Vahebheru 4 - NOVO TESTAMENTO EM NDAU

Zororo kuna vandhu va Mwari

¹ Ndizvo, kudari ngo zvechiripo chigondiso cho kunghwina mukuzorora kwake, ngatingware kuti kusazovapo umwe wenyu ungavoneka echikorera kugumira kwechiri.

² Ngokuti ngo gwinyiso tayiva no vhangeri rakachumaihwa kwetiri, kudari ndivo: Asi izwi rokuzwa arizivi kubesera, ngokuti arizivi kusonganiswa pamwepo no kugonda kuna avo vakarizwa.

³ Ngokuti isisu takatenda tinonghwina mukuzorora ukwo, kudari ngo zvaakavereketa, echiti: Kudari ngo zvondakapika muushungu hwangu, avazonghwini mukuzorora kwangu, pikija mushando yayinga yakapejwa kubvira mukuemeswa kwo nyika.

⁴ Ngokuti iye wakavereketa kudari kundau imweni ngo ndava yo zuva ro chinomwe, kuti Mwari wakazorora ngo zuva ro chinomwe kubva kumishando yake yese;

⁵ no kundau inozve, avazonghwini mukuzorora kwangu.

⁶ Ndizvo kwechivoneka kuti kwasarira kuti vamweni vanghwinemwo, naavo kwavari kwakachumaihwa masoko akanaka kare vakakorera kunghwinemwo ngo kusikapurutana.

⁷ Unoemesazve, zuva rakatikuti, echinanga ndi Dhavhidha kuti: “Nyamasi”, ngosure kwo mukuvo wakareba kudari, kudari ngo zvakavereketwa kare: “Nyamasi kudari mwechizwa izwi rake, musakonjisa mwoyo yenyu.”

⁸ Ngokuti kudari Joshua ayinga avapa kuzorora, iye asaizovereketa sureni ngo zuva rimweni.

⁹ Ndizvo kuchavapo kuzorora kwo sabatha ro vandhu va Mwari.

¹⁰ Ngokuti iye wakanghwina mukuzorora kwake wakazororavo kumishando yake, kudari ngo zvaakaita Mwari kuno yake.

¹¹ Ndizvo ngativangirire kunghwina mukuzorora ukwo, kuti kusazovapo mundhu unozowa kutevera icho chivonero cho kusikapurutani.

¹² Ngokuti izwi ra Mwari rinopona, rinoshanda, rinopinja kupinda shoti ino upanga huviri. Inobaya mbhera kuparajane mwoyo no mweya, zvese ndhengo no mwongo, no kuzwisisa zvinotendwa no zvinorangarihwa mumwoyo.

¹³ Apana chisikwa chisiri pambhene mukuvona kwake: Asi zviro zvese zviri pambhene no kubewurihwa kumajiso ake uwo wotinodavira kwaari.

Jesu mupristi mukuru

¹⁴ Ndizvo techiva no mupristi mukuru, wakapinda mumatenga, uri Jesu Mwana wa Mwari, ngatibatisise kutenda kwedu.

¹⁵ Ngokuti atina mupristi mukuru akadi asikakoni kutizwira urombo pakurembejeka kwedu; asi tina uwo wakaejwa ngo njira jese kudari ndisu, asina zvishaishi.

¹⁶ Ndizvo, ngatikwedere ngo kushinga kudendemaro ro nyasha, kuti tiashire nyasha no kuwana nyasha jo kubetsera ngo mukuvo wo kutama.