Vakorose 2 - NOVO TESTAMENTO EM NDAU

¹ Ngokuti ndinoda kuti muzive kuti kukura kwakaitawani kwo kutambujika kwendinakwo ngo ndava yenyu na ngo ndava yaavo vari mu Raodhikiya, na ngo aavo vese vasati vatongovona hope yangu ngo kwo muviri;

² kuti mwoyo yavo iembezehwe, vechibatana pamwepo murudo no muupfumi hwese hwo kugonda hwakaperera hwo kuzwisisa, kuti vazive chakafishika cha Mwari, chiri Kristu,

³ kwaari kwakafishwa upfumi hwese hwo ungwaru no hwo kuziva.

⁴ Ndinonanga ichi, kuti musazochengejehwa ngo mundhu ngo kuongwa kwo kuvereketa.

⁵ Ngokuti pikija ndisipo ngo muviri, asi ndinemwi mumweya, ndechidakara, ndechiringira kuzwana kwenyu, no kugwinya kwo kugonda kwenyu kuna Kristu.

Ndaramo kuna Kristu

⁶ Ndizvo kudari ngo zvomwakaashira Kristu Jesu Mambo, fambanyi kudaro mukati mwake.

⁷ Muri vakajimikwa no kuvakwa mukati mwake, mwechigwinyiswa mukugonda kwenyu, kudari ngo zvo mwakajijiswa, mwechiwanjwa mukubonga.

⁸ Ngwariranyi kuti asazovapo mundhu unomushaishira ngo urimbwi hwake, no kuchengeja ngo zvisina shwiro, no kutevera zvirovejeso zvo vandhu, kudari ngo kujijisa kwo nyika asikateveri zva Kristu.

⁹ Ngokuti kuzara kwese kwo Umwari kunogara kwaari mumuviri.

¹⁰ Kwaari imwimwi muri vakaperera, uwo uri musoro panyezuru po umambo hwese, no panyezuru po vane simba;

¹¹ kwaarizve imwimwi mwakachekwa ngo kuchekwa kusiri kwo nyara, ngo kubviswa kwo muviri wo nyama, mukuchekwa ukwo kuri kwa Kristu;

¹² mwakavigwa pamwepo naye murubhapatiso, wo mwakamuswazve pamwepo naye ngo kugonda kwo kushanda kwa Mwari uwo wakamumusa kwo vakafa.

¹³ Nemwi apo mwayiva vakafa muzvishaishi zvenyu, no kusikachekwi kwo nyama yenyu uwo wakamumusa pamwepo naye echitiregerera zvishaishi zvedu zvese,

¹⁴ atsukutija chisungo chakatahwa cho mipango, icho chakatiitira ndava chinopesana nesu, naye wakachibvisa mu njira akachikohomera pa muchinjiko.

¹⁵ Naapo ayinga abvisa vatongi no vano simba, akavabudisa pambhene, echivanyisa ndiye.

¹⁶ Ndizvo musatendera mundhu kuti amutonge ngo ndava yo zvokuha, nokuti zvokumwa, nokuti ngo ndava yo mishongano yo kuha nokuti yo kugara kwo mweji, nokuti yo masabatha:

¹⁷ Izvo zviri bvuri ro zvinoviya; asi muviri ngo wa Kristu.

¹⁸ Musatendera mundhu kuti amurajikije ngo chipuwo chenyu ngo kujipfavisa ngamaune no kudira ngirosi, echibatisisa kune izvo zvaakavona, echijikuja kusina shwiro ngo mupinimijo wake wo nyama.

¹⁹ Asikabatiriri musoro, kweriri muviri wese unopakurihwa no kugwinyiswa ngo ndhengo no mijira, unokura ngo kukuriswa ndi Mwari.

Kufa no kupona na Kristu

²⁰ Kudari mwakafa na Kristu kubva kuzvijijiso zvo nyika, munojipfavisa ngenyi ngokungwarira zviemeso, kudari ngo vachapona ngo zvo mu nyika,

²¹ (izvo zvinoti musabata, nokuti kuravira, nokuti kupshasa;

²² izvi zvese zvinopera ngokushandiswa) kudari ngo mipango no zvijijiso zvo vandhu?

²³ Izvo zviro ngo gwinyiso zvinovoneka inga zvino ungwaru mukudira kwokuda, no kujipfavisa, na ngo kuregejera muviri; asi azvina simba ro kunyisa kuda kwo nyama.