Varoma 13 - NOVO TESTAMENTO EM NDAU

Kupfavira majimambo

¹ Mundhu wese ngaapfavire majimambo anotonga panyezuru pake; ngokuti akuna umambo usikazivi kugajwa ndi Mwari; naao aripo akagajwa ndi Mwari.

² Ndizvo iye unoemesejana na mambo, unorwisana no chiyimo cha Mwari: Naavo vanorwisana vanozotongwa.

³ Ngokuti vatongi avatyisi kwavari vanoyita mishando yakanaka, asi kwevanoita yakashata. Unoda here kuyita usikatyi mambo? Ita zvakanaka newe unozokujwa ndiye.

⁴ Ngokuti iye uri mushandiri wa Mwari kwouri unokuitira zvakanaka. Asi kudari wechiyita zvakashata, ityai; ngokuti iye aateri kutwara shoti pasina chiro: Ngokuti uri mushandiri wa Mwari muhwirijiri wo ushungu kuno uwo unoyita zvakashata.

⁵ Ndizvo kunosisira kuti mupfavire, haiwa ngo ndava yo kutambujwa kwega, asi ngo mumwoyo.

⁶ Ngo iyi ndava mworipazve shangu; ngokuti avo vari vashandiri va Mwari vanogara vechiita izvi.

⁷ Ipanyi kwavari vese izvo zvinovasisira: Shangu kwavari vo shangu, murimwa kwavo vo murimwa; mwechitya vanotyiwa; reremejanyi avo vanosisira kureremejwa.

Rudo ku muvakihwana

⁸ Musava no gava ro chiro ku mundhu, kwega kuti mudane umwe no umweni, ngokuti iye unomuda muvakihwana wake wakazarisa Mipango.

⁹ Ngokuti izvi zvinoti: Usazoomba, usazouraya, usazoba, usazoemura, nokudari uripo umweni mupango unoverengwa no izwi iri, rokuti, unozomuda muvakihwana wako kudari ngozvounojida iwewe.

¹⁰ Rudo arushandi zvakashata kuno muvakihwana. Ndizvo rudo ruri kuzarisa Mipango.

Kupona kupsha muna Kristu

¹¹ Nemwi munoziva mukuvo kuti zvino yaanguva yokuti mumuke muhope; ngokuti zvino ruponeso rwedu rwaaphedo kwetiri kuno mukuvo wo takatenda.

¹² Usiku woda kupera, kueja kwaphedo; ndizvo ngatirashe mishando yo chidima, ngatipfeke zvokurwa ndizvo, zviri zvokujeka.

¹³ Ngatifambe ngo njira inosisira, kudari ngo masikati; tisikafambi ngo kuhisa no kuraja, tisikafambi ngo kushanja, nokuti ngo kuemura, tisikafambi ngo hasha no ndurumwa.

¹⁴ Asi mupfeke Mambo Jesu Kristu, musikapinimiji ngo zvo nyama kuyita kuemura kwayo.