Varoma 12 - NOVO TESTAMENTO EM NDAU

Kupona mu mushando wa Mwari

¹ Ndizvo ndinomupota, hama, ngo nyasha ja Mwari, kuti mupire muviri yenyu kuti iite mudiro unopona, wakachena unoashirika kuna Mwari, uri mushando wenyu wo kudira unoshwiro.

² Zve, musateveja zvo iyi nyika, asi mwechitsandujwa ngo kumusihwa kwo mupinimijo wenyu, kuti mueje kuyita icho chiri kuda kwa Mwari, chiri chakanaka, no chinoashirika, no chakaperera.

³ Ngokuti ndinonanga ngo nyasha jakapuwa kwendiri, kuno mundhu wese uri pakati penyu, kuti asajikuja ngo kupinimija kupinda ukwo kunosisira; asi kuti ajipinimijire ngo kungwara, kudari ngo zvaakapa Mwari kuno mundhu wese chipimo cho kutenda.

⁴ Ngokuti kudari ngo zvotinajo ndhengo jakawanda jo muviri umwe, ndhengo jese ajina mushando umwewo akadi.

⁵ Ngokudaro isisu tiri vazhinji tiri muviri umwe kuna Kristu, umwe ngaumwe tiri ndhengo imwe kuno umweni.

⁶ Saka kwechivoneka kuti tine zvipuwo zvakaparajana, kudari ngo nyasha jakapuwa kwetiri, kudari chiri cho kuprofeta, ngatiprofete kudari ngokukura kwo kugonda kwedu.

⁷ Nokuti kudari chiri cho kushandira, ngatijipire mukushandira; nokuti iye unojijisa, ngaajipire mukujijisa;

⁸ nokuti iye unopanga, ngaajipire mukupanga: Iye unokovera, ngaayite ngo kusikanyimi; iye unotonga ngaatonge ngo kungwara; iye unoitira nyasha ngaayite ngo kudakarira.

Rudo rwo gwinyiso

⁹ Rudo ngaruite rusina kujiitisa. Nyenyanyi izvo zvakashata; namatiranyi kuno izvo zvakanaka.

¹⁰ Disananyi umwe kuno umweni ngo rudo rukuru; mureremejane umwe kuno umweni;

¹¹ mukushanda musaita nungo: Itanyi vanopisa muMweya; mwechishandira Mambo.

¹² Itanyi vanodakara mukugonda; musengerere mu matambujiko; mwechivangirira mukukumbira;

¹³ koveranyi no vakacheneswa zvovanotama; itanyi vanoashira vapfumba.

¹⁴ Vadakajisenyi vanomutambuja; vadakajisenyi, musavatuka.

¹⁵ Dakaranyi navo vanodakara; mwechichema naavo vanochema.

¹⁶ Muve no mupinimijo umwewo umwe kuno umweni. Musapshaka zvino mbirikira, asi mwechifambisana pamwepo no vakapfava; musajiita vakangwara mu mipinimijo yenyu.

¹⁷ Musahwirijira ku mundhu kushata, ngo ndava yo kuitihwa zvakashata. Pshakanyi izvo zvinoreremejeka mukuvona kwo vandhu vese.

¹⁸ Kudari kungaitika, zvomunokona, garanyi mukunyarara no vandhu vese.

¹⁹ Musajihwirijira pachenyu, vanodikana, asi taraukiranyi ushungu hwa Mwari; ngokuti kwakatahwa kuti: Kuhwirijira kuri kwangu; inini ndinozohwirijira, unonanga Jehovha.

²⁰ Asi kudari mukorore wako unonjara, mupeyi zvokuha; kudari uno nyota, mupeyi zvokumwa; ngokuti ngokuyita kudaro unozounganija masimbe anopisa o muriro panyezuru po musoro wake.

²¹ Musanyiswa ngo kushata, asi nyisanyi kushata ngo kunaka.