Vahebheru 6 - NOVO TESTAMENTO EM NDAU

¹ Ndizvo ngatichiregere kuvereketa ngo zvijijiso zvokuamba zva Kristu, ngatichitsamwirire kuenda mberi kuyita vakaperera; tisikarajikizve jiro ro kutenderuka kubva kumishando yakafa, no yo kugonda kuna Mwari,

² no kuchijijiso chokubhapatiswa, no kudihwa nyara, no kwo kumuka kwo vakafa, no kwo kutongwa kwo mbhera narini.

³ No izvi tinozozviita kudari Mwari echitendera.

⁴ Ngokuti ngo ndava yo avo vakambojekiswa no kuravira chipuwo cho mugore, vechiitwa vanoashira Mweya Wakachena,

⁵ vakaravira izwi rakanaka ra Mwari, no masimba onguva inoviya,

⁶ kudari vechihwirira sure, akungaitiki kuvatenderujazve; kwechivoneka kuti vanokohomerazve Mwana wa Mwari vechimupsheruja pambhene.

⁷ Ngokuti nyika inomwirira mvura inona kazhinji panyezuru payo, kudari yechibereka mirivo inosisira avo voyakarimihwa, inoashira chidakajiso chinobva kuna Mwari.

⁸ Asi kudari yechibereka minzwa no marukato, inorashwa no kutukwa; magumisiro ayo ari okupiswa.

⁹ Asi vanodikana, tinoongwa kuti imwimwi munozova no zvakapinda kunaka, no izvo zvinozwirana no ruponeso, pikija tinovereketa kudaro.

¹⁰ Ngokuti Mwari aasiri usikazivi kururama akadi kuti akanganwe mushando wenyu, no rudo rwo mwakapangijira kuna zina rake, ngo izvo kuti mwakashandira vakacheneswa, kudari munondovashandira nazvino.

¹¹ Nesu tinodisisa kuti umwe naumwe wenyu apangijire kutsamwirira kwakadaro kuno kugonda kwakazarisika mbhera mukugumisira.

¹² Zve kuti musava no nungo, asi kuti muejerere ngo kugonda no kusengerera avo vanogara ndhaka yo zvigondiso.

Mwari unoyita zvaanogondisa

¹³ Ngokuti Mwari apo aita chigondiso kuna Abrahama, wakapika ngokwake ngokuti inga pasina uri mukuru wokuti apike ndiye.

¹⁴ Echiti: “Ngo gwinyiso ngokudakajisa, na ngo kuwanja ndinozokuwanjisa.”

¹⁵ Ngokudaro echishingirira wakaashira chigondiso.

¹⁶ Ngokuti vandhu vanopika ngo mukuru: No mbhiko inopeja hasha jese kuti igwinye.

¹⁷ Ngo izvi Mwari, echida kupangijira aembho kuno vanogara ndhaka, yo chigondiso, kuti icho chaakapanga achingatshandujwi, wakachigwinyisa ngo mbhiko.

¹⁸ Kuti ngo zviviri zvisina kutshandujwa, ndizvo akungaitiki kuti Mwari anyepe, tiwane kushinga kwakagwinya, isisu takatiza kubatisisa kugonda rakadihwa pamberi pedu;

¹⁹ iro retinaro kuyita nanga yo mweya, gonda rine gwinyiso rakagwinya rinonghwina kwo icho chiri mukati mwo jira;

²⁰ apo mutungamiri wakanghwinemwo ngo ndava yedu ndi Jesu, ayinga amboita mupristi mukuru mbhera narini ngokuti uri wo ruji rwa Merekizedheki.