Vakorose 1 - NOVO TESTAMENTO EM NDAU

Muchungamijo

¹ Pauri mupostori wa Kristu Jesu ngokuda kwa Mwari, na Timoti munukuna wedu,

² kwavari vakacheneswa no hama jakagondeka kuna Kristu vari mu Korose: Nyasha kwomuri no kunyarara zvinobva kuna Mwari Baba wedu.

Kubonga ngo zvipuwo zva Mwari

³ Tinobonga kuna Mwari Baba wa Mambo wedu Jesu Kristu, techimukumbirira ngo nguva jese,

⁴ ngokuti takazwa ngo kugonda kwenyu kuna Kristu Jesu, no rudo rwomunarwo kwavari vese vakacheneswa,

⁵ ngo ndava yo gonda iro rakagajikihwa imwimwi mu gore, ro mwakazwa ndiro karetu ngo izwi ro gwinyiso ro vhangeri,

⁶ iro rakaguma kwomuri kudari ngo zvoriri mu nyika yese, rechibereka michero yakawanda, kudari ngo zvorinoitazve kwomuri, kubvira kuiro zuva ro mwakazwa no kuziva nyasha ja Mwari ngo gwinyiso;

⁷ kudari ngo zvomwakajijazve kuna Epafrasi muranda pamwepo nesu, unodikana, uri mushandi unogondeka wa Kristu ngo ndava yenyu,

⁸ uwozve wakatizivisa ngo rudo rwenyu mu mweya.

Kukumbirira vatendi

⁹ Ngo iyi ndava nesuvo, kubvira kuzuva iro rotakazwa, atizivi kuregera kupota no kumukumbirira, kuti muzariswe ngo kuziva ngokuda kwake ngo ungwaru hwese no kuzwisisa kwese ngo Mweya,

¹⁰ kuti mufambe kudari ngo zvinosisira kuna Mambo mumudakajise ndizvo zvese, mwechibereka michero mumishando yese yakanaka, mwechikura mukumuziva Mwari;

¹¹ mwechigwinyiswa ngo simba rake, kudari ngokukura kwo simba ro uthende hwake, mbhera muve no kusengerera no kutsamwirira kwese ngo kudakara;

¹² mwechibonga kuna Baba uwo wakatiita vanosisira kukovanisihwa ndhaka yo vakacheneswa mukujeka;

¹³ uwo wakatinunura kubva ku simba ro chidima, wakatidira mu umambo hwo Mwana wake unodikana.

Kristu, mukuru wo zvese

¹⁴ Kwaari tinakwo kuripirwa ngo ngazi yake, no kuregerehwa zvishaishi zvedu;

¹⁵ uwo uri mutojaniso wa Mwari usikavoneki, uri dangwe ro zvakasikwa zvese;

¹⁶ ngokuti zviro zvese zvakasikwa ndiye, izvo zviri mu gore, no zviri mu nyika, zvinovoneka, no zvisikavoneki, pikija madendemaro, nokuti umambo, nokuti makota, nokuti vatongi, zvese zvakasikwa ndiye, nazvo zvakasikihwa iye;

¹⁷ iye unotangira zvese, no zvese zviripo ndiye.

¹⁸ Uri musoro wo muviri, kunoti, chiara; uri maambo, no dangwe ro kumuka kwo vakafa; kuti iye aite mukuru wo zviro zvese.

¹⁹ Ngokuti zvakadakaja Baba kuti kuzara kwese kugare kwaari;

²⁰ kubudikija ndiye aiyanisira zvese kwaari, ayinga aiyanisa ngo ngazi yo muchinjiko wake, pikija zviro zviri mu nyika, nokuti zviro zviri mu gore.

²¹ Nemwivo karetu mwayiva vo nyikanja no vakorore mukupinimija kwenyu mumishando yenyu yakashata,

²² asi zvino iye wakamuiyanisa ngo muviri wake wo nyama ngo kufa, kuti amutatije muri vakacheneswa no vasina ndava, musikashoreki pamberi, pake,

²³ kudari mwechindogara mukutenda mwakajimikwa no kugwinyiswa, musikatsukunuswi kubva mukugonda kwo vhangeri ro mwakazwa rakachumaihwa kune zvisikwa zvese pasi po mu denga; iro rondakaitwa mushandiri waro, inini Pauri.

Pauri unotambujikira chiara

²⁴ Zvino ndinodakara mukutambujika kwangu ngo ndava yenyu, ndechizajisa mu nyama yangu icho chakasarira cho matambujiko a Kristu mumuviri wangu ngo ndava yo muviri wake kunoti chiara.

²⁵ Icho chondakaitwa mushandiri kudari ngo utungamiriri hwakapuwa kwendiri ndi Mwari ngo ndava yenyu, kuzarisa izwi ra Mwari,

²⁶ ndicho chiri chakafishika, chakafukijwa kubvira pakutanga kumibarihwana yese; asi zvino chapangijirwa kune vakacheneswa vake,

²⁷ kwavari Mwari wakada kuti avazivise icho chiri upfumi hwo uthende hwo chakafishika pakati po vo majinja, chiri Kristu mukati mwenyu uri gonda ro uthende;

²⁸ uwo wotinochumaira ndiye, techipanga mundhu wese, no kujijisa mundhu wese muungwaru hwese, kuti tivatatije vandhu vese vari vakaperera kuna Kristu;

²⁹ kune izvi zvondinoshandavo, ndechirwa kudari ngo kushanda kwake ukwo kushanda ngo simba mukati mwangu.