Varoma 10 - NOVO TESTAMENTO EM NDAU

Vajudha vanoramba kururama kwa Mwari

¹ Hama, chidisiso cho mwoyo wangu, no kukumbira kwangu kuna Mwari ngo ndava yo vaIsraeri chiri kuti vaponeswe.

² Ngokuti ndinovaitira chapupu kuti vanotsamwirira kuna Mwari, asi vanoyita ngo kusikaziva.

³ Ngokuti ivo vasikazivi kururama kwa Mwari, vechipshaka kugwinyisa kururama kwavo, avazivi kujipfavisa mukururama kwa Mwari.

⁴ Ngokuti Kristu uri magumisiro emipango kuyita kururama kuno mundhu wese unotenda.

Kuponeswa kuna vese vanotenda

⁵ Ngokuti Mosi unotara kuti: “Mundhu unoyita kururama kwo mipango, unozopona ndiyo.”

⁶ Asi kururama ukwo kunobva mukugonda kunanga kuti: Usavereketa mu mwoyo mwako kuti, ndiyani unozokwira mu denga (ukwo kunoti, kubzusa Kristu)?

⁷ Nokuti, ndiyani unozobzuka mukujika, (ukwo kunoti, kumukwija Kristu kubva kwo vakafa)?

⁸ Asi zvinonangenyi? Izwi riri phedo pako, riri mumuromo mwako, no mu mwoyo mwako: Ukwo kunoti, izwi ro kugonda ro tinochumaira.

⁹ Ngokuti kudari wechipupura Mambo Jesu ngo muromo wako, no kutenda mu mwoyo mwako kuti Mwari wakamumusa kwo vakafa, unozoponeswa.

¹⁰ Ngokuti mundhu unotenda ngo mwoyo kuano kururama; na ngo muromo unopupura kuano kuponeswa.

¹¹ Ngokuti matahwa anoti, iye unomutenda aazopsherujwi akadi.

¹² Ngokuti akuna muparajaniso pakati po mujudha no mugiriki; ngokuti Mambo ndiye umwewo uri Mambo wavo vese, unoupfumi wo kupa kwavari vese vanokumbira kwaari.

¹³ Ngokuti pikija ndiyani unokumbira ngo zina ra Mambo unozoponeswa.

¹⁴ Ndizvo vangazoita makumbirirenyi kwaari uwo wo vasikazivi kutenda? Zve, vangazoita matenderenyi kwaari uwo wo vasikazivi kuzwa ndiye? Zve, vangazoita mazwirenyi kusina muchumairi?

¹⁵ Vangazoita machumairirenyi kuti vasikazivi kutumwa? Kudari ngo zvakatahwa: “Manakirenyi akayita tshoka javo vanoteketesa vhangeri ro kunyarara, avo vanoteketesa masoko ozviro zvakanaka.”

¹⁶ Asi vese avazivi kupurutana ku vhangeri. Ngokuti Isaya unoti: “Jehovha, ndiyani wakatenda chumairo redu?”

¹⁷ Ndizvo kugonda kunoviya ngo kuzwa no kuzwa kuri ngo mazwi a Kristu.

¹⁸ Asi ndinoti, avazivi kuzwa here? Eya ngo gwinyiso, ngokuti izwi ravo rakabuda kuenda ku nyika jese, no mazwi avo akaguma kumagumo onyika.

¹⁹ Asi ndinoti, vaIsraeri avazivi kuziva here? Kutanga Mosi unoti: “Ndinozomusira ndurumwa ngaavo vasiri jinja akadi, ngo jinja risina kuziva ndinozomutsenekesa.”

²⁰ Na Isaya unoshinga kakurutu, unoti: “Ndakavoneka kwavari vasikazivi kundipshaka; ndakapangijihwa kwavari vasikazivi kubvunjisa ndini.”

²¹ Asi ku vaIsraeri unoti: Zuva rese ndakatambanujira nyara jangu kuno vandhu vasikapurutani, no vanokanija.