Vahebheru 8 - NOVO TESTAMENTO EM NDAU

Chitenderano chipsha

¹ Zvino ndava huru yo izvi zvo tinovereketa ndizvo nga iyi, kuti tino mupristi mukuru wakadaro, wakagara pasi ngo kumuho kwo dendemaro, ro Ukuru wo matenga.

² Ari mushandi wo zvakachena no wo tende ro gwinyiso, raakavaka Mambo, haiwa mundhu.

³ Ngokuti mupristi wese mukuru unoemesehwa kupira zvese zvipo no midiro. Ndizvo kunosisira kuti uwu mupristi naye anachovo cho kupira.

⁴ Zvino kudari ayiva mu nyika, aasaizoita mupristi, kwechivoneka kuti varipo avo vanopira zvipo kudari ngo zvinonanga mipango;

⁵ avo vanoshandira izvo zviri muezaniso no bvute ro izvo zvomugore, kudari ndi Mosi wakapangwa ndi Mwari apo woda kuyita tende; ngokuti unoti. “Ngwara kuti uite zvese kudari ngo chivonero cho ndakakupangijira pa dundhu.”

⁶ Asi zvino iye wakaashira mushando wakapindisisa kunaka, ngo uwandu wakadarozve uri muiyanisi wo chitenderano chakapinda kunaka, chakaemeswa panyezuru po zvigondiso zvakapinda kunaka.

⁷ Ngokuti kudari chitenderano chokutanga chainga chakaperera, akusaizopshakwa ndau yochipiri.

⁸ Asi unovaitira ndava, echiti: Vona, mazuva anoviya, unonanga Mambo, okuti ndinozoita chitenderano chipsha no nyumba ya Israeri no ya Judha;

⁹ haiwa chakadari ngo icho chondakaita no majibaba avo ngo zuva rondakavatora ngo nyara kuvatungamirira kubuda mu nyika yo Egipite; ngokuti avazivi kugara muchitenderano changu, neni andizivi kupinimija ndizvo, unonanga Mambo.

¹⁰ Ngokuti ichi ndicho chitenderano chendinozoita no vonyumba ya Israeri ngosure kwo mazuva ao, unonanga Mambo; Ndinozodira mipango yangu mu mipinimijo yavo, ndinozoitara mumwoyo yavozve; neni ndinozoita Mwari wavo, navo vanozoita vandhu vangu.

¹¹ Mundhu wese aazojijisi shamwari yake, no mundhu wese hama yake, echiti: Zivai Mambo. Ngokuti vese vanozondiziva, kubvira kumudoko mbhera kumukuru wavo.

¹² Ngokuti ndinozoitira nyasha zvinonyangaja zvavo, no zvishaishi zvavo andichazozvicherecheji.

¹³ Ngo kunanga kuti: Chitenderano chipsha, ngokudaro wakachiita chokutanga chisharuka. Asi icho chakaita chisharuka, no kusakara, chaa phedo pokurova.