Vahebheru 3 - NOVO TESTAMENTO EM NDAU

Jesu ndimukuru kupinda Mosi

¹ Ndizvo hama jakacheneswa, jinoashiravo kudanijwa kwo mugore, pinimijanyi ngo Mupostori no Mupristi Mukuru wo kutenda kwedu, ndiye Jesu.

² Uwo waigondeka kwaari wakamuemesa, kudarizve ndi Mosi waigondeka mu nyumba yake yese.

³ Ngokuti iye wakaverengwa unosisira kureremejwa kupinda Mosi, ngokuti uwo wakavaka nyumba unopinda kureremejwa kuno nyumba pachayo.

⁴ Ngokuti nyumba jese jinovakiwa ngo mundhu; asi uwo wakavaka zvese ndi Mwari.

⁵ Na Mosi ngo gwinyiso waigondeka mu nyumba ya Mwari yese kudari ngo muranda, kuyita chapupu cho izvo zvaaizovereketa sureni.

⁶ Asi Kristu waigondeka kudari ngo mwana panyezuru po nyumba yake; nesu tiri nyumba yake kudari techibatisisa mbhera pakugumisira kushinga kwedu no gonda rotinokuja ngo ndava yaro.

Zororo rakagondiswa ndi Mwari

⁷ Ndizvo kudari ngo zvounovereketa Mweya Wakachena: “Nyamasi kuti mwechizwa izwi rake,

⁸ musakonjisa mwoyo yenyu kudari ngo nguva yo kumukira, kudari ngo apo pazuva ro kuejwa mu bani,

⁹ paakandieja majibaba enyu echindinesa, akavona mishando yangu makore ari makumi marongomuna.

¹⁰ Ndizvo ndakanyangajwa kuno ruji urwu, ndikati: Vanogara vechipauka mumwoyo yavo, asi avasati vaziva njira jangu;

¹¹ kudari ngo zvo ndakapika mukunyangajwa kwangu, kuti avazonghwini mukuzorora kwangu.”

¹² Ngwaranyi hama kuti musazova no mwoyo wakashata usikatendi mukati mwo umwe wenyu ngo kuhwirira sure kubva kuna Mwari unopona.

¹³ Asi pangananyi mazuva ngo mazuva, kuchadanijwa kuti: Nyamasi; kuti asazovapo umwe wenyu unokonjiswa ngo kuchengeja kwo kushaisha.

¹⁴ Ngokuti isisu takaitwa vaashiri va Kristu, kudari techibatisisa kuamba kwo kugonda kwedu mbhera pakugumisira:

¹⁵ Apo kuchanangwa kuti: Nyamasi kudari mwechizwa izwi rake, musakonjisa mwoyo yenyu, kudari ngo nguva yo kumukira.

¹⁶ Ngokuti ndiyani avo vakazwa, vakamukira? Andivopi vese here vakabudiswa Egipite ndi Mosi?

¹⁷ Ndiyanizve vaakachenekera makore ari makumi marongomuna? Andivopi avo vakashaisha here, miviri yavo vakafira mu bani?

¹⁸ Wakapikazve kunani kuti avazonghwini mukuzorora kwake, asi kwavari vayiva vasikamupurutani?

¹⁹ Nesu tinovona kuti avasaikona kunghwinemwo ngo ndava yo kusama kutenda.