Varoma 2 - NOVO TESTAMENTO EM NDAU

Kutonga kwa Mwari

¹ Ndizvo auchayiti usina ndava, mundhuwe unotonga; ngokuti ngoicho cho unotonga umweni ndicho, unojiitira ndava ndicho; ngokuti iwewe unotonga unondoita zviro ndizvo-ndizvo.

² Nesu tinoziva kuti ngo gwinyiso kutonga kwa Mwari kunorwisana naavo vanoyita zvakadaro.

³ Unopinimija kudari here, iwe mundhu, unotonga avo vanoyita zvakadaro, newe wechiyita zvakadaro, kuti iwewe unozopokonyoka here mukutongwa kwa Mwari?

⁴ Nokuti unoshora here upfumi hwo nyasha jake, no kushingirira, no kusengerera, usikazivi kuti nyasha ja Mwari jinokukweverera kuti utenderuke?

⁵ Asi kudari ngokukonja, no kusikatenderuki kwo mwoyo wako, unojiunganijira ushungu pa zuva ro ushungu, no ro kupangijira kutonga kwakarurama kwa Mwari;

⁶ uwo unozohwirijira ku mundhu wese kudari ngo mushando wake;

⁷ kwavari vanosengerera kuyita zvakanaka kupshaka uthende no kureremejwa no kusikavori, unozovapa kupona kusikaperi;

⁸ asi kwavari vane hasha, vasikapurukiri gwinyiso, asi vanopurukira zvisikazivi kururama, kunozovapo ushungu no kutseneka,

⁹ no kutambujika, no kuhwajihwa, panyezuru po mundhu wese unoyita zvakashata, kutanga ku vaJudha, no ku vagiriki navo;

¹⁰ asi uthende no kureremejwa no kunyarara kunozova kuno mundhu wese unoshanda zvakanaka, kutanga ku vaJudha, no ku vagiriki navo.

¹¹ Ngokuti kuna Mwari akuna kutsananguhwa kwo mundhu.

¹² Ngokuti avo vese vakashaisha vasina mupango, vanozofa vasina mupango; naavo vakashaisha vari pasi po mupango, vanozotongwa ngo mupango;

¹³ ngokuti sandivo vanozwa mupango vanozopembejwa pamberi pa Mwari, asi vayiti vo mipango vanozopembejwa;

¹⁴ ngokuti apo vo majinja vasina Mipango vanojiitira Mipango, ava vasina Mipango vane Mipango pachavo;

¹⁵ ngokuti vanopangijira mushando wo Mupango wakatahwa mu mwoyo yavo, mwoyo yavo inoita chapupu nawo, no mipinimijo yavo umwe no umweni unovaitira ndava, nokuti inovapembeja;

¹⁶ ngoiro zuva raanozotonga ndiro Mwari zvakafishika zvo vandhu, ndiye Jesu Kristu, kudari ngo vhangeri rangu.

Vajudha no Mupango

¹⁷ Asi kudari iwewe wechijidanija pachako kuti uri mujudha, wechigonda mupango, no kuganza ndi Mwari,

¹⁸ wechiziva kuda kwake, wechieja izvo zvakanaka, wechijijiswa mupango,

¹⁹ newe unonasa kuziva pachako kuti uri mutungamiriri wo mapofu, no kujeka kwaavo vari muchidima,

²⁰ no mupangijiri wo mapenji, mujijisi weavo vana vadoko mukuziva, uri uno chiyimo cho kuziva no cho gwinyiso mu Mupango;

²¹ ndizvo iwewe unojijisa vamweni, aujijijisi here? Iwewe unochumaira kuti mundhu asazoba unoba here iwewe?

²² Iwewe unoti, kuti mundhu asazoomba, unoomba here iwewe? Iwewe unonyenya miezaniso inodihwa, unoba here zvakacheneswa mu mathemperi?

²³ Iwewe unojiganzisa ngo Mipango, ngokugura kwako Mipango, unoyita here kuti Mwari asareremejwa?

²⁴ Ngokuti zina ra Mwari rinotukwa pakati po vo majinja ngo ndava yenyu, kudari ngo zvakatahwa.

Ngowapi mutengo wo kuchekwa

²⁵ Ngokuti ngo gwinyiso kuchekwa kunobesera kudari uri muiti wo mupango; asi kudari uri muguri wo mupango, kuchekwa kwako kunoita inga usikazivi kuchekwa.

²⁶ Ndizvo kudari avo vasikazivi kuchekwa vechingwarira zviemeso zvo mipango, kusikachekwi kwavo akuzoverengwi here kuti kuchekwa?

²⁷ Ndizvo kudari avo vasikazivi kuchekwa kuri chibarihwe, kudari kwechizarisa mupango, akuzokutongi iwewe here, uno zina no kuchekwa, asi unogura mupango?

²⁸ Ngokuti andiyepi mujudha akadi uwo uri wakadaro ngokunja; andikwopi kuchekwa, ukwo kuri kwo kunja kwo muviri.

²⁹ Asi uri mujudha uri wakadaro ngo mukati; no kuchekwa kuri ukwo kwo mu mwoyo, mu mweya, andikwopi kwo zina; kukujwa kwake andikwopi kuri kwo vandhu, asi kuri kwa Mwari.