Vakorose 3 - NOVO TESTAMENTO EM NDAU

¹ Ndizvo kudari mwakamuswa mukufa pamwepo na Kristu pshakanyi izvo zviri panyezuru, apo pana Kristu akagara ngo kumuho kwa Mwari.

² Emesanyi mupinimijo ngo izvo zviri panyezuru, musikapinimiji ngo izvo zviri munyika.

³ Ngokuti imwimwi mwakafa, no kurarama kwenyu kwakafishwa pamwepo na Kristu kuna Mwari.

⁴ Apo Kristu, uwo uri kurarama kwedu oovoneka, munozovonekavo pamwepo naye muuthende.

Ndaramo ipsha kuna Kristu

⁵ Ndizvo urayanyi zviemuriro zvenyu zvo nyika: Kuomba, kusikasukiki, kuemura kwo muviri, kudisisa zvakashata no kuemura pfuma, ukwo kuri kudira miezaniso.

⁶ Ngo ndava yo izvi zviro ushungu hwa Mwari unogumira vana vokusikapurutani;

⁷ Kwozviri imwimwivo mwakafamba mukati mwazvo karetu apo muchagara mukati mwazvo.

⁸ Asi zvino rashanyivo zvese izvi; kutseneka, ushungu, kuvenga, kutuka, no kuvereketa zvinopsheruja ngo miromo yenyu.

⁹ Musanyeperana, kwechivoneka kuti mwakarasha mundhu wokare no zviito zvake,

¹⁰ nemwi mwakasimira mundhu mupsha uwo unotsandujwa mukuziva kuti aezane no mutojaniso wo uwo wakamusika.

¹¹ Apo apachinazve mugiriki, nokuti mujudha wakachekwa, nokuti usikazivi kuchekwa, kuti wo mu nyikanja, nokuti musitiya, hloko, nokuti wakasununguka, asi Kristu uri zvese, naye uri mukati mwavo vese.

¹² Ndizvo simiranyi, kudari ngo zvomuri vakatsananguhwa ndi Mwari, no vakacheneswa no vanodikana, muno mwoyo wo kuzwira, no kukungurira, no kuzvininipisa, no kupfava, no kusengerera;

¹³ mwechisengerera umwe no umweni, mwechiregererana, kuti aripo mundhu une ndava kuno umweni, nokudari ngo zvaakamuregerera Mambo imwimwi, itanyi kudaro nemwivo.

¹⁴ Kupinda izvi zvese simiranyi rudo, ruri chisungo cho kuperera.

¹⁵ Tenderanyi kuti kunyarara kwa Kristu kutonge mu mwoyo yenyu; ukwo kwo mwakadanijihwazve ndiko mumuviri umwe; mwechibonga.

¹⁶ Izwi ra Kristu ngarigare mukati mwenyu ngo kuwanjiswa muungwaru hwese; mwechijijisana no kupangana umwe no umweni, ngo nduyo, no ngoma, no kuemba kwo Mweya, mwechiemba mune nyasha mumwoyo yenyu kuna Mwari.

¹⁷ Pikija chinyi cho munoyita ngo izwi nokuti ngo mushando, itanyi zvese ngo zina ra Mambo Jesu, mwechibonga kuna Mwari Baba ndiye.

Magariro ovakristu pamuzi

¹⁸ Vakaji, pfaviranyi kuvarume venyu, kudari ngo zvinosisira vari kuna Mambo.

¹⁹ Varume, idanyi vakaji venyu, musaita ushungu kwavari.

²⁰ Vana, purutananyi vabari venyu, ngo zviro zvese, ngokuti ichi chinodakaja Mambo.

²¹ Majibaba musatsenekesa vana venyu, kuti vasazopera simba.

²² Varanda, purutananyi ngo zviro zvese kuna avo vari majimambo enyu ngo kwenyama; haiwa kushanda ngo kurindwa, kunonga vanodakajisa vandhu, asi mune chidisiso chimwe cho mwoyo mwechitya Mambo.

²³ Pikija chinyi chomunoyita, shandanyi ngo mwoyo, kunonga munoshandira kuna Mambo, haiwa vandhu;

²⁴ mwechiziva kuti munozoashira musharo wo ndhaka kubva kuna Mambo; ngokuti munoshandira Mambo Kristu.

²⁵ Ngokuti iye unoita zvakashata unozoashirazve zvakashata zvaakaita; akuna kutsanangura vandhu.