Varoma 5 - NOVO TESTAMENTO EM NDAU

Tiri mukunyarara kuna Mwari

¹ Ndizvo techipembejwa ngo kugonda, tino kunyarara kuna Mwari ndiye Mambo wedu Jesu Kristu.

² Ndiye tinonghwiniswa ngo kugonda kuno iyi nyasha yo tinoima mukati mwayo; nesu tinodakarazve mukugonda ngokuva no uthende hwa Mwari.

³ Andizvopi zvega, asi tinodakarazve mu matambujiko edu; techiziva kuti kutambujika kunobara kusengerera;

⁴ no kusengerera kunobara kurovejera; no kurovejera kunobara kugonda;

⁵ no kugonda akupsheruji, ngokuti rudo rwa Mwari rwakaduruhwa kakurutu mu mwoyo mwedu ndi Mweya Wakachena wakapuwa kwetiri.

⁶ Ngokuti apo tainga tisina simba, Kristu wakatifira isisu vashaishi ngo mukuvo wakaemeswa.

⁷ Ngokuti zvinonesa kuti mundhu afire mundhu wakarurama. Asi pamweni vamweni vangashinga kufira mundhu wakanaka.

⁸ Asi Mwari wakatatija rudo rwake kwetiri, kuti apo tichiri vashaishi, Kristu wakatifira.

⁹ Kakurutu zvino, techipembejwa ngo ngazi yake tinozoponeswa ndiye kubva ku ushungu.

¹⁰ Ngokuti, kudari taiva vakorore, takaiyaniswa kuna Mwari ngo kufa kwo Mwana wake, kakurutu tiri vakaiyaniswa tinozoponeswa ngo ndaramo yake.

¹¹ Andizvopi zvega, asi tinozodakarazve kuna Mwari ndiye Mambo wedu Jesu Kristu, ndiye takaashira kuiyaniswa.

Adhamu na Kristu

¹² Ndizvo kudari ngo zvokwakanghwina kushaisha mu nyika ngo mundhu umwe; no kufazve kwakanghwina ngo kushaisha, ngokudaro kufa kwakagumira vandhu vese, ngokuti vese vakashaisha;

¹³ ngokuti mipango jisati jaavapo kushaisha kwaiapo mu nyika, asi kushaisha akuverengwi apo pasina mipango.

¹⁴ Pikija zvakanyadaro, kufa kwakatonga kubvira kuna Adhamu mbhera kuguma kuna Mosi, no kwavari vasikazivi kushaisha ngo njira yaakapauka ndiyo Adhamu, uwo wayiva muezaniso wo uwo wayinga echizoviya.

¹⁵ Asi chipuwo cho nyasha achizivi kuezaniswa no kupauka. Ngokuti kudari vazhinji vakafa ngo kupauka kwo mundhu umwe, kakurutu nyasha ya Mwari no chipuwo cho nyasha cho mundhu umwe, ndi Jesu Kristu chakawanjiswa kuno vazhinji.

¹⁶ Asi chipuwo achizivi kuezanisihwa uwo wakashaisha. Ngokuti kutongwa kwakaguma ngoumwe kuri kurashwa, asi chipuwo cho nyasha chinoyita kuti zvipaukiso zvakawanda zvipembejwe.

¹⁷ Ngokuti kudari ngo kushaisha kwo mundhu, kufa kwakatonga ngo ndava yo umwe; kakurutu avo vanoashira kuwanda kwo nyasha no chipuwo cho kururama vanozotonga mukururama ndiumwe Jesu Kristu.

¹⁸ Ndizvo kudari ngo kurashwa kwakagumira vandhu vese ngo kupauka kwo umwe, ngokudaro ngo kuyita kwo mundhu umwe wakarurama chipo cho nyasha chakagumira vandhu vese kuyita kupembejwa kwo kupona.

¹⁹ Ngokuti kudari ngo vazhinji vakaitwa vashaishi ngo kusikapurutana kwo mundhu umwe, ngokudaro vanozoitwa vakarurama ngo kupurutana kwo mundhu umwe.

²⁰ No Mupango jakanghwina kwokuti kushaisha kuwande; asi apo kushaisha kwawanzwa, nyasha yakapinda kakurutu kuwanjwa;

²¹ kuti kudari kushaisha kwakatonga mukufa, ngokudaro nyasha ingatonga ngo kururama kuenda mukupona kusikaperi ndiye Jesu Kristu Mambo wedu.