Varoma 16 - NOVO TESTAMENTO EM NDAU

Muchungamijo no zvikonokejo

¹ Ndinokohomejisisa kwomuri Febe ndiyo hanzvaji yedu iri mushandiri wo chiara chiri mu Kenkeriya;

² kuti mumuashire kuna Mambo, ngo njira inosisira vakacheneswa, nokuti mu mubesere ngo izvo zvese zvaanotama kubesehwa ndizvo ndimwi; ngokuti iye ambhwine wakayita mubeseri wo vazhinji, no weininiwo.

³ Tambisanyi Prisira na Akwira, vadoni vangu mukushandira Kristu,

⁴ avo ngo ndava yo ndaramo yangu vakarajika pasi misipa yavo; kwavari andinipi ndega ndinovabonga, asi zviara zvese zvo vo majinja.

⁵ Tambisanyizve vo chiara chiri mu nyumba yavo. Tambisanyi Epineto mudikani wangu, uri mutendi wokutanga kuna Kristu mu Aziya.

⁶ Tambisanyi Mariya, uwo wakamushandira kakurutu.

⁷ Tambisanyi Anduroniko na Juniya, hama jangu, no vadoni vangu muubhanditi, avo vane mbirikira mukati mwo vapostori, vayiva kuna Kristu kutangira inini.

⁸ Tambisanyi Ampriata mudikani wangu kuna Mambo.

⁹ Tambisanyi Ubhani mudoni wedu mukushandira Kristu, na Staku mudikani wangu.

¹⁰ Tambisanyi Aperesi unotendwa kuna Kristu. Tambisanyi avo vari vo mbhuri ya Aristobhuro.

¹¹ Tambisanyi Herodhioni, hama yangu. Tambisanyi avo vo mbhuri ya Nakiso, vari kuna Mambo.

¹² Tambisanyi Trufena na Trufosa, avo vanoshandira kuna Mambo. Tambisanyi Persidha mudikani, wakashandira Mambo kakurutu.

¹³ Tambisanyi Rufo, wakatsanangurwa ndi Mambo, na mayi wake, no vanguvo.

¹⁴ Tambisanyi Asukrita, na Frigonta, na Hermesi, na Patroba, na Hermasi, no hama yavo.

¹⁵ Tambisanyi Firorogo, na Juriya, na Neriya hanzvaji yake, na Orimpa, no vakacheneswa vese vaanogara navo.

¹⁶ Chingamijananyi umwe no umweni ngo muromo ngo njira yakachena. Zvese zviara zva Kristu zvinomutambisa.

¹⁷ Zvino ndapota kwomuri, hama, ngwariranyi avo vanomusa kuparajana, no zvinokhugunisa, zvakapesana no izvo zvo mwakajijiswa, mubve kwavari.

¹⁸ Ngokuti avo vari vakadaro avashandiri Mambo wedu Jesu Kristu, asi vanoshandira ndani yavo; na ngo kuvereketa kwavo kwakaserera kwakanaka, vanochengeja mwoyo yo avo vari vasina ndava.

¹⁹ Ngokuti kupurutana kwenyu kwakazwika kuno vandhu vese. Ndizvo ndinodakara ndimwi: Asi ndinoda kuti mungware kuno izvo zvakanaka, zve, musina ndava kuno izvo zvakashata.

²⁰ Mwari wo kunyarara unozochangaja Sathani pasi po tshoka jenyu ngokukasira. Nyasha ja Mambo wedu Jesu Kristu ngajive nemwi. Ameni!

²¹ Timoti, mudoni wangu mukushanda, unomutambisa; na Rukiyo, na Jasoni, na Sosipatro hama jangu.

²² Inini Tetiyo uwo unotara tshamba iyi, ndinomutambisa kuna Mambo.

²³ Gaiyo unondiashira, no vo chiara vese, unomutambisa, Erastu mungwariri wo upfumi hwe dhoropa, unomutambisa, zve, no hama Kwato unomutambisa.

²⁴ Nyasha ja Mambo wedu Jesu Kristu, ngajigare nemwi mwese. Ameni!

Kukuja Mwari

²⁵ Zvino kwaari unosimba ro kugwinyisa kudari ngo vhangeri rangu no kuchumaihwa kwa Jesu Kristu, kudari ngo kupangijihwa kwe chakafishika chakangwaririhwa mukunyarara kubvira mukutanga kwo kusikwa kwo nyika, asi zvino chapangijirwa,

²⁶ ngo matahwa ovaprofeti, kudari ngo mupango wa Mwari wo mbhera narini, chinoziviswa kuno vo majinja ese kuyita kuti apurutane ngo kugonda;

²⁷ kuna Mwari ega unokuziva, ndiye Jesu Kristu, kwaari ngakuvapo uthende kunoti mbhera narini. Ameni!