Vagaratiya 6 - NOVO TESTAMENTO EM NDAU

Kuyita zvakanaka kuvese

¹ Hamadoni, kuti mundhu abatwa ngo chishaishi, imwimwi vo Mweya, mumusijirenyi wakadaro ngo mweya wakapfava, wechijingwarira kuti newevo usazoejwa.

² Twarirananyi mutwaro, ngokudaro muzarise mupango wa Kristu.

³ Ngokuti kudari mundhu achirangarija kuti uri nani, apo asiri usina shwiro, iye unojichengeja pachake.

⁴ Asi mundhu wese ngaaeje mushando wake pachake naapo unozojivonera kuti ungajikuja ngenyi, usikakujiri umweni.

⁵ Ngokuti mundhu wese unozojitwarira mutwaro wake.

⁶ Asi uwo unojijiswa izwi ngaakovanisire kwaari anomujijisa zviro zvese zvakanaka.

⁷ Musachengejehwa; Mwari aatongoitihwi jee: Ngokuti pikija ichinyi chaanokusha mundhu, ndicho chaanozokotorazve.

⁸ Ngokuti uwo unojikushira nyama yake, unozokotora kuvora kwo nyama; asi uwo unojikushira Mweya; unozokotora ku Mweya kupona kusikaperi.

⁹ Tisaremba kuyita zvakanaka, ngokuti ngo nguva kwayo tinozokotora, kudari tikarega kuremba.

¹⁰ Ndizvo kudari ngo zvo tinayo nguva, ngatishande izvo zviri zvakanaka kuna vandhu vese, kakurutu kuna avo vari vo mbhuri yo kutenda.

Mazwi okugumisira

¹¹ Munovona kukura kwo tshamba yo ndakatara kwomuri ngo nyara yangu ndega.

¹² Avo vese vanoda kuvoneka vari vakanaka munyama, vanomuvangijira kuti muchekwe; kwega kuti musazotambujwa ngo ndava yo muchinjiko wa Kristu.

¹³ Ngokuti avo pachavo vanochekwa, avangwariri mupango; asi vano chidisiso chokuti muchekwe kuti vazvikuje ngonyama yenyu.

¹⁴ Asi kusaitika kuti inini ndijikuje, kwega ngo muchinjiko wa Mambo wedu Jesu Kristu, ndiwo nyika yakakohomehwa kwendiri, neni ndakakohomehwa kuno nyika.

¹⁵ Ngokuti kuchekwa akuna mutengo, nokuti kurega kuchekwa, asi kuyita chisikwa chipsha.

¹⁶ Kunyarara no nyasha ngazvive panyezuru pavo vese vanofamba ngouwu murau, no panyezuru po Israeri ra Mwari.

¹⁷ Kubvira wari mundhu achazonditambuja; ngokuti ndinotwara pa muviri wangu mbanga ja Jesu.

¹⁸ Nyasha ja Mambo wedu Jesu Kristu ngajive no mweya yenyu, hama. Ameni!