Varoma 1 - NOVO TESTAMENTO EM NDAU

Kuchungamija

¹ Pauri, muranda wa Jesu Kristu, wakadanijwa kuti ayite mupostori, wakaparajanisihwa vhangeri ra Mwari,

² iro raakagondisa kare ngo vaprofeti vake ngo Matahwa Akachena,

³ ngo ndava yo Mwana wake, wakabahwa ari wo ruji rwa Dhavhidha ngo kwenyama,

⁴ akapangijihwa ngo kugwinyisisa kuti uri Mwana wa Mwari kudari ngo Mweya Wakachena, ngo kumuka kwavakafa, eya, Jesu Kristu Mambo wedu,

⁵ ndiye takaashira nyasha no upostori, ngo kupurutana kwo kugonda mukati mwo majinja ese ngo ndava yo zina rake,

⁶ mukati mwaao imwimwivo mwakadanijwa kuyita va Jesu Kristu.

⁷ Kwaavo vese vari mu Roma, vanodikana ndi Mwari, mwakadanijwa kuyita vakacheneswa: Nyasha kwomuri, no kunyarara kunobva kuna Mwari Baba wedu na Mambo Jesu Kristu.

Mukumbiro wo kubonga

⁸ Kutanga, ndinobonga Mwari wangu, ndiye Jesu Kristu ngo ndava yenyu mwese, kuti kugonda kwenyu kunovereketwa ndikwo mu nyika jese.

⁹ Ngokuti Mwari uri chapupu changu, wo ndinoshandira mu mweya wangu muvhangeri ro Mwana wake, kuti andiregi kumucherecheja ngo nguva jese mumikumbiro yangu,

¹⁰ ndechikumbira ngo nguva jese kuti pikija zvakadini, zvino, ndingapfumiswa ngo kuda kwa Mwari kuti ndiviye kwomuri.

¹¹ Ngokuti ndine chisuwo chokuti ndimuvone, kuti ndingakovanisirana nemwi chipuwo cho mweya, kuti mugwinyiswe.

¹² Kunanga kuti inini naimwimwi tingaembezehwa tese ngo kugonda kwo umweni, kwese kwenyu no kwangu.

¹³ Ndinoda kuti muzive, hama, kuti kazhinji ndakaemesa kuti ndiviye kwomuri, (asi ndakaphingwa mbhera zvino), kuti ndive no michero pakati penyu, kudari ngo zve ndinayozve ku majinja amweni.

¹⁴ Ndine gava kwavari vese vagiriki no vasikatendi, kwavari vese vakangwara no vasikazivi kungwara.

¹⁵ Ndizvo kudari ngo zvo ndinokona, ndakasisira kuteketesa vhangeri kwomurizve muri mu Roma.

Simba ro vhangeri

¹⁶ Ngokuti andina nyowa ngo vhangeri; ngokuti riri simba ra Mwari ro ruponeso kwavari vese vanotenda, kutanga ku vaJudha, no ku vagiriki navo.

¹⁷ Ngokuti ndiro kunopangijihwa kururama kwa Mwari kubva kwo kugonda kuenda mukugonda; kudari ngo zvakatahwa: “Asi wakarurama unozopona ngo kugonda.”

Ndava yo vandhu vese

¹⁸ Ngokuti ushungu hwa Mwari hunopangijihwa hwechibva mu denga kurwa nazvo zvese zvisikasisirani na Mwari, na ngo kusikarurami kwo vandhu, vanotsikirira gwinyiso ngo kusikarurama.

¹⁹ Ngokuti izvo zvinozivikanwa ndi Mwari zvinovoneka mukati mwavo. Ngokuti Mwari wakajipangijira kwavari.

²⁰ Ngokuti zviro zvake zvisikavoneki, kubvira mukusikwa kwo nyika, zvinonasa kuvoneka, zvechizivikana kudari ngo zviro zvakasikwa, kunoti, simba rake ro mbhera narini, no Umwari hwake; kuti ngokudaro vayite vasina cho kutenda ndava.

²¹ Ngokuti, vechimuziva Mwari, avazivi kumukurisa kudari ngo zvayiva Mwari, zve, avazivi kumubonga, asi vakayita vasina shwiro mu mipinimijo yavo, no mwoyo yavo isina kungwara yakayita chidima.

²² Vechijiitisa kuti vari vakangwara, vakayita mapenji,

²³ vakatenganisa uthende hwa Mwari husikavori kuti vaashire muemo wo muezaniso wo mundhu unovora, no wo shiri, no wo zvinyama zvino mirenje mirongomuna, no wo zvinogwezva.

²⁴ Ndizvo Mwari wakavaregera mukuemura kwo mwoyo yavo, kuti vayite vane svina, kuti vajishaishire miviri yavo.

²⁵ Ngokuti vakatenganisa gwinyiso ra Mwari kuashira manyepo, vakadira no kushandira icho chakasikwa paugaro po Musiki, uwo unomuchena mbhera narini. Ameni!

²⁶ Ngo iyi ndava Mwari vakavaregera kuti vave no kuemura kunopsheruja. Ngokuti no vakaji vavo vakapinduja chibarihwe chavo kuyita icho chinopesana no chibarihwe chavo,

²⁷ ngokudaro vanarume navo vechiregera chibarihwe no vanakaji, vakapsha mukuemura kwavo umwe kuno umweni, vanarume vechiita no vanarume izvo zvisikasisiri, vechiashira mukati mwavo ukwo kuthuswa kunosisira kupauka kwavo.

²⁸ Nokudari ngo zvevasikazivi kutenda kuti vaana Mwari mukuziva kwavo, Mwari wakavaregera kuti vave no kupinimija kunonyangaja, kuti vayite izvo zviro zvisikasisiri.

²⁹ Vechizajwa ngo kusikarurami kwese, no kuomba, no kushata, no kuemura, no khururu; vakazajwa ngo ndurumwa, no kuuraya, no hasha, no kuchengeja, no kushatisisa, no kushora.

³⁰ No kuchonyongora, no kumunyenya Mwari, no kudada, no kujikuja, no kuganza, no kutanda zvakashata, no kusikapurutana vabari,

³¹ vasikazwisisi, vaguri vo zvitenderano, vasina rudo kuno hama, vasina nyasha;

³² avo vechiziva chiemeso cha Mwari, chokuti avo vanoyita zvakadaro vanosisira kufa, avateveri kuyita izvi zvega, asi vanotenderazve naavo vanogara vechizviita.