Vagaratiya 1 - NOVO TESTAMENTO EM NDAU

Muchungamijo

¹ Pauri, mupostori, (andihwopi hunobva ku vandhu akadi, zve, andihwopi hwo mundhu, asi ndiye Jesu Kristu, na Mwari Baba uwo wakamumusa kwo vakafa),

² no hama jese jineni, kuzviara zvo Garatiya:

³ Nyasha kwomuri, no kunyarara zvinobva kuna Mwari Baba, nokuna Mambo wedu Jesu Kristu,

⁴ uwo wakajipira ngondava yo zvishaishi zvedu, kuti atiregerere kubva ku nyika ino yakashata, kudari ngokuda kwa Mwari Baba wedu,

⁵ kwaari ngakuvepo uthende kunoti mbhera narini. Ameni!

Akuna vhangeri rimweni

⁶ Ndinoshama kuti mwakakasira kudari kubva kwaari uwo wakamudanija ngo nyasha ja Kristu, kuenda kuna rimweni vhangeri;

⁷ iro richipi vhangeri rimweni akadi, kwega variyo vamweni vanomukhanganisa, vanoda kupaukisa vhangeri ra Kristu.

⁸ Asi pikija tiri itisu, pikija iri ngirosi inobva mugore, ikachumaira kwomuri vhangeri rakasiyana kuna iro ro takachumaira kwomuri, ngaitukwe.

⁹ Kudari ngo zvo takavereketa ngo pamberi, ndinovereketazve kudaro wari, kuti: Kudari aripo mundhu unochumaira kwomuri vhangeri rakasiyana na iro romwakaashira, ngaatukwe.

¹⁰ Ngokuti wari ndinopshaka kudiwa ngo vandhu here, nokuti Mwari? Nokuti ndinopshaka kudakarisa vandhu kani? Kudari ndayiva ndechindodakajisa vandhu, ngokudaro andingaiti muranda wa Kristu.

Kudanijwa kwa Pauri

¹¹ Ngokuti ndinozivisa kwomuri, hama, ngo ndava yo vhangeri rakachumaihwa ndini, kuti richayiva ro vandhu.

¹² Ngokuti andizivi kuriashira, nokuti kurijijiswa, kubva ku mundhu, asi rakaviya kwendiri ngo kupangijihwa ndi Jesu Kristu.

¹³ Ngokuti mwakazwa ngo ndaramo yangu yo nguva yakapinda, mumaitiro ochiJudha, kuti ngo njira inopinda kushata, ndakatambuja chiara cha Mwari, ndikachiparaja.

¹⁴ Neni ndakapinda vazhinji vondanga yangu mukudira kwo vaJudha, pakati po vandhu vo jinja rangu, ndechivapinda kukuru mukungwarira maponero omajibaba angu.

¹⁵ Asi apo kwakamudakajisa Mwari, uwo wakandiparajanisa kubva mu ndani ya mayi wangu, wakandidanija ngo nyasha jake.

¹⁶ Kuti apangijire kwendiri Mwana wake, ndimuchumaire pakati po vomajinja; paripo andizivi kubvunjisa nokuno nyama no ngazi.

¹⁷ Zve, andizivi kukwira Jerusarema kuna avo vayiva vapostori kutangira inini: Asi ndakaenda Arabhiya; ndohwirirazve Dhamaseku.

¹⁸ Kwakati ngosure kwo makore matatu ndakakwira Jerusarema kwoovonana na Khefasi, ndakagara naye mazuva ari gumi na mashanu.

¹⁹ Asi andizivi kuvona vamweni vo vapostori, kwega Jakobe hama ya Mambo.

²⁰ Zvino ngo ndava yo zviro zvo ndinotara kwomuri ringiranyi, mukuvona kwa Mwari, andinyepi.

²¹ Sure kwo izvi ndakaviya ku nyika yo Siriya noyo Kirikiya.

²² Ndisikazivi kuzivika ngo hope kuna zviara zvo Judhia zvayiva kuna Kristu.

²³ Asi kwega vakazwa kuti: “Uwo waititambuja ngo pamberi, wari unochumaira ukwo kutenda kwaakaparajanisa ngo pamberi.”

²⁴ Navo vakakuja Mwari ndini.