Vafiripi 2 - NOVO TESTAMENTO EM NDAU

Kupfava no uthende hwa Kristu

¹ Ndizvo kudari kuripo kunyarariswa kuna Kristu, kudari kuripo kuembezehwa kwo rudo, kudari kuripo kuiyana kwo Mweya, kudari uripo rudo no kukungurira.

² Zarisanyi kudakara kwangu, kuti muve no mupinimijo wakadari ngo wangu no rudo hwakatojana, no chisungo chimwe, no mupinimijo umwe.

³ Musikayiti chiro ngo hasha, nokuti ngo kujitundhumaja, asi ngo kupfava kwo mupinimijo, umwe ngaumwe ngaaverenge kuti vamweni vanomupinda ngo kunaka.

⁴ Umwe ngaumwe ngaarege kuringira zviro zvake, asi ngaaringire zvo vamweni.

⁵ Uwu mupinimijo ngauve mukati mwenyu uwo wayiva mukati mwa Kristu Jesu:

⁶ Iye wayiva mumuemo wa Mwari, aazivi kupinimija kuti chiri chiro cho kukara kuezana na Mwari,

⁷ asi wakajiita usina mbiri, echijitorera muemo wo muranda, wakayita unomuemo wo mundhu;

⁸ naapo uno muemo wo mundhu, wakajipfavisa, wakayita unopurutana mbhera kufa, eya no kufa kwo pa muchinjiko.

⁹ Ndizvo Mwari wakamukuja kukurutu, akamupa zina riri panyezuru po mazina ese;

¹⁰ kuti ngo zina ra Jesu makokobvi ese amugwadamire, ovari mu gore, no vari mu nyika, no vari pasi po nyika;

¹¹ zve, kuti ndimi jese jitende kuti Jesu Kristu ndiye Mambo, kuti Mwari Baba akujwe.

Kuyita kujeka kwo nyika

¹² Ndizvo vanodikana vangu, kudari ngo zvomwakapurutana ngo nguva jese andipopi pega pondiri, asi zvino kakurutu apo ndisipo, shandisanyi ruponeso rwenyu mukutya no kuhuta.

¹³ Ngokuti ndiye Mwari unoshanda mukati mwenyu, zvese kuda no kuyita, kudari ngokuda kwake.

¹⁴ Itanyi zvese pasina kun'un'uta nokuti kuyita hasha;

¹⁵ kuti muite vasina ndava, vasikashaishi, muri vana va Mwari musina chomunoitihwa ndava ndicho pakati po mubarihwana wakashongoroka no vakapaukiswa, pakati pavo muvoneke muri vanojeka kudari ngo zvivheneko mu nyika,

¹⁶ mwechibatisisa izwi ro kupona; kuti ndive nacho cho kuganza ndicho ngo zuva ra Kristu, kuti andizivi kugogoma pasina nokuti kushanda pasina shwiro.

¹⁷ Asi kudarizve ndechiduruhwa kuyita mudiro no mumushando wo kugonda kwenyu, ndinodakara ndechidakara nemwi mwese.

¹⁸ Ngokudarozve dakaranyi imwimwi, mudakare neni.

Pauri unotuma vadoni vake

¹⁹ Asi ndinogonda kuna Mambo Jesu kukasira kutumira Timoti kwomuri, kuti inini ndiembezehwevo, apo ndaziva kugara kwenyu.

²⁰ Ngokuti andina mundhu umweni unomupinimijo wakadari ndiye, unozokarakaja ndimwi ngokugara kwenyu.

²¹ Ngokuti vese vanopshaka zvavo, zvisiri zva Jesu Kristu,

²² asi imwimwi munoziva kunaka kwake, kuti kudari ngo mwana unoshandira baba, ngokudaro iye wakashanda neni no mukufambisa vhangeri.

²³ Ndizvo ndinogonda kuti ndinozomutuma ngo kukasira apo ndazovona zvooitika kwendiri.

²⁴ Asi ndinogonda kuna Mambo kuti nenivo ndinozokasira kuviyeyo.

²⁵ Asi ndakapinimija kuti kunosisira kuti nditumire Epafrodhitu kwomuri, munukuna wangu, no unoshanda pamwepo neni uri socha pamwepo neni, naye uri ndhumwa yenyu, no unoshandira kutama kwangu.

²⁶ Ngokuti wakamusuwira imwimwi mwese, naye wakatambujika kakurutu ngokuti mwakazwa kuti waihwara.

²⁷ Ngo gwinyiso iye waihwara ari phedo po kufa. Asi Mwari wakamuitira nyasha; haiwa kwaari kwega asi no kwondirivo, kuti ndisava no kutambujika panyezuru po kutambujika.

²⁸ Ndizvo ndakakasira kutuma kwomuri, kwokuti, mwechizomuvonazve mudakare, kuti neni ndisazonyanya kusururiswa.

²⁹ Ndizvo muashirenyi muna Mambo ngo kudakara kwese; mureremeje wakadaro:

³⁰ Ngokuti ngo ndava yo mushando wa Kristu wakava phedo po kufa, echipira kupona kwake mungozi, kuti azarise izvo zvaisisira zvo mushando wenyu kwendiri.