Vagaratiya 3 - NOVO TESTAMENTO EM NDAU

Kukomborehwa ngo kugonda

¹ Imwimwi Vagaratiya mapenji! Ndiyani wakamuroya? Imwimwi pamberi po majiso enyu Jesu Kristu wakapangijihwa pambhene ari wakakohomehwa?

² Ichi chega chondinoda kuzwa ndimwi, mwakaashira Mweya ngo mishando yo mipango here? Nokuti ngokuzwa ngo kugonda?

³ Muri mapenji akadari here? Mwakatanga ndi Mweya, wari mwogumisira ngo zvo nyama here?

⁴ Mwakatambujikira zviro zvakawanda kudaro Kusina shwiro kani? Kudari ngo gwinyiso kuri Kusina shwiro.

⁵ Uwo unomupa Mweya, achishanda mishamiso pakati penyu, anozviita ngo mishando yo mipango here, nokuti ngo kuzwa kwo kugonda?

⁶ Kudari ndi Abrahama wakagonda Mwari, nakwo kwakaverengehwa kwaari kuti kuri kururama.

⁷ Zvino munovona kuti avo vanokugonda ndivona vari vana va Abrahama.

⁸ No matahwa echivona ngo pamberi kuti Mwari unozopembeja vo majinja ngo kugonda, akachumaira vhangeri kare kuna Abrahama echiti: “Ndiwe majinja ese anozodakajiswa.”

⁹ Ndizvo avo vari vo kugonda vanodakajiswa pamwepo na Abrahama uwo vayiva unogondeka.

¹⁰ Ngokuti vese avo vanogonda kuna mishando yo mipango vari pasi pechituko: “Ngokuti kwakatahwa, vakatukwa vese vasikangwariri zvese zvakatahwa mu tshamba yo mipango kuti vazviite.”

¹¹ Zvino kuri pambhene kuti apana mundhu unopembejwa ngo mipango pamberi pa Mwari; ngokuti, “Vakarurama vanozopona ngo kugonda.”

¹² No mipango ajiripi jo kugonda; asi, i ye unozojiita unozopona ndijo.

¹³ Kristu wakatiripira kubva kwo kutukwa kwo mipango, iye waitwa wakatukwa ngo ndava jedu: Ngokuti kwakatahwa, “wakatukwa mundhu wese unopaikwa pa muti.”

¹⁴ Kuti rukomborero hwa Abrahama uviye panyezuru po vo majinja ndiye Kristu Jesu; kuti tiashire chigondiso cho Mweya ngo kugonda.

Chigondiso cha Mwari no mupango

¹⁵ Hama, ndinovereketa kudari ngo maitiro wo vandhu: Akuna mundhu ungaita chitenderano cho vandhu kuti chiite chisina shwiro, kuchibvisa pikija kuchiengejera.

¹⁶ Zvino zvigondiso zvakaitwa kuna Abrahama nokuno mubarihwana wake, azvinangi: “No kumibarihwana”, kuno yakawanda, asi kuno umwe, no kumubarihwana wako, uri Kristu.

¹⁷ Chondinovereketa ngaichi: Mupango wakaviya mazana marongomuna no makumi matatu (430) o makore, ngosure achingaiti kuti chiite chisina shwiro chitenderano chayinga chakaemeswa ndi Mwari ngo pamberi, kuti chigondiso cha Mwari chikonehwe.

¹⁸ Ngokuti kudari ndhaka yechipuwa ngo kungwarira mupango, aichipi yo chigondiso, asi Mwari wakaitatija kuno Abrahama ngo chigondiso.

¹⁹ Mipango ngo yenyi? Iyo jakanyengejehwa ngondava yo uposi, mbhera mubarihwana ugume, uwo wakaitihwa chigondiso; nacho chakaemeswa kunangwa ngo ngirosi ngo muiyanisi.

²⁰ Zvino muiyanisi aanangi umwe basi; asi Mwari ndiumwe.

²¹ Ndizvo mipango yinorwisana kani no zvigondiso zva Mwari? Kusazodaro: Ngokuti kudari wayinga wakaitika kuti kungavapo mupango uno simba ro kuponesa, ngokudaro ngo gwinyiso kururama kwaizovapo ngo mipango.

²² Asi matahwa akaphiningijira zvese pasi po kushaisha, kuti chigondiso icho chiri ngo kugonda kuna Jesu Kristu chipuwe kwavari vanotenda.

²³ Asi kugonda kusati kwaguma, tayiva pasi po mipango, takasungwa, mbhera kutenda kupangijihwe.

²⁴ Ndizvo mipango yakaita mujijisi wedu wo nguveyo kutiviisa kuna Kristu, kuti tipembejwe ngo kugonda.

²⁵ Asi zvino apo kugonda kwaguma, atichiri pasi po mujijisiwo;

²⁶ ngokuti muna Jesu imwimwi mwese muri vana va Mwari ngo kugonda.

²⁷ Ngokuti avo vese pakati penyu vakabhapatiswa kuna Kristu, mwakamusimira Kristu.

²⁸ Akuchina muJudha, nokuti mugiriki, akuchina hloko nokuti wakasununguka, akuchina mwanarume nokuti mwanakaji: Ngokuti imwimwi mwese muri umwe kuna Kristu Jesu.

²⁹ Nokudari muri va Kristu, ndizvo muri vo mubarihwana wa Abrahama, muri vanogara ndhaka kudari ngo chigondiso.