Vahebheru 9 - NOVO TESTAMENTO EM NDAU

Themperi ibzva

¹ Zvino no chitenderano chokutanga chayiva no mitemo yo kudira Mwari, no ndau yacho yakachena iri yo nyika ino.

² Ngokuti rayivapo tende rakanasirihwa, ndau yaro yokutanga yayiva no chigajikiro cho chibani, no tafura, no zvimanda zvinopangijihwa yaidanijwa kuti, Ndau Yakachena.

³ Na ngosure kwo chichitiro chochipiri, yayiva ndau yo tende inodanijwa kuti, Yakapindisisa Kuchena.

⁴ Rino ndiro yo mukore yo kupisira mutombo unonuhira no bhokisi ro chitenderano rakasetwa ngo mukore, mukati mwaro mwayiva no hari yo mukore ino mana, no ndonga ya Aroni yakatumbuka maruva, no mapuwe akatahwa chitenderano;

⁵ no panyezuru paro payiva no makerubhi outhende echifukigira chigaro cho nyasha; zvetisingavereketi ndizvo zvino chimwe nga chimwe.

⁶ Zvino izvi zvechinasirihwa kudaro, vapristi vaigara vechinghwina kundau yokutanga yo tende vechiita mishando ya Mwari:

⁷ Asi kundau yochipiri yo tende kwainghwina mupristi mukuru ari ega, kamwe ngo gore, asikanghwini asina ngazi, yaakapira ngo ndava yake, na ngo ndava yo zvishaishi zvo vandhu.

⁸ Mweya Wakachena wechivonisa ichi, kuti njira yo kunghwina mundau yakachenesesa inga isati yapangijihwa, ngo mukuvo tende rokutanga richakaima.

⁹ Ichi chiri muezaniso wo mukuvo wo nguva inoviya; yovanopira ndiyo zvese zvipo no midiro, zvisikakoni kuyita kuti mwoyo wo unodira uperere.

¹⁰ Ngokuti zvayiva zviemeso zvega zvo nyama zvokuha no zvokumwa, no kuchenesa kwakaparajana, zvakaemeswa mbhera kuguma kumukuvo wo kutshandujwa.

¹¹ Ngokuti Kristu aviya, ari mupristi mukuru wo zviro zvakanaka zvichaviya, wakanghwina ngo mutende rakapinda kukura, no kuperera, risikazivi kuitwa ngo nyara, kunoti, andiropi rokusikwa uku,

¹² zve, aanganghwini ngo ngazi yo mbuji no yo makonyana, asi ngo ngazi yake, wakanghwinemwo kamwe kwega mundau yakachenesesa, akatiwanira kuripihwa kusikaperi.

¹³ Ngokuti kudari ngazi yo mbuji noyo mikono, no marota otshiru zvechifafazwa kwavari vakasvipiswa, zvechivachenesa kuti nyama isukike:

¹⁴ Ngazi ya Kristu inozopinda kwakaitawani, iye ngo mweya wo mbhera narini wakajipira ari usina ndava kuna Mwari, kuchenesa mwoyo yedu kubva kumishando yakafa, kuti tishandire Mwari unopona.

¹⁵ Ngo iyi ndava, iye uri muiyanisi wo chitenderano chipsha, kuti kufa zvo kwakaviya kuvaponesa kuzvishaishi zvavo vayiva pasi po chitenderano chokutanga, kuti avo vaidanijwa vangaashira chigondiso cho ndhaka isikaperi.

¹⁶ Ngokuti apo pano tshamba yo kukovanisa ndhaka, kunosisira kuti kuvapo pakutanga kufa kwo uwo wakaitara.

¹⁷ Ngokuti tshamba yo kukovanisa ndhaka ino simba apo mundhu uwo afa: Ngokuti ingatongoita ino simba here apo uwo wakatara achapona?

¹⁸ Ndizvo no chitenderano chokutanga achizivi kugwinyiswa pasina ngazi.

¹⁹ Ngokuti apo mipango yese yayinga yavereketwa ndi Mosi ku vandhu vese kudari ngo mipango, iye wakatora ngazi yo makonyana no yo mbuji, pamwepo no kumwa no hombore yo mamviri akapshuka, no hisopi, wakafafazira tshamba no vandhu vese,

²⁰ echiti: “Iyi iri ngazi yo chitenderano chomwakapangihwa ndi Mwari.”

²¹ Zve, wakafafazira tende no ndiro jese jo mushando ngokudaro ngo ngazi.

²² Ndingananga kuti inga zviro zvese pasi po mupango zvinocheneswa ngo ngazi, na ngo kunja po kuparaja ngazi akuna kuregerehwa.

Mudiro wa Kristu unobvisa zvishaishi

²³ Ndizvo kwaisisira kuti zvivonero zvo izvo zviri mugore zvisukwe ngo izvi; asi zviro zvo mugore pachazvo zvinocheneswa ngo midiro yo kupinda kunaka kuno izvi.

²⁴ Ngokuti Kristu aazivi kunghwina kundau yakachenesesa, yakaitwa ngo nyara, yakadari ngo chivonero cho gwinyiso; asi wakanghwina mugore pacharo, kuti zvino avoneke pamberi po hope ya Mwari ngo ndava yedu:

²⁵ Zve, akusisiri kuti ajipire kuyita mudiro kazhinji, kudari ngo zvaainghwina mupristi mukuru kundau yakachenesesa gore ngo gore ano ngazi isiri yake akadi,

²⁶ kuti zvakadaro kwaisisira kuti atambujike kazhinji kubvira mukuemeswa kwo nyika; asi zvino pakugumisira kwo nguva iye wakapangijihwa kamwe kuti abvise zvishaishi ngo kujipira kuyita mudiro.

²⁷ Ngokuti kudari ngo zvo kwakaemesehwa ku vandhu kufa kamwe no sure kwakwo kutongwa;

²⁸ ngokudaro Kristu wakapihwa kamwe kuti atware zvishaishi zvo vazhinji; unozovoneka ngo kwo chipiri asikatwari zvishaishi kwavari vanomugarira, kuvaponesa.