndaviya apo ndakadanijwa ndisikarambi. Ndizvo ndinobvunjisa mwakandidanijirenyi?

³⁰ Na Kornorio wakati: Aamazuva marongomuna akapinda mbhera nguva iyi, ndaingwarira nguva yo kukumbira yo chipfumbamwe mu nyumba yangu; vonayi, mundhu wakayima pamberi pangu uno zvokufuka zvinojeka,

³¹ naye wakati: Kornorio, mikumbiro yako yakazwika, no kukovera kwako kwakacherechejwa pamberi pa Mwari.

³² Ndizvo tuma ku Jopa, udanije Simoni, uwo unozwi Pedru; unogara mu nyumba ya Simoni musukuti, phedo po jombe.

³³ Ndizvo paripo ndakatumira kwouri, newe ngo kuviya wanasa; ndizvo zvino tiri pano tese pamberi pa Mwari kuzwa zvese zvakapangwa kwouri ndi Mwari.

Kudurujira kwa Pedru

³⁴ Na Pedru ashama muromo wake, wakati: Ngo gwinyiso ndinovona kuti Mwari andiyepi mutsananguri wo vandhu,

³⁵ asi ku majinja ese, uwo unomutya, nokuita zvakarurama, unoashirika kwaari.

³⁶ Izwi iro raakatuma kuno vana vaIsraeri, echichumaira masoko akanaka okunyarara ndi Jesu Kristu (iye uri Mambo wavo vese).

³⁷ Iro izwi imwimwi mwambhwine munoriziva, rakateketeswa mu nyika, kubvira ngo mu Garire ngosure kwo rubhapatiso rwaakachumaira Johani.

³⁸ Ngo njira yaakamuzoja ndiyo Mwari Jesu wo Nazaretha ndi Mweya Wakachena, na ngo simba. Uwo waifamba echiita zvakanaka, echiponesa avo vese vaitambujwa ndi dhiyabhorosi; ngokuti Mwari wayiva naye.

³⁹ Nesu tiri zvapupu zvo izvo zvese zvaakayita kwese mu nyika yo vaJudha, no mu Jerusarema; uwozve wo vakauraya, ngo kumuturika pa muti.

⁴⁰ Uwu Mwari wakamumusa ngo zuva rechitatu, akamupa simba kuti avoneke.

⁴¹ Asi haiwa kuvoneka ngo vandhu vese, asi kuno zvapupu, izvo zvakatsanangurwa ngo pamberi ndi Mwari, no kwetiri isisu, takaha no kumwa naye ngosure kwo kumuka kwake kwo vakafa.

⁴² Iye wakatipanga kuchumayira ku vandhu, no kupupura kuti uwu ndiye wakaemeswa ndi Mwari kuyita Mutongi wo vanozwa no wo vakafa.

⁴³ Kwaari vaprofeti vese vanoyita chapupu ndiye, kuti ngo zina rake, mundhu wese unotenda kwaari unoregerehwa zvishaishi.

Mweya Wakachena no vo majinja

⁴⁴ Apo Pedru achavereketa aya mazwi, Mweya Wakachena wakabzuka panyezuru pavo vese vakazwa izwi.

⁴⁵ Naavo vatendi vo vakachekwa avo vakaviya na Pedru, vakashamiswa ngokuti chipo cho Mweya Wakachena chakadururihwavo panyezuru po vo majinja.

⁴⁶ Ngokuti vakavazwa vechivereketa ngo ndimi jimweni, no kukurisa Mwari. Naapo Pedru wakapingura:

⁴⁷ “Pane ungarambisa kumwa here kuti ava vasabhapatiswa, avo vakaashira Mweya Wakachena kudari ndisu?”

⁴⁸ Naye wakapanga kuti vabhapatiswe ngo zina ra Jesu Kristu. Vorovomupota kuti agare apo mazuva akatikuti.