Varoma 11 - NOVO TESTAMENTO EM NDAU

Vatsanaguhwa vo Israeri

¹ Ndizvo ndinoti, Mwari wakarasha vandhu vake here? Haiwa! Ngokuti ininivo ndiri muIsraeri, wo mibarihwana wa Abrahama, wo jinja ra Benjamini.

² Mwari aazivi kurasha vandhu vake vaakatsanangura pakutanga. Nokuti amuzivi here icho chaanonanga matahwa ndi Erija? Ngo njira yaakapota ndiyo kuna Mwari kuitira vaIsraeri ndava, echiti:

³ “Mambo, vakauraya vaprofeti vako, vakapwanyira pasi maaltari ako; neni ndini ndega ndasara, navo vachapshaka kundiuraya.”

⁴ Asi mupinguro wa Mwari unoti kudini kwaari? Ndakajisiira zviuru zvinomwe (7.000) zvo vandhu vasikazivi kugwadama ngo makokobvi avo kuna Bhaari.

⁵ Ndizvo ngokudaro ngo mukuvo uno, varipo vakasara kudari ngo kutsananguhwa ngo nyasha jake.

⁶ Asi kudari kuri kwo nyasha, akuchiri kwo mishando akadi: Zvakadaro nyasha ajichaiti nyasha.

⁷ Ndizvo chinyi? Icho chaakapshaka Israeri aazivi kuchiwana; asi vakatsananguhwa vakachivona, no vamweni vakakonjiswa.

⁸ Kudari ngo zvakatahwa: “Mwari wakavapa mweya wo kukangaijwa, wakavapa majiso okuti vasavona, no njeve jokuti vasazwa, mbhera kuguma kune iri zuva.”

⁹ Dhavhidha unoti: “Thafura ravo ngariite murau, no chirimbana, no chikhugunyiso, no chiunzijiro kwavari.”

¹⁰ Majiso avo ngaaitiswe chisiku, kuti vasavona, uvakotamise misana yavo nguva jese.

Kuponeswa kwo vo majinja

¹¹ Ndizvo ndinoti, vakakhugunywa here kuti vawe? Haiwa! Asi ngokuwa kwavo ruponeso rwakaviya kuno vo majinja, kuvamusira ndurumwa.

¹² Zvino, kudari kuwa kwavo kuri upfumi hwo vo nyika, no kurashikihwa kwavo kuri upfumi hwo majinja; kuzara kwavo kunozopinda kwakaitawani?

¹³ Asi ndinovereketa kwomuri muri vo majinja, kwechivoneka kuti ndiri mupostori kuno vo majinja, ndinokurisa mushando wangu.

¹⁴ Kuti pamweni ndingayita kuti ndimusire ndurumwa vandhu vangu, no kuponesa vamweni vavo.

¹⁵ Ngokuti kudari kurashwa kwavo kuri kuiyaniswa kwo nyika, kuashirwa kwavo kunozoita kwakadini, akuiti kumuswa here kwo vakafa?

¹⁶ Nokudari mutanguro wo hlama uri wakachena, makanywa ari akachenavo; nokudari muji uri wakachena, matavi ari akachenavo.

¹⁷ Asi kudari matavi amweni akagurwa, newe, uri muorivhe wo mushango, wakabatanijwa mukati mwawo, ukaashira nawo kunaka kwo muorivhe;

¹⁸ usaganzira matavi; asi kudari wechiganza, andiwepi unotwara miji, asi miji jinotwara iwewe.

¹⁹ Ndizvo iwewe unozoti, matavi akagurwa kuti inini ndibatanijwe.

²⁰ Zvakanaka; akagurwa ngo ndava yo kugononda kwawo, newe unoyima ngo kugonda. Usajikuja mumupinimijo wako, asi itya.

²¹ Ngokuti kudari Mwari asikazivi kuregera matavi epo, zve, aazokuregeri newe.

²² Ndizvo ringira nyasha no ushungu hwa Mwari: Kwavari vakawa, kwakapangijihwa ushungu; asi kwouri kwakapangijihwa nyasha ja Mwari, kudari wechizovangirira kugara munyasha jake. Usikadaro, ungazotemwa newe.

²³ Navo, kudari vasikagari mukugononda kwavo, vanozobatanijwa; ngokuti Mwari uno simba ro kuvabatanijazve.

²⁴ Ngokuti kudari iwewe watemwa kubva ku muorivhe wo mushango ngo chibarihwe, newe wakabatanijwa, ngo njira yakaparajana no chibarihwe, mukati mwo muorivhe wakanaka: Kunozopinda kwakaitawani awo ari epo, kuti abatanijwe ku muorivhe wao?

Kuponeswa kwo vaJudha

²⁵ Ngokuti andidi, hama, kuti muyite vasikazivi ngoichi chakafishika, kuti musajiita vakangwara mu mipinimijo yenyu, kuti vaIsraeri vakagumihwa ngo kutindivara kwo mwoyo, mbhera kugume kuzarisika kwo nguva yo vo majinja.

²⁶ Ndizvo vaIsraeri vese vanozoponeswa kudari ngo zvakatahwa: “Kunozobuda Mununuri mu Zioni; iye unozobvisa kushata kuna Jakobe.

²⁷ No ichi chiri chitenderano changu kwavari, apo ndozobvisa zvishaishi zvavo.”

²⁸ Ngo ndava yo vhangeri, vari vakorore ngo ndava yenyu; asi ngo ndava yo kutsananguhwa, vari vanodikana ngo ndava yo majibaba.

²⁹ Ngokuti zvipo no kudanijwa ndi Mwari zviri zvisikakunukuki.

³⁰ Ngokuti kudari ndimwi ngo mikuvo yakapinda mwaiya vasikapurutani kuna Mwari, asi zvino mwakawana nyasha ngo kusikapurutani kwavo,

³¹ ngokudaro avo navo zvino vari vasikapurutani, kuti ngo nyasha ijo jakapangijihwa kwomuri, avo navo vangawana nyasha zvino.

³² Ngokuti Mwari wakavakonyera vese mukusikapurutana, kuti avaitire nyasha vese.

³³ A, kujika kwazvo, zvese upfumi no ungwaru no kuziva kwa Mwari zvitongero zvake azvingapshakisiswi, no njira jake ajingakonwi kurondwa.

³⁴ Ngokuti ndiyani wakaziva mupinimijo wa Mambo? Nokuti ndiyani wakayita mupangi wake?

³⁵ Nokuti ndiyani wakamukovera kutanga, nakwo kunozohwirijihwazve kwaari?

³⁶ Ngokuti zviro zvese zvinobva kwaari, zviripozve ndiye, zviri zvake, kwaari ngakuapo uthende husikaperi. Ameni!