Vagaratiya 2 - NOVO TESTAMENTO EM NDAU

Pauri unoashihwa ngo vapostori vamweni

¹ Ndizvo ngosure kwo mukuvo wo makore ari gumi na marongomuna ndakahwirirazve Jerusarema, pamwepo na Bharnabha, ndikatoravo Titosi.

² Neni ndakakwireyo ngo kuvoniswa; ndakavapangijira vhangeri rendinochumaira pakati po majinja, asi ndakaripangijira kuna vakuru vari vega, kuitira kuti ndisagogoma, nokuti ndayiva ndakagogoma pasina shwiro.

³ Zve, na Titosi vayiva neni, ari mu Giriki, aazivi kuvangijihwa kuti achekwe.

⁴ Asi ndakaita kudaro ngo ndava jo hama jo kunyepa ijo jakanghwiniswa tichikazivi, vachinghwinemwo ngo kufishika kuti vadongorire kusununguka kwedu kwo tinakwo kuna Kristu Jesu kuti vatinghwinise mu uhloko.

⁵ Kwavari atizivi kuvatendera kuti vatinyise no nguva imwe hayo; kuti gwinyiso ro vhangeri rigare nemwi.

⁶ Asi kubva kuna avo vayiva no mbiri yokuti vari vakuru (pikija vari vakadini, azvina ndava kwendiri; Mwari aasani undhu hwo mundhu) avo, ndinoti, vayiva vano mbirikira avazivi kuengejera chiro kwendiri.

⁷ Asi paugaro pazvo, apo vavona kuti inini ndakapuwa vhangeri kuna vasikazivi kuchekwa, kudari ngo zvaakapuwavo Pedru vhangeri kuna vakachekwa.

⁸ (Ngokuti uwo wakashanda kuna Pedru kuti aite zvo upostori kuna vakachekwa, wakashandavo kwendiri kuti ndiite zvo upostori kuna vo majinja).

⁹ Naapo vakavona nyasha jakapuwa kwendiri, Jakobe na Khefasi na Johani, avo vaizwi vari majiro vakatibata inini na Bharnabha ngo nyasha jo kumuho ngo ukama, kuti isisu tiende kuno vo majinja, navo vaende kuno vakachekwa.

¹⁰ Kwega vaida kuti tirangarije ngo varombo; icho chayiva cho ndayivangirira kuyita inini.

Pauri unongwaja Pedru

¹¹ Asi apo Pedru aguma Antiyoki, ndakamukanija pamberi po hope yake, ngokuti vayiva uno ndava.

¹² Ngokuti ngopamberi vasati vaguma vakatikuti vechibva kuna Jakobe, iye, wakaha pamwepo no vo majinja, asi apo avo vaguma, wakareya wakabvepo pachake, echivatya vayiva vo vakachekwa.

¹³ No vamweni vo vajudha vakajiitisa kudaro pamwepo naye; kuti na Bharnabha wakapaukiswavo ngo kujiitisa kwavo.

¹⁴ Asi apo ndavona kuti avazivi kufamba ngo kuteveja, gwinyiso rovhangeri, ndakati kuna Khefasi pamberi pavo vese: Kudari iwewe uri mu Judha, unogara kudari ngovari vo majinja, usikaiti kudari ngo zvo vanoyita vajudha, unovavangijirenyi vari vo majinja kuti vagare kudari ngo zvovanoita vajudha.

¹⁵ Isisu tiri vajudha ngo chibarihwe, tisiri vashaishi vo majinja.

¹⁶ Asi techivona kuti mundhu aapembejwi ngo mishando yo mipango, asi kwega ngo kugonda kuna Kristu Jesu, itisu nesu takatenda kuna Jesu Kristu kuti tipembejwe ngo kugonda kuna Kristu, andikwopi ngo kuyita mishando yo mipango ngokuti ngokuita mishando yo mipango akuna mundhu ungazopembejwa.

¹⁷ Asi apo taipshaka kupembejwa kuna Kristu, nesuvo pachedu takavoneka tiri vashaishi, ngokudaro Kristu uri mushandi wo kushaisha here? Haiwa.

¹⁸ Ngokuti kudari ndechizovakazve izvo zvo ndakapwanya, ndinojivonisa kuti ndiri mupauki.

¹⁹ Ngokuti inini ngo mipango ndakafa, kuna mipango, kuti ndipone kuna Mwari.

²⁰ Ndakakohomehwa pamwepo na Kristu; asi ndinopona; asi andinipi ndichapona, asi ndi Kristu unopona mukati mwangu, no ndaramo yo ndinopona wari, ngo kwo muviri, ndinopona ngo kugonda kuri kuna Mwana wa Mwari, uwo wakandida, wakajipira ngo ndava yangu.

²¹ Andirerusi nyasha ja Mwari: Ngokuti kudari kururama kwechizovapo ngo mipango, ngokudaro Kristu wakafa pasina shwiro.