Vahebheru 7 - NOVO TESTAMENTO EM NDAU

Merekizedheki ichiimo cha Kristu

¹ Ngokuti uwu Merekizedheki, mambo wo Saremi, mupristi wa Mwari uri panyezuru po zvese, wakashongana na Abrahama, echipetuka kubva kwoouraya majimambo, wakamudakajisa,

² kwaarizve Abrahama wakapa chimwe chogumi chazvo zvese; unozwi kutanga mukukumuchwa, Mambo wo kururama sure kwo ukuzve unozvi Mambo wo Saremi, kunanga kuti, Mambo wo kunyarara;

³ asina baba, asina mayi, asina mubarihwana, asina kutanga kwo mazuva nokuti magumo endaramo, asi wakaitwa kudari ndi Mwana wa Mwari, iye unogara ari mupristi nguva jese.

⁴ Zvino pinimijanyi ngo kukura kwo uwu mundhu, uwo wakapuwa ndi Abrahama, baba mukuru chimwe chogumi cho izvo zvaakachakata zvaipindisisa kunaka.

⁵ Ngo gwinyiso avo vo mbhuri ya Revhi vanoashira mushando wo upristi, vano mupango wokuti vatore chogumi ku vandhu kudari ngo mupango, unoti ku hama javo, pikija vakabva mu chiunu cha Abrahama.

⁶ Asi uwu mubarihwana wake usikazivi kuverengwa ruji rwake kwavari, wakatora chogumi kuna Abrahama, akamudakajisa wayiva no zvigondiso.

⁷ Asi akuna kukanija kuti mudoko unokomborehwa ngo uwo uri mukuru.

⁸ No pano, vandhu vanofa vanoashira chimwe chogumi; asi kwakapupuhwa ndiye kuti unorarama.

⁹ Ngokudaro, Revhiwo unoashira chogumi, akapavo chogumi Abrahama.

¹⁰ Ngokuti iye wayinga achiri mu chiunu cha baba wake, pakushongana kwa Merekizedheki naye.

¹¹ Zvino kudari kwayivapo kuperera ngo upristi wa Revhi (ngokuti pasi pahwo vandhu vakaashira mipango) kwachaisisira ngenyi kuti kuvepo umweni mupristi ngo kutevera upristi hwa Merekizedheki, asiri hwo ruji rwa Aroni?

¹² Ngokuti upristi hwechitshandujwa kwaisisira kuti mipango itshandujwevo.

¹³ Ngokuti iye wo zvinovereketwa ndiye izvi uri wo jinja rimweni, kubvira kweriri akuna mundhu wakamboshanda paaltari.

¹⁴ Ngokuti zviri pambhene kuti Mambo wedu wakabva kujinja ra Judha; ngo iri jinja Mosi aazivi kuvereketa chiro ngo ndava yo vapristi.

Kristu mupristi mupsha mbhera narini

¹⁵ Nakwo kunonasa kuyita pambhene, kudari kwechimiruka mupristi umweni ngo kutevera muemo wa Merekizedheki.

¹⁶ Uwo usikazivi kuitwa kudari ngo mutemo wo mupango wo nyama, asi wakaitwa ngo simba ro kupona kusikaperi.

¹⁷ Ngokuti iye unopupurihwa kuti: “Iwewe uri mupristi wo mbhera narini wo ruji rwa Merekizedheki.”

¹⁸ Ngokuti mupango wokutanga unoregehwa ngo ndava yo kutama simba nokuita usina shwiro,

¹⁹ (ngokuti mupango auzivi kuyita chiro nachimwe kuti chiperere) no kuzisa pandau yawo gonda rakapinda kunaka, ndiro tinokwedera kuna Mwari.

²⁰ Kwechivoneka kuti uwo aazivi kuyita mupristi pasina mbhiko.

²¹ (Ngokuti ivo ngo gwinyiso vakaitwa vapristi ngo kunja pasina mbhiko; asi iye ngo kupika kwake wakati kwaari: “Mambo wakapika aazokunukuki, Iwewe uri mupristi mbhera narini”);

²² kudari ngo kuwanda kwakadaro Jesu wakaitwa chibatiso cho chitenderano chakapinda kunaka.

²³ Ngo gwinyiso ivo vayiva vapristi vazhinji, ngokuti vanorambiswa kuvangirira ngo ndava yo kufa.

²⁴ Asi uwo, ngokuti unogara mbhera narini, uno upristi hwake usikapindujwi.

²⁵ Ndizvozve, uno simba ro kuponesa aembho avo vanokhwedera kuna Mwari ndiye, kwechivoneka kuti unorarama mbhera narini kuti avakumbirire.

²⁶ Ngokuti mupristi wakadari ndiye wotaitama, wakachena usina kuchengeja, usina chinosvipisa, wakaparajana no vashaishi, wakaitwa ari wakapinda kukura kuno matenga;

²⁷ uwo usikatami kupira midiro zuva ngo zuva kutanga ngo ndava yo zvishaishi zvake, na ngo sure ngo ndava yo zvishaishi zvo vandhu, kudari ngo zvo vakayita avo vapristi vakuru: Ngokuti wakayita ichi kamwe kwega, apo ajipira pachake.

²⁸ Ngo mipango vandhu vakarembejeka vakaemeswa kuyita vapristi vakuru; asi izwi ro mbhiko, rayivapo ngo sure kwo kupihwa kwo mipango, rakaemesa Mwana wakaperera mbhera narini.