Varoma 7 - NOVO TESTAMENTO EM NDAU

Muezaniso wo kurovorana

¹ Nokuti amuzivi here, hama, (ngokuti ndinovereketa kuno avo vonoziva Mipango), kuti Mipango inotonga panyezuru pomundhu mukuvo wese waachararama?

² Ngokuti mwanakaji uno mwamuna unosungwa ngo mupango kuno mwamuna wake achararama; asi kuti mwamuna wake afa, unosununguhwa kubva ku mupango wo mwamuna wake.

³ Ndizvo kudari apo mwamuna wake achararama, echinamatira kuno umweni, unozozwi uri muombi; asi kudari mwamuna wake afa, iye unosununguhwa kubva ku mupango, ndizvo aayiti muombi pikija anamatira kuno mwamuna umweni.

⁴ Ndizvo hama jangu, imwimwizve mwakaitwa vakafa kumipango ngo muviri wa Kristu; kuti muitwe vo umweni, kunoti, kuno uwo wakamuswa kwo vakafa, kuti tibereke michero kuna Mwari.

⁵ Ngokuti apo taiva mu nyama, kuemura kwo zvishaishi kwayiva ngo ndava yo mipango, kwakashanda mundhengo jo muviri wedu, kukabudisa michero inobara rufu.

⁶ Asi zvino isisu takasununguhwa ku mupango, tatofa kuno izvo zvo takasungwa ndizvo; kwokuti zvino tinoshandira ngo mweya mupsha tisikashandiri ngo maitiro wokare wokubatisisa kuno izwi ro mipango.

Mupango no zvishaishi

⁷ Ndizvo tinozonangenyi? Mipango iri kushaisha here? Haiwa! Kani inga ndisikazivi kushaisha, kwega ngo mipango, ngokuti inga ndisikazivi kuemura, kudari mipango isikazivi kuti: Usazoemura.

⁸ Asi kushaisha kwechivona njira, kwakashanda mukati mwangu ngo mipango mbewu jese jo kuemura; ngokuti ngo kunja kwo mutemo kushaisha kwakafa.

⁹ Neni ndaipona ngo kunja kwo mutemo karetu, asi apo kwakaguma mipango kushaisha kwakamuswa, neni ndakafa.

¹⁰ No mupango uwo wakagajwa uri kupona, uwu ndakavona kuti uri wo kufa.

¹¹ Ngokuti kushaisha kwechivona njira kubudikija ngo mupango kwakandichengeja, na ngokubudikija ndiyo kwakandiuraya.

¹² Ndizvo Mutemo uri wakachena, no mipango yakachena, yakarurama no yakanaka.

¹³ Ndizvo izvo zviri zvakanaka zvakayita here rufu kwendiri? Haiwa! Asi kushaisha kuti kuvoneke kuti kuri kushaisha, ngo kushanda rufu kwendiri? Kubudikija ngoicho chakanaka; kwokuti kushaisha kubudikija ngo mipango kuite kwakanyanyisisa kushata.

Mundhu ihloko yo zvishaishi

¹⁴ Ngokuti tinoziva kuti Mipango iri yo Mweya; asi inini ndiri wo nyama, ndakatengeswa pasi po kushaisha.

¹⁵ Ngokuti chendinoita andichizivi; ngokuti andiiti chendinoda; asi icho chendinonyenya ndicho chendinoita.

¹⁶ Asi kudari ndinoita chendisikadi, ngokudaro ndinotendera kuti mutemo uri wakanaka.

¹⁷ Ndizvo zvino andinipi ndinoita kudaro, asi kuri kushaisha kunogara mukati mwangu.

¹⁸ Ngokuti ndinoziva kuti mukati mwangu, kunanga kuti mu nyama yangu, akugari no chiro chakanaka; ngokuti kwendiri kuripo kuda, asi kuyita chakanaka amuna akadi.

¹⁹ Ngokuti kunaka kwo ndinoda kuyita, andiiti, asi kushata kwo ndisikadi, ndikwo kwo ndinoita.

²⁰ Asi kudari ndechiyita chendisikadi, andinipi ndinochiita, asi kushaisha kunogara mukati mwangu.

²¹ Ndizvo ndinowana mutemo wokuti apo ndoda kuyita zvakanaka, kushata kundoripo pendiri.

²² Ngokuti ndinodakara mu mitemo ya Mwari ngo mundhu uri mukati mwangu.

²³ Asi ndinowana mupango umweni uri mundhengo jangu, wechiambana no mupango wo mupinimijo wangu, wechindidira muuranda pasi po mupango wo kushaisha uri mu ndhengo jangu.

²⁴ A, ndiri mundhu unotambujika: Ndiyani unozondinunurira kubva kuno uwu muviri wo kufa?

²⁵ Ndinobonga Mwari ndiye Jesu Kristu Mambo wedu ndizvo inini pachangu ngo mipinimijo wangu ndinoshandira Mipango ya Mwari; asi ngonyama ndinoshandira mupango wo kushaisha.