Zvak. 1 - NOVO TESTAMENTO EM NDAU

Jesu unogondisa kutumira Mweya Wakachena

¹ Ndakatara bhuku ro kutanga, A Tiofiro, yo izvo zvese zvaakatanga Jesu kuyita no kujijisa,

² mbhera kuguma kuzuva iro raakaashihwa mu denga, ngosure ayinga apanga ndi Mweya Wakachena vapostori vaayinga akatsanangura.

³ Kwavarizve iye wakajipangijira uri unopona ngosure kwo kutambujika kwake, ngo zvinovonekesa gwinyiso zvakawanda, echivoneka kwavari mazuva ari makumi marongomuna, echivereketa ngo ndava yo Umambo hwa Mwari.

⁴ Echiungana pamwepo navo, wakavapanga kuti vasazobva mu Jerusarema, asi kuti vagarire icho chakagondiswa ndi Baba, icho chomwakazwa ndini:

⁵ “Ngokuti ngo gwinyiso Johani wakabhapatisa mu kumwa, asi imwimwi munozobhapatiswa ndi Mweya Wakachena ngosure kwo mazuva mashomani.”

Kukwira kwa Jesu mu denga

⁶ Ndizvo avo, apo vayinga vaungana, vakamubvunjisa, vechiti: “Mambo, ngo uwu mukuvo unozohwirija here umambo ku Israeri?”

⁷ Iye wakati kwavari: “Akuri kwenyu akadi kuziva mukuvo nokuti nguva, izvo zvaakangwaririra Baba pasi po simba rake ambhwine.

⁸ Asi munozoashira simba apo Mweya Wakachena waguma panyezuru penyu, nemwi munozoita zvapupu zvangu mu Jerusarema, no mu Judhiya mwese, no mu Samariya, no kumagumo onyika.”

⁹ Naapo ayinga avereketa izvi, vacharingira, iye wakatohwa kuenda mu denga; no gore rakamuashira kumufisha kubva mukuvona kwavo.

¹⁰ Kwakati vacharingisisa mu denga, echikwira, vonayi, vanarume vaviri vakayima phedo pavo, vane zvokusimira zvinon'anikira.

¹¹ Avozve vakati kwavari: “Vamuna vo Garire, munoima ngenyi mwechiringira mu denga? Uwu Jesu waashihwa kubva kwomuri kuenda mu denga, unozoviyazve kudari ngo zvo mwakamuvona echienda mu denga.”

Matiasi unogara pandau ya Judhasi

¹² Ndizvo vopetuka kuenda Jerusarema, kubva ku dundhu ro Maorivhe, riri phedo no Jerusarema, muhambo wo zuva ro sabatha.

¹³ Naapo vayinga vanghwinemwo, vakakwira ku kamera ro muturika, apo po vayigara vese; vana Pedru, na Jakobe, na Johani, na Andreu, na Firipi, na Tomasi, na Bhartoromeu, na Mateu, na Jakobe mwana wa Arifeu, na Simoni, na Judhasi mwana wa Jakobe.

¹⁴ Ava vese vakavangirira kukumbira ngo chisungo chimwe, pamwepo no majimayi, Mariya mayi wa Jesu, no vanukuna vake.

¹⁵ Na ngaao mazuva Pedru wakayima pakati po vatendi, no uwandu hwo vandhu avo pamwepo hwayiva hunonga huri zana no makumi maviri (120), akati:

¹⁶ “Vanarume, vatendi, kunodikana kuti chizarisike icho chakatahwa chakavereketwa kare ndi Mweya Wakachena ngo muromo wa Dhavhidha ngo ndava ya Judhasi, uwo wayita mutungamiri wo avo vakamubata Jesu.

¹⁷ Ngokuti iye wakaverengwa pamwepo nesu, akaashira chikovanisihwa chake cho uwu mushando.

¹⁸ (Zvino uwu mundhu wakatenga munda ngo muthuso wo kunyangaja kwake; naye echiwa ngo tsukupinya wakaputika ndani, no maura ake ese akabuda.

¹⁹ Nakwo kwakazivikanwa kuvagari vese vo Jerusarema; kwokuti munda uwo wakadujwa ngo rurimi hwavo kuti, Akeredhama, ukwo kunoti, munda wo ngazi).

²⁰ Ngokuti kwakatahwa mu tshamba yo Nduyo: Ugaro hwake ngahuite shango, mundhu asagara mukati mwahwo. No mushando wo utungamiriri hwake ngautohwe ngo umweni.

²¹ Ndizvo kwaavo vanarume vakagara nesu ngo mukuvo wese waakanghwina no kubuda Jesu pakati pedu,

²² kubvira kwo rubhapatiso rwa Johani, mbhera kuguma kuzuva iro raakaashihwa mu denga kubva kwetiri, kunosisira kuti umwe atsananguhwe kuti ayite chapupu nesu cho kumuka kwake kubva kwo vakafa.”

²³ Navo vakaimisa vaviri, Josefa waizwi Bharsabhasi uwo mutupo wake waizwi Justu, na Matiasi.

²⁴ Vakakumbira vakati: “Iwewe Mambo, unoziva mwoyo yo vandhu vese, pangijira kwaavo vaviri uwo wo wakatsanangura,

²⁵ kuti iye aashire rupande rwo uwu mushando, no upostori, hwaakapauka Judhasi kubva kwouri, kuti aende kuugaro hwake.”

²⁶ Navo vakaringija hakata javo; no hakata jakabata Matiasi; naye wakaverengwa pamwepo no vapostori vari gumi naumwe.