Varoma 9 - NOVO TESTAMENTO EM NDAU

Mwari no vandhu vake

¹ Ndinovereketa gwinyiso ndi Kristu, andinyepi, mwoyo wangu unondiitira chapupu mu Mweya Wakachena,

² kuti ndinokusururiswa kukurutu no kuhwajihwa kusina magumo mu mwoyo mwangu.

³ Ngokuti ndingada kuti inini pachangu ndirashwe kubva kuna Kristu, ngo ndava yo hama jangu, ijo jiri hama jo jinja rangu ngo kubahwa.

⁴ Kwavari vaIsraeri; wakavaita vana vake, no uthende, no zvitenderano, no kupuwa mupango, no kudira, no zvigondiso;

⁵ ndivo majibaba mukuru avo, kubudikija ndivo Kristu wakabahwa ngo kwenyama, uwo uri panyezuru po zvese, Mwari ngaairikijwe kunoti mbhera narini. Ameni!

⁶ Asi azvinangi kuti izwi ra Mwari rakakorera. Ngokuti andivopi vaIsraeri vese akadi avo vakabva kuna Israeri;

⁷ haiwa, ngokuti vari mubarihwana hwa Abrahama, izvo azvinangi kuti vari vana vake akadi; asi, mubarihwana wako unozodujwa kubva kuna Isaka.

⁸ Ukwo kunoti, andivopi vana vakabahwa ngo kwenyama vari vana va Mwari; asi vana vari vo chigondiso ndivo vanoverengwa kuti vari mibarihwana wake.

⁹ Ngokuti iri ndiro izwi ro chigondiso: “Ngouyu mukuvo ndinozoviya, na Sara unozova no mwana.”

¹⁰ Ichi andichopi chega chakadaro; asi Rabheka naye, apo ayinga ano mimba ngo umwe, ndi Isaka baba edu.

¹¹ Ngokuti vana vasati vaberekwa, nokuti vasati vayita chakanaka nokuti chakashata, kuti zano ra Mwari ngo kutsananguhwa rigwinyiswe, haiwa ngo mishando, asi ngo uwo unodanija,

¹² kwakanangwa kwaari, kuti: “Mukuru unozoshandira mudoko.”

¹³ Kudari ngo zvakatahwa: “Jakobe ndakamuda, asi Isau ndakamunyenya.”

¹⁴ Ndizvo tinozoti kudini? Kuripo kusikarurami here kuna Mwari? Kusaitika kudaro!

¹⁵ Ngokuti iye wakati kuna Mosi: “Ndinozomuitira nyasha wo ndinoda kumuitira nyasha, no kukungurira wo ndinoda kukungurira.”

¹⁶ Ndizvo azviri ngo kuda kwo mundhu nokuti ngo kuyita kwo mundhu asi ngo nyasha ja Mwari.

¹⁷ Ngokuti matahwa anoti kuna Faro: Ngo iyi ndava ndakakuemesa, kuti ndivonise ndiwe simba rangu, nokuti zina rangu riteketeswe mu nyika jese.

¹⁸ Ndizvo unoitira nyasha avo vaanoda kuvaitira nyasha, naavo vaanoda unovaita kuti vakonje.

Nyasha no ushungu hwa Mwari

¹⁹ Ndizvo unozoti kwendiri: “Uchaitira ndava ngenyi? Ngokuti ndiyani wakarwa no chiri kuda kwake?”

²⁰ Haiwa, asi uriyani mundhuwe, unokanijana na Mwari? Chiro chakaumbwa chingananga here kuno uwo wakachiumba, kuti, wakandiumba kudari ngenyi?

²¹ Zve, muumbi aana simba here panyezuru po dongo kwo mburumbwa rimwero kuumba chijio chimwe chinoreremejeka no chimweni chisikareremejeki?

²² Kungavanenyi kudari Mwari echida kupangijira ushungu hwake, no kuzivisa simba rake, akashingirira ngo kusengerera kakurutu kuno ndiro jo ushungu jakaemesehwa kuparajwa.

²³ Zve kuti azivise upfumi hwo uthende hwake kuno ndiro jo nyasha, ijo jakanasirihwa ngo pamberi kuano uthende.

²⁴ Kunoti isisu tiri, avo vaakadanijazve, haiwa vanobva ku vaJudha vega, asi no kwavozve vanobva ku majinja.

²⁵ Kudari ngo zvaakavereketazve mu tshamba ya Hoziya: “Ndinozovadanija kuti vari vandhu vangu, avo vasaiva vandhu vangu akadi; no kumudanija kuti uri unodikana, uwo wayinga asiri unodikana.”

²⁶ Kunozoitika kuti pandau paakananga kwavari, kuti: “Amuri vandhu vangupi, apo vanozodanijwa kuti vari vana va Mwari unopona.”

²⁷ Na Isaya wakadanijira ngo vaIsraeri, kuti: Pikija uwandu hwo vana vaIsraeri hwechinyazodari ngomusanga wo mujombe, vakasara avo vanozoponeswa.

²⁸ Ngokuti Jehovha unozozajisa izwi rake mu nyika echiripejisa no kurifupisa.

²⁹ Nokudari ngo zvaakavereketa Isaya karetu: Kudari kuti Jehovha wehondo asikazivi kutisiira mubarihwana, tainga takadari ngo Sodhoma, nokudari ngo Gomora.

Kutama kugonda kwa Israeri

³⁰ Ndizvo tinozonangenyi? Kuti vo majinja avo vasikazivi kutevera kururama, vakawana kururama, eya, kuno uwo kururama kuri kubudikija ngo kugonda;

³¹ asi Israeri echitevera mupango wo kururama aazivi kuwana mupango uwo.

³² Ngenyi? Ngokuti avazivi kukupshaka ngo kugonda, asi kudari ngo mishando. Vakakhugunwa pa buwe ro kukhugunyisa;

³³ kudari ngo zvakatahwa: “Ringirai, ndinorajika mu Zioni buwe ro kukhugunya, ruware runovaita kuti vawe; no uwo unotenda kwaari aazopsherujwi.”