Varoma 3 - NOVO TESTAMENTO EM NDAU

Ngokwapi kuviyihwa kwo vaJudha

¹ Ndizvo mujudha unenyi chaanopinda vamweni ndicho? Nokuti kuchekwa kunobeserenyi?

² Kakurutu ngo njira jese, kutanga ndivo vaJudha vakapuwa mazwi a Mwari.

³ Kunenyi kudari vamweni vavo vasikazivi kutenda? Kusikatendi kwavo kunozoita here kuti kugondeka kwa Mwari kuite kusina shwiro?

⁴ Chisazoitika kudaro! Eya, Mwari ngaavoneke ari gwinyiso, pikija vandhu vese vari vanyepi; kudari ngo zvakatahwa, kuti: “Iwewe upembejwe ngo mazwi ako, no kunyisa mukutongwa kwako.”

⁵ Asi kudari kusikarurami kwedu kunopangijira kururama kwa Mwari, tinozoitenyi? Mwari uri usikazivi kururama here, uwo unohwirijira ngo ushungu? (Ndinovereketa kudari ngo mundhu).

⁶ Chisazoitika kudaro! Ngokuti kudari zvakadaro Mwari ungazoita matongerenyi nyika?

⁷ Asi kudari gwinyiso ra Mwari rechiwanjiswa ngokunyepa kwangu, kuyita kumukuja, ngenyi ndichatongwa kunonga ndiri mushaishi?

⁸ Eya, nesu atinangi ngenyi (kudari ngokureviwa kwedu, nokudari ngo zvo vanonanga vamweni ndisu kuti tinoti), ngatiite zvakashata kuti kunaka kuviye? Avo kurashwa kwavo kunovasisira.

Akuna wakarurama

⁹ Ndizvo chinyi? Isisu tiri mundau yakapinda kushata kuna avo here? Haiwa, akuzivi kudaro; ngokuti ngo pamberi tambovaitira ndava vese vaJudha no vagiriki kuti vese vari pasi po kushaisha;

¹⁰ kudari ngo zvakatahwa, kuti: “Apana wakarurama, haiwa akuna naumwe.

¹¹ Akuna naumwe unozwisisa, akuna no unopshaka Mwari.

¹² Vese vakapauka, vese pamwepo vakayita vasina shwiro; apana naumwe unoyita zvakanaka, haiwa akuna naumwe.

¹³ Mikuro yavo iiba rakabewuka; ngo rurimi rwavo vanochengeja; mbanda yo nyoka iri pasi po miromo yavo.

¹⁴ Miromo yavo yakazara ngo kutuka no kuvava.

¹⁵ Tshoka javo jinofambisa kuenda kooparaja ngazi;

¹⁶ kuparajwa no kutambujika zviri mu njira javo;

¹⁷ no njira yo kunyarara avazivi kuiziva.

¹⁸ Akuna kumutya Mwari pamberi po majiso avo.”

¹⁹ Zvino tinoziva kuti pikija ngochiri chinonangwa ngo mipango, chinovereketwa kwavari vari pasi po mipango; kuti miromo yavo yese inyarajwe, no nyika yese iviye mukutonga kwa Mwari.

²⁰ Ngokuti ngo mishando yo mipango akuna mundhu ungapembejwa pamberi pake; ngokuti ngo mipango kushaisha kunozivikanwa.

Mwari ndiye unoponesa

²¹ Asi zvino kwakapangijihwa kururama kwa Mwari ngo kunja kwo mipango, kwechiitihwa chapupu ngo mipango na ngo zvo vaprofeti.

²² Ukwo kunoti, kururama kwa Mwari kuri ngo kugonda Jesu Kristu kwavari vese vanotenda: Ngokuti akuna muparajaniso.

²³ Ngokuti vese vakashaisha, avazivi kunghwina ku uthende hwa Mwari;

²⁴ vechipembejwa pasina muripo ngo nyasha jake ngo kuripirwa kuri kuna Jesu Kristu.

²⁵ Uwo waakaemesa Mwari kuyita muripo, ngo kugonda, mu ngazi yake, kuti kupangijihwe kururama kwake, ngo kuregerehwa kwo zvishaishi zvakaitwa ngo pamberi, ngo kusengerera kwa Mwari.

²⁶ Kupangijira kururama kwake ngo uwu mukuvo; kuti iye pachake ayite wakarurama, no mupembeji wo uwo unotenda kuna Jesu.

²⁷ Ndizvo kuri kwapi kuganza? Kwakakonyehwa kunja. Ngowapi mupango? Ngo wo mishando here? Haiwa! Asi ngo mupango wo kugonda.

²⁸ Ngokuti tinotenda kuti mundhu unopembejwa ngo kugonda haiwa ngo mishando yo mipango.

²⁹ Zve, Mwari uri Mwari wo vaJudha vega here? Andiyepivo Mwari wo vo majinja here? Eya uri wo vo majinja naye.

³⁰ Kwechivoneka kuti Mwari ndiumwe, naye unozopembeja vakachekwa ngo kugonda, no vasikazivi kuchekwa ngo kugonda.

³¹ Ndizvo tinoregera Mipango ngo kugonda here? Kusazoitika kudaro! Asi tinogwinyisisa mipango.