Vagaratiya 4 - NOVO TESTAMENTO EM NDAU

¹ Asi ndinoti kuti mukuvo wese waachiri ndumure, uwo unogara ndhaka, aana chaanoparajana ndicho kuna hloko, pikija ari mambo wazvo zvese;

² asi ari pasi po vangwariri no vareri mbhera igume nguva yakaemeswa ndi baba.

³ Ngokudaro naisisuvo, apo tichiri ndumure, tainga takasungwa ngo zviito zvokutanga kwo nyika.

⁴ Asi apo kwaguma kuzarisika kwo nguva, Mwari wakatitumira Mwana wake wakabahwa ngo mujimayi, wakabahwa ari pasi po mipango,

⁵ kuti aripire avo vayiva pasi po mipango, kuti tiashire urehwa hwokuita vana.

⁶ Ngokuti muri vana, Mwari wakatumira Mweya wo Mwana wake mukati mwo mwoyo yedu, wechidanijira kuti, “Abha, Baba.”

⁷ Ndizvo iwewe auchaiti hloko, asi uri mwana, kudari uri mwana, unogara ndhaka ngokuda kwa Mwari.

Kutambujika kwa Pauri ngo Vagaratiya

⁸ Asi ngonguva iyo musati mwaziva Mwari, mwayiva varanda vo izvo zvo chibarihwe zvayinga zvisiri mwari.

⁹ Asi zvino mwamuziva Mwari, kukuru kuzivika ndi Mwari, mwahwirira ngenyi sure kuna izvo zviito zvokutanga zvisina simba, zvo urombo, zvo munoda kusungwazve ndizvo?

¹⁰ Munongwarira mazuva, no mweji, no nguva, no makore.

¹¹ Ndinomutyira, kuti ngo njira nokuti yakadini ndakashanda pasina shwiro pakati penyu.

¹² Ndinomupota, hama, itanyi vakadari ndini, ngokuti inini ndakadari ndimwi, amuzivi kundishaishira;

¹³ asi munoziva kuti kwayiva kuhwajihwa kwo muviri, kuti ndakachumaira vhangeri kwomuri pakutanga.

¹⁴ Pikija ukwo kwayiva chiejo kwomuri, amuzivi kundishora, nokuti kundiramba; asi mwakandiashira kudari ndiri ngirosi ya Mwari, kudari ndi Kristu Jesu.

¹⁵ Kuri kwapi kudakara kwenyu? Ngokuti ndinoita chapupu kwomuri kuti kudari zvaibvira, inga mwakabvita majiso enyu mukaapa kwendiri.

¹⁶ Ndizvo ndaita mukorore wenyu here ngokuti ndinovereketa gwinyiso kwomuri?

¹⁷ Vanomuputaputira kumupshaka ngo njira isikazivi kunaka; asi vanoda kumuphiningijira kunja, kuti imwimwi muvaputaputire.

¹⁸ Asi zvakanaka kuputaputihwa ngo njira yakanaka ngo nguva jese, haiwa kwega apo ndinemwi.

¹⁹ Vana vangu vadoko, vondinotambujikira mbhera Kristu abahwe mukati mwenyu,

²⁰ ndingada kuti ndivepo nemwi zvino, kuti ndisanduje izwi rangu; ngokuti ndinokangaijwa ndimwi.

Vana vo ndhaka yo chigondiso cha Mwari

²¹ Ndibvunjenyi, imwimwi munoda kutongwa ngo mupango, amuzvizwi here zvounonanga?

²² Ngokuti kwakatahwa, kuti, Abrahama vayiva no vana vaviri, umwe wakabahwa ngo murandakaji, no umweni wakabahwa ngo mukaji wakasununguka.

²³ Asi mwana wo murandakaji wakabahwa ngo kwo nyama; asi mwana wo mukaji wakasununguka wakabahwa ngo kwo chigondiso.

²⁴ Izvi zvina chijijo cho muezaniso: Ngokuti ava vakaji vaviri vari muezaniso wo zvitenderano zviviri; chimwe chazvo chechibva kudundhu ro Sinai, chechibereka vana vo uranda, icho chiri muezaniso wa Hagari.

²⁵ Zvino uwu Hagari ari dundhu ro Sinai mu Arabhiya, unoezaniswa no Jerusarema rindoripo ngokuti uri mukusungwa pamwepo no vana vake.

²⁶ Asi Jerusarema iro ro mugore riri rakasununguka, ndiro riri mayi wedu.

²⁷ Ngokuti kwakatahwa, kuti: “Dakara iwewe ngomwa usikabari: Pururija, udanijire, iwewe usikazivi kuhwajihwa ngo kubara; ngokuti vanopinda kuwanda vana vo mukaji wakasiiwa, kuno uwo ano mwamuna.”

²⁸ Zvino isisu, hama, tiri vana vo chigondiso kudari ndi Isaka.

²⁹ Asi kudari ngozvakaitika ngo uwo mukuvo, iye wakabahwa ngo kwo nyama wakatambuja uwo wakabahwa ngo kwo Mweya, zvakandodaro nawari.

³⁰ Asi matahwa anoti kudini? Anoti, “Mbirimbija uwo mukaji wo uranda no mwana wake”; ngokuti mwana wo murandakaji aatongozogari ndhaka pamwepo no mwana wo mukaji wakasununguka.

³¹ Ndizvo hama, isisu atiri vana vo uwo ari murandakaji, asi tiri vo uwo wakasununguka.