Vafiripi 4 - NOVO TESTAMENTO EM NDAU

Zvikonokejo

¹ Ndizvo, hama jangu, jinodikana no jinosuwira, muri kudakara kwangu no junguja rangu, ngokudaro imanyi mwakagwinya kuna Mambo, vanodikana vangu.

² Ndinopota Uodiya, ndinopota Suntuka, kuti vave no mupinimijo umwewo kuna Mambo.

³ Eya ndinokumbiravo, iwewe mushandi wo gwinyiso neni mukanga, besera ao majimayi, vashandi pamwepo neni muvhangeri, na Krementi naye, no vamweni vari vadoni vangu mukushanda, ivo mazina avo ari mubhuku ro kupona.

⁴ Dakaranyi kuna Mambo ngo nguva jese; zve, ndinoti, dakaranyi.

⁵ Kupfava kwenyu ngakuzivikanwe ku vandhu vese. Mambo waaphedo.

⁶ Musan'un'utira chiro; asi ngo zviro zvese ngo kukumbira, na ngo kupota pamwepo no kubonga, mikumbiro yenyu ngaizivikanwe kuna Mwari.

⁷ No kunyarara kwa Mwari, kunopinda kuzwisisa kwese, kunozongwarira mwoyo yenyu no mipinimijo yenyu kuna Kristu Jesu.

⁸ Pakugumisira, hama, izvo zviri zvo gwinyiso, izvo zvinoreremejeka, izvo zviro zvakarurama, izvo zviri zvakachena, izvo zvinodikana, no izvo zvine mbiri yakanaka; kudari kuripo kunaka, kudari kuripo kukujwa, pinimijanyi ngo izvi zviro.

⁹ Izvo zvomwakajija no kuashira, no kuzwa, no kuvona, kwendiri, itanyi izvozvo; na Mwari wo kunyarara unozova nemwi.

Pauri unobonga zvipo

¹⁰ Asi ndakadakara kakurutu kuna Mambo, kuti zvino pakupejisira mwakamusisira kupinimija ndini; pikija ngo gwinyiso mwaipinimija, asi mwakatama mukuvo.

¹¹ Andikwopi kuti ndinovereketa ngo ndava yo kutama; ngokuti ndakajija kukwaniswa pikija ngouri ugaro hwendinahwo.

¹² Ndinoziva kuva muurombo, nokuva mupfumizve; kuzviro zvese no pakati pazvo zvese ndakajija zvakafishika zvese kugutiswa no kuva no njara, zvese no kupfuma no urombo.

¹³ Ndingagwinya kuyita zvese ndiye Kristu unondigwinyisa.

¹⁴ Asi mwakaita zvakanaka kuti mwakazwirana neni mukutambujika kwangu;

¹⁵ nemwi munozivazve imwimwi vaFiripi, kuti mukutanga kwo vhangeri, apo ndabva Makedhoniya, apana chiara chakazwirana neni ngo ndava yo kupa, no yo kuashira, asi imwimwi mwega.

¹⁶ Pikija ndiri mu Tesaronika, kamwe no kwo chipirizve mwakatuma kundibesera mukutama kwangu.

¹⁷ Andikwopi kuti ndinopshaka chipo; asi ndinopshaka michero yo munozopfumiswa ndiyo.

¹⁸ Asi ndave no zviro zvese, ndapfumiswa; ndakwaniswa, ndaashira kubva kuna Epafrodhitu izvo zvakabva kwomuri, zviri gwema rakanaka zviri mudiro unoashirika unonasa kudakaja Mwari.

¹⁹ Asi Mwari wangu unozomuzarisa ndizvo zvese zvomunotama, kudari ngo uwandu hwo upfumi hwake muuthende ndiye Kristu Jesu.

²⁰ Zvino kuna Mwari Baba wedu ngakuve no uthende kunoti mbhera narini. Ameni.

Muchungamijo jo kupejisira

²¹ Tambisanyi vakacheneswa vese vari kuna Kristu Jesu. Hama jineni jinomutambisa.

²² Vese vakacheneswa vanomutambisa, kakurutu avo vembhuri ya Khesari.

²³ Nyasha ja Mambo Jesu Kristu ngajive no mweya yenyu.