Vagaratiya 5 - NOVO TESTAMENTO EM NDAU

Kusununguka muna Kristu

¹ Ndizvo imanyi ngo kugwinya mukusununguka kwaakatisunungura ndikwo Kristu, muchazosungwazve kanga yo uhloko.

² Izwanyi, inini Pauri ndinoti kwomuri, kudari mwechiashira kuchekwa, Kristu aabeseri chiro kwomuri.

³ Inini, ndinoita uchapupu ku mundhu wese, unoashira kuchekwa, kuti iye unodikana kungwarira mipango yese.

⁴ Muri vakaparajana na Kristu, imwimwi munoda kupembejwa ngo mipango: Muri vawa kubva kunyasha.

⁵ Ngokuti isisu ngo Mweya wo kugonda tinogarira gonda ro kururama.

⁶ Ngokuti kuna Kristu Jesu zvese kuchekwa no kurega kuchekwa azvibeseri chiro; asi kugonda ukwo kunoshanda ngo rudo.

⁷ Imwimwi mwaitonasa kugogoma; ndiyani wakamuphinga kuti musapurukira kuna gwinyiso?

⁸ Ukwu kuongwa akubvi akadi kuno uwo wakamudanija.

⁹ Zvimbijo zvidodoko zvinovirisa upfu wese.

¹⁰ Ndinogonda kuna Mambo, kuti amuzovi no murangarijo umweni. Asi uwo unomukangaija unozojitwarira kutongwa kwake, pikija ndiyani.

¹¹ Asi inini, hama, kudari ndichichumaira kuchekwa, ndichatambujihwenyi? Kuti zvakadaro chikhuguriso cho muchinjiko chabviswa.

¹² Ndingada kuti avo vanomukhangaija vangajicheka.

¹³ Ngokuti imwimwi, hama, mwakadanijwa kuti muite vakasununguka; kwega musashandisa kusununguka kwenyu kutendera kupa kuyita zvo nyama, asi ngo rudo shandirananyi umwe kuno umweni.

¹⁴ Ngokuti mipango yese inozajiswa ngo izwi rimwe, rinoti: Unozomuda muvakihwana wako kudari ngo kujida kwako iwewe.

¹⁵ Asi kudari mwechirumana no kuhana ngo chenyu, ngwaranyi kuti musazopejana.

Kufambiswa ngo Mweya wa Mwari

¹⁶ Asi ndinoti: Fambanyi ngo Mweya, nemwi amuzoiti kuemura kwo nyama.

¹⁷ Ngokuti nyama inoemura kurwisana no Mweya, no Mweya unorwisana no nyama; ngokuti izvi zvinovengana chimwe no chimweni; kuti amungaiti izvo zvomunoda.

¹⁸ Asi kudari mwechikweviwa ngo Mweya, amuri pasi po mipango.

¹⁹ Zvino mishando yo nyama inovoneka pambhene, ndiyo iyi: Kuomba, kusikasukiki, kuemura,

²⁰ kudira muezaniso, uroi, kunyenya, hasha, chishatihwa, ushungu, kujida, kuparajana, kujijisa zvakasiyana,

²¹ thima, kurejera, kushadaya, kuhisa no zvakadaro: Ndinomupanga kudari ngo zvo ndakamupanga ngo pamberi, kuti avo vanoyita zvakadaro avazogari ndhaka yo Umambo hwa Mwari.

²² Asi michero yo Mweya iri: Rudo, kudakara, kunyarara, kusengerera, nyasha, kunaka, kugondeka,

²³ kupfava, kujibata; akuna mupango inorwisana no zvakadari.

²⁴ Naavo vari va Kristu vakakohomera nyama pamwepo no kudisisa kuemura kwayo.

²⁵ Kudari techipona ndi Mweya, ngatifambezve ndi Mweya.

²⁶ Tisajikuja, nokuti kutshenekerana, nokuti kuitirana thima.