Vahebheru 10 - NOVO TESTAMENTO EM NDAU

¹ Ngokuti mipango ino mumvuri wega wo zviro zvakanaka zvinoviya, andizvopi zviri muemo wazvo, aingatongoiti kuti vaperere avo vanokwedera ngo midiro imweyo inopihwa gore ngo gore.

² Kudari zvayinga zvakadaro aisaizoregerwa kupihwa here, ngokuti vadiri, apo vayinga vambosukwa kamwe, avachaizova no mupinimijo yo kushaisha?

³ Asi kumudiro iyo kuripo kucherechejwa kwo zvishaishi gore ngo gore.

⁴ Ngokuti akungaitiki kuti ngazi yo mikono no yo mbuji ibvise zvishaishi.

⁵ Ndizvo apo aviya mu nyika wakati: “Mibairo no zvipo iwewe auzivi kuzvida, asi wakandinasirira muviri.”

⁶ Iwewe audakariri mibairo yo kupisa no mibairo yo zvishaishi:

⁷ Ndizvo ndakati: “Vona, ndaviya (mubhuku rakapetwa kwakatahwa kudaro ndini) kuti ndiite kuda kwako, A Mwari.”

⁸ Zvaakananga pakutanga kuti: “Mibairo no zvipo no mbewu jese jo midiro no mibairo yo zvishaishi auzivi kuzvida, zve, audakari ndizvo”, (izvo zvinopihwa ngo kutevera mipango).

⁹ Sure kwouku wakati: “Vona, ndaviya kuti ndiite kuda kwako.” Unobvisa icho chokutanga kuti agwinyisise chochipiri.

¹⁰ Ngo ukwo kuda takacheneswa ngo kupihwa kwo muviri wa Jesu Kristu kamwe kwega.

¹¹ No mupristi wese ngo gwinyiso unoyima zuva ngo zuva echindoshanda, echipira kazhinji midiro inotojana, isikatongokoni kubvisa zvishaishi.

¹² Asi iye apo ayinga apira mudiro umwe wo mbhera narini ngo ndava yo zvishaishi, wakagara ngo kumuho kwa Mwari;

¹³ kubvira ngo uwo mukuvo echiringira kumbhera vakorore vake vaitwe chitambarariro cho tsoka jake.

¹⁴ Ngokuti ngo kupira mudiro umwe iye wakavaita vakaperera mbhera narini avo vakacheneswa.

¹⁵ No Mweya Wakachena unoyita uchapupu kwetiri, ngokuti ngo sure iye wakati:

¹⁶ “Ichi ndicho chitenderano chendinozoita navo ngo sure kwo mazuva ao, Mambo unonanga: Ndinozodira mipango yangu mu mwoyo yavo, ndizoitara mu mipinimijo yavo,

¹⁷ no zvishaishi zvavo no zvinyangajo zvavo andichazozvicherecheji.”

¹⁸ Zvino apo pano kuregerehwa kwo izvi, akuzovapo mudiro umweni ngo ndava yo kushaisha.

Ngatikwedere phedo na Mwari

¹⁹ Ndizvo hama, techiva no kushinga kwokunghwina kundau yakachena ngo ngazi ya Jesu,

²⁰ ngo njira ipsha no inopona, yaakatibewurira, kubudikija ngo jira ro chichitiro, ndikwo kunoti ngo nyama yake;

²¹ techiva naye mupristi mukuru panyezuru po nyumba ya Mwari,

²² ngatikwedere tino mwoyo uno gwinyiso, mukugonda kwakazarisika, tino mwoyo yedu yakafafazwa kubva kumikarakajo yakashata, no miviri yedu yakashambijwa ngo kumwa yakadora.

²³ Ngatibatisise kutenda kwo gonda redu, tesikazungunyiswi; ngokuti unogondeka uwo wakagondisa.

²⁴ Zve, ngatikarakajane kumusirana rudo no kuyita mishando yakanaka;

²⁵ tisikaregi kuungana pamwepo kudari ngo muitiro wo vamweni, asi techipangana; kakurutu aembho apo munotovona kuti zuva rinokwedera.

²⁶ Ngokuti kudari techizoshaisha ngo kuda kwedu, ngo sure kwo kuashira kuzwisisa gwinyiso, akuchinazve mibairo ngo ndava yo zvishaishi.

²⁷ Asi kwasara kugarira ngokutya kutongwa, no muriro uno ushungu unozopeja mapandu.

²⁸ Mundhu uwo wakashora mutemo wa Mosi unofa, asikaitihwi nyasha, kwega ngo izwi ro zvapupu zviviri nokuti zvitatu:

²⁹ Unozosisira kupangihwa kwakaitawani kupindisisa kukura, uwo wakatshikatshika pasi potsoka Mwana wa Mwari, akaverenga ngazi yo chitenderano, yaakacheneswa ndiyo kuti iri chiro chisina shwiro, akaita ngo kushora Mweya wo nyasha?

³⁰ Ngokuti tinomuziva uwo wakananga kuti: “Kuhwirijira ngo kwangu, inini ndinozohwirijira. Zve, Mambo unotonga vandhu vake.”

³¹ Chiri chiro chinotyisa kuwira munyara ja Mwari unopona.

³² Asi cherechejanyi kumazuva okutanga, ao ngo sure kwo kujekiswa kwenyu, mwakashingirira kurwisana kakurutu kwo kutambujika;

³³ pamweni mwakaringihwa ngo ushungu no kupsherujwa no kutambujwa; pamwenizve mwakakovanisirana naavo vakaitihwa zvakadaro.

³⁴ Ngokuti mwakazwira urombo avo vayiva vakasungwa, mwakadakara mukushaishihwa kwo ndhumbi jenyu, mwechiziva kuti imwimwi pachenyu muno ndhaka yakapinda kunaka no inogara.

³⁵ Ndizvo musarasha kushinga kwenyu, ukwo kuno musharo mukurutu.

³⁶ Ngokuti munosisira kuva no kusengerera, apo mwaita kuda kwa Mwari, mungaashira chigondiso.

³⁷ “Ngokuti kwasara mukuvo mudoko, uwo unoviya, unozoviya, aanonoki.

³⁸ Asi wakarurama wangu unozorarama ngokugonda; nokudari echihwirira sure, mwoyo wangu auzovi no kudakara kwaari.”

³⁹ Asi isisu atiripi vo avo vanohwirira sure kuenda mukurashwa, asi tiri vo avo vanokugonda kwo kuponeswa kwo mweya.