Vahebheru 2 - NOVO TESTAMENTO EM NDAU

Ruponeso rwakakura

¹ Ndizvo kunosisira kuti tipinde kungwarira zvo takazwa, kuti tirege kupauka kubva kwo zviri.

² Ngokuti kudari izwi iro rakavereketwa ngo ngirosi rakavoniswa, kuti rakagwinya, no kupauka kwese no kusikapurutana zvakaengejehwa ngo kuhwirijihwa kwakasisira.

³ Isisu tingaita mapokonyokerenyi kudari techiregejera ruponeso rukuru rwakadari? Urwo rwakatanga kuvereketwa ndiye Mambo, rukagwinyisiswa kwetiri ndivo vakazwa.

⁴ Mwari wakapupuravo pamwepo navo, ndizvo zvese, zvivoniso no mishamiso, mushando yakawanda yo simba, na ngo zvipuwo zvo Mweya Wakachena kudari ngokuda kwake.

Kristu mutungamiriri wo ruponeso

⁵ Ngokuti aazivi kuipfavisira kungirosi nyika inoviya, yotinovereketa ndiyo.

⁶ Asi umwe wakapupura pandau imweni, echiti: “Mundhu uri chinyi kuti ukarakaje ndiye? Nokuti mwana wo mundhu kuti umufambire?”

⁷ Wakamuita ngo mukuvo mudoko ari pasi kuno ngirosi. Wakamupfeka junguja ro uthende no kureremejwa, ukamuemesa panyezeru po mishando yo nyara jako.

⁸ Wakapfavisa zvese pasi po tsoka jake. Ngokuti pakudira pasi pake zviro zvese, aazivi kusiya chiro chisikazivi kudihwa pasi pake. Asi zvino atisati tavona kuti zvese zvakadihwa pasi pake.

⁹ Asi tinomuvona Jesu wakaitwa kwo nguva doko ari pasi kuno ngirosi, ngo ndava yo kutambujika kwo kufa, akapfekeswa junguja ro uthende no kureremejwa, kuti ngo nyasha ja Mwari iye aravire kufa ngo ndava yo mundhu wese.

¹⁰ Ngokuti kwakamusisira, iye wakaitira zviro zvese, nokuti ndiye zvese zviripo, mukuzisa vana vazhinji muuthende, apererise mukutambujika uwo uri mutungamiri wo ruponeso rwavo.

¹¹ Ngokuti uwo unochenesa naavo vakacheneswa vari umwe: Ngo iyi ndava, aapsheruki kuvadanija kuti hama,

¹² echiti: “Ndinozopangijira zina rako kuvanukuna vangu, ndinozoemba kukuja pakati po chiara.”

¹³ Zve ndinozogonda kwaari. Zve vona inini, no vana avo vaakandipa Mwari.

¹⁴ Ndizvo kwechivoneka kuti vana vakakovanisihwa ngazi no nyama, iye pachake ngokudaro wakakovana navo pano zvakadaro; kuti ngo kufa ungamuita usina shwiro uwo wayiva no simba rokufa, kunoti, Dhiabhorosi.

¹⁵ Kuti anunure vese vayiva varanda mukupona kwavo kwese ngokutya kufa.

¹⁶ Ngokuti ngo gwinyiso aazivi kuviya kwoobesera ngirosi, asi kubesera mibarihwana ya Abrahama.

¹⁷ Ndizvo zvakamusisira kuti aezaniswe no vanukuna vake ngo zviro zvese, kuti aite mupristi mukuru ano nyasha no unogondeka ngo zviro zva Mwari, kuti aripire zvishaishi zvo vandhu.

¹⁸ Ngokuti iye ega wakatambujika echiejwa, uno simba rokubesera avo vanoejwa.