Vakorose 4 - NOVO TESTAMENTO EM NDAU

¹ Majimambo itiranyi varanda venyu izvo zvakanaka no zvinoezana; mwechiziva kuti imwimwivo muna Mambo mu gore.

Zvijijiso

² Vangiriranyi mukukumbira, mwechirinda murimwo ngo kubonga;

³ pamwepo no izvi mwechitikumbiriravo kuti Mwari atibewurire musuvo wo izwi, kuti tiverekete chakafishika cha Kristu, chondiri muzvisungo ngo ndava yacho;

⁴ kuti ndichipangijire kudari ngo zvinosisira kuti ndiverekete.

⁵ Fambanyi muungwaru kwavari vari kunja mwechitenga mukuvo.

⁶ Kuvereketa kwenyu ngakuve no nyasha nguva jese, kwechirungwa ngo munyu, kuti muzive njira inosisira kupingurana ndiyo umwe kwo umweni.

Muchungamijo yo kupejisira

⁷ Tukiko unomuzivisa zvese zvangu, uwo uri munukuna unodikana no mushandi unogondeka, uri muranda pamwepo neni kuna Mambo.

⁸ Wondakatumira kwomuri ngo iyi ndava, kuti muzive ngokugara kwedu, zve, kuti iye aembezere mwoyo yenyu;

⁹ pamwepo na Onesimo uwo uri munukuna unogondeka no unodikana, uri umwe wenyu. Avo vanozomuzivisa zvese zvinoitwa kuno.

¹⁰ Aristaku musungwa pamwepo neni unomutambisa, na Marku muzukuru wa Bharnabha mwakaashira kupangwa ngo ndava yake; kudari echiguma kwomuriyo mumuashire.

¹¹ Na Jesu unozwi Justu, uri waavo vakachekwa; Avo ndivo vega vashandi pamwepo neni mu uMambo hwa Mwari, navo vakandiembezera.

¹² Epafrasi, umwe wenyu, muranda wa Kristu Jesu, unomutambisa, nguva jese echimutambujikira mukukumbira kwake, kuti muime mwakaperera mwechiziva ngo gwinyiso icho chiri kuda kwa Mwari.

¹³ Ngokuti ndinoita chapupu ndiye kuti unomushandira kakurutu, naavozve vari mu Raodhikiya no vari Hirapori.

¹⁴ Ruka, murapi unodikana, na Dhemasi vanomutambisa.

¹⁵ Tambisanyi hama jiri mu Raodhikiya, na Nyumufani, no chiara chiri mu nyumba yake.

¹⁶ Naapo iyi tshamba ikajijwa pakati penyu, itanyizve kuti ijijwe muchiara cho vaRoadhekiya; kuti neimwivo mujije tshamba inobva Roadhekiya.

¹⁷ Bvunjanyi kudaro kuna Akipo, kuti, ngwarira upejise mushando wo wakaashira kubva kuna Mambo.

¹⁸ Uku ndikwo kutambisa kwangu, inini Pauri ngo nyara yangu yambhwine. Cherechejanyi zvisungo zvangu. Nyasha ngajigare nemwi.