Vafiripi 3 - NOVO TESTAMENTO EM NDAU

Kristu ndimukuru kuzvese

¹ Pakugumisira, hama jangu, dakaranyi kuna Mambo. Kutara kudaro kwomuri akunesi kwendiri, asi kwomuri kuri kungwaririka.

² Ngwariranyi imbhwa, ngwariranyi vashandi vo zvakashata, ngwariranyi vanochekwa!

³ Ngokuti isisu tiri vakachekwa, tiri vanodira Mwari ndi Mweya, no kuganza ndi Kristu Jesu, tisikagondi nyama.

⁴ Pikija ininivo ndinazvo zvondingagonda mu nyama; kudari aripo mundhu unokarakaja kuti ungagonda nyama, inini ndingamupinda:

⁵ Ndakachekwa ngo zuva ro chisere, ndiri wo mubarihwana wo Israeri, ndiri wo jinja ra Benjamini, ndiri muHebheru wo vaHebheru; ngo mipango ndiri mufarisi;

⁶ ngo ndava yo kutsamwirira ndaitambuja chiara; ngo ndava yo kururama kwo mipango inga ndisina ndava.

⁷ Asi izvo zvayiva kuviihwa kwendiri, ndakazviverenga kuti zviri zvisina shwiro ngo ndava ya Kristu.

⁸ Eya, ngo gwinyiso ndinozviverenga zvese kuti zviri zvisina shwiro ngo ndava yo kunaka kukuru kwo kumuziva Kristu Jesu, Mambo wangu. Uwo ngo ndava yake ndakatenda kurashikihwa ngo zviro zvese, neni ndinozviverenga kuti zviri svina, kuti ndiviyihwe ndi Kristu,

⁹ ndivoneke kwaari ndisina kururama kuri kwangu kuri kwo kungwarira mipango, asi ukwo kuri kwo kugonda kuna Kristu, kururama kuri kwa Mwari ngo kugonda;

¹⁰ kuti ndimuzive iye, no simba ro kumuka kwake no kuiyana naye mukutambujika kwake, ndechitojaniswa naye mukufa kwake;

¹¹ kuti pikija zvakadini ndikwanise kumuka kwo vakafa.

Kugogoma kuenda ku magumo

¹² Andikwopi kuti ndatokwanisa, nokuti kuyita wakaperera zvino; asi ndinovangirira kuenda mberi kuti ndingabata icho chaakandibatira Kristu Jesu.

¹³ Hama, pachangu andijiverengi kuti ndabata; asi ndinoita chiro chimwe; ndichikanganwa zviro zvosure, no kufambira izvo zviri mberi,

¹⁴ ndinogwinyisira kuenda ku magumisiro, kuvona chipuwo cho kudanijwa kwo mu denga kwa Mwari kuri kuna Kristu Jesu.

¹⁵ Ndizvo isisu tese tiri vakaperera ngative no mupinimijo wakadaro; no kudari muno mupinimijo umweni nokuti ngo chapi chiro, no ichozve Mwari unozochipangijira kwomuri.

¹⁶ Asi kwega ngatibatirire kune izvo zvotakakwanisa kuwana.

¹⁷ Hama, itanyi vanondiejerera, mwese muringire avo vanofamba kudari ndisu tiri chivonero chenyu.

¹⁸ Ngokuti vazhinji vanofamba, kudari ngo zvo ndakamubvunja ndivo kazhinji, na zvino ndinomubvunja ngo kuchema, ivo vari vakorore vo muchinjiko wa Kristu;

¹⁹ avo magumisiro avo ari kurashwa, chimwari chavo indani, no kuganza kwavo kuri kwo izvo zvinopsheruja, vanopinimija ngo zvo mu nyika.

²⁰ Asi nyika yedu iri mu gore; kubveyozve tinogarira kuviya kwo Muponesi, Mambo Jesu Kristu,

²¹ uwo unozosanduja muviri wo upasi hwedu, kuti uite unotojaniswa no muviri wo uthende hwake, kudari ngo kushanda ukwo, kwaano simba nakwo ro kupfavisa zvese kwaari.