Vahebheru 12 - NOVO TESTAMENTO EM NDAU

Kungwajwa ngo ndava yo kushingirira

¹ Ndizvo kwechivoneka kuti isisu takatendenejwa ngo mbungano huru yakadaro yo vanopupura, ngatirashe zvese zvinorema, no kushaisha kunotibatirira, ngatigogome ngo kusengerera mujaho wakaemeswa uri pamberi pedu,

² techiringira kuna Jesu, muambi no mupeji wo kugonda kwedu, uwo ngo ndava yo kudakara kwakadihwa pamberi pake, wakashingirira muchinjiko, asikanyowejeki ndiwo, wakagara pasi ngo kumuho kwo dendemaro ra Mwari.

³ Ngokuti pinimijanyi ndiye, wakashingirira kurwisa kwakadaro kwo vashaishi vanomukira, kuti musazoremba, mwechidemera mumweya yenyu.

⁴ Ngokuti imwimwi amusati mwarwa mbhera kudondha ngazi mukuambana no kushaisha.

⁵ Nemwi mwakakanganwa kupotwa kunonyengerehwa kwomuri kudari ngo kuvana: “Mwana wangu usashora kupangira kwa mambo, nokuti kupera simba apo wechirambiswa ndiye;

⁶ ngokuti uwo waanoda Mambo unomupangira, no kurova mwana wese waanoashira.”

⁷ Shingiriranyi kupangihwa; Mwari unomubata kudari ngo vana; ngokuti uri kwapi mwana usikapangihwi ndi baba wake?

⁸ Asi kuti musikapangihwi, kudari ndivo vese, zvakadaro muri mubvandabahwa, amuri vanepi.

⁹ Zve, tayiva no majibaba edu ngo kwonyama aitipangira, nesu takaareremeja: Kunozopinda kwakaitawani kupfavira Baba wo mweya kuti tipone?

¹⁰ Ngokuti ngo gwinyiso avo vakatipangira mazuva mashomani, kudari ngo zvezvaivoneka zvakanaka kwavari; asi iye unotipangira kuti tibetsehwe, kuti tiashirevo kuchena kwake.

¹¹ Kwese kupangihwa akuchadakaji zvinopano, asi kunochemeja: Asi ngo sure kunobereka michero yo kunyarara, eya, michero yo kururama kwavari vakurovejera.

¹² Ndizvo musanyi nyara jakarembaremba, gwinyisanyi makokobvi asina simba;

¹³ munasirire njira jakarurama jo tsoka jenyu, kuti icho chiri chirema chisazopaukiswa, asi paugaro po ukwo kuti chiponeswe.

Mushongano wo dhiri ro vana va Mwari

¹⁴ Ejanyi kugarisana ngo kunyarara no vandhu vese, nokuita vakacheneswa, ngo kunja kwakwo apana mundhu ungazomuvona Mambo.

¹⁵ Mwechingwarira kuti kusazovapo mundhu unotamikihwa ngo nyasha ja Mwari; kuti usazoapo miji unovava unomera, kumutambuja, no vazhinji vasvipiswe ndiwo;

¹⁶ kuti kusazovapo muombi nokuti mupsheruji kudari ndi Isau, uwo wakatengesa ndhaka yo utangwe hwake kupuwa sima imwe yo chokuha.

¹⁷ Ngokuti munoziva kuti ngo sure apo akadisisa kuti agare ndhaka yo chidakajiso, wakarambwa (ngokuti aazivi kuwana nguva yo kutenderuka), pikija akanyaipshakisisa ngo kuchema.

¹⁸ Ngokuti imwimwi amuzivi kuviya kudundhu ringapshaswa, iro raibwaka ngo muriro, no gore rakasvipa, no chidima, no mubvumo,

¹⁹ no kurijwa kwo mbhayapaya, no maungira omazwi; iro izwi, avo vakarizwa vakapota kuti no izwi rimweni risachazovereketwa kwavari.

²⁰ Ngokuti avazivi kukona kushingirira izvo zvakapangwa, kudari pikija nyama yaipshasa dundhu, yaizofuhwa ngo mapuwe.

²¹ No icho chakavoneka chechityisa, kuti Mosi wakati: “Ndinotya kukurutu no kuhuta.”

²² Asi imwimwi mwakaviya kudundhu ro Zioni, no kudhoropa ra Mwari unopona, Jerusarema ro mugore, no kuhondo jisikaverengeki jo ngirosi,

²³ no kumushongano mukuru, no kuchiara cho matangwe ao akatahwa mugore, nokuna Mwari Mutongi wavo vese, no kumweya yo vandhu vakarurama vakaitwa vakaperera,

²⁴ nokuna Jesu, muiyanisi wechitenderano chipsha, no kungazi yo kufafaza, inovereketa zvakapinda kunaka kuno ya Abhera.

²⁵ Ngwariranyi kuti musazoramba uwo unovereketa, ngokuti kudari vasikazivi kupokonyoka avo vakaramba, uwo wakavereketa mu nyika muno, kakurutu isisu atizopokonyoki, kuti techibva kwaari unovereketa ari mugore.

²⁶ Uwo izwi rake ngo nguva iyo rakazungunyisa nyika. Asi zvino wakagondisa, echiti: “Kamwezve ndinozozungunyisa haiwa nyika yega, asi no denga naro.”

²⁷ No izwi iri, rokuti: “Kamwezve.” Rinonanga kubviswa kwo izvo zvinozungunyika kunanga izvo zvakaitwa, kuti izvo zvisikazungunyiswi zvisare.

²⁸ Ndizvo tinoashira umambo husikazungunyiswi, ngative no nyasha, jetingakona kushanda ndijo kuna Mwari, techimudakaja, ngo kureremeja na ngo kutya:

²⁹ Ngokuti Mwari wedu uri muriro unopisa.