Vafiripi 1 - NOVO TESTAMENTO EM NDAU

Muchungamijo

¹ Pauri na Timoti, varanda va Jesu Kristu, kwavari vese vakacheneswa vari kuna Kristu Jesu vari mu Firipi pamwepo no vavonisi no vashandi:

² Nyasha ngajive kwomuri no kunyarara zvinobva kuna Mwari Baba wedu na Mambo Jesu Kristu.

Kukumbirira vatendi

³ Ndinobonga Mwari wangu mikuvo yese yondinokarakaja ndimwi,

⁴ ngo nguva jese mukukumbira kwangu kwese ndimwi mwese, ndinokumbira ngo kudakara,

⁵ ngo ndava yo kuiyana kwenyu mukufambisa vhangeri kubvira kuzuva rokutanga mbhera zvino.

⁶ Ndechigonda ichi: Kuti iye wakatanga mushando wakanaka mukati mwenyu unozoupeja mbhera rigume zuva ra Jesu Kristu.

⁷ Kudari ngo zvinosisira kuti ndive no murangarijo wakadaro ndimwi mwese, ngokuti ndinemwi mu mwoyo mwangu ngokuti mukusungwa kwangu, no kujirwira no kugwinyisa vhangeri, imwimwi mwese mwakakovana neni mu nyasha.

⁸ Ngokuti Mwari uri chapupu changu, ngo njira yo ndinomusuwira mwese ndiyo kakurutu ngo nyasha huru ja Jesu Kristu.

⁹ Neni ndinokumbira ichi: Kuti rudo rwenyu ruvangirire kuwanda no kuwanjiswa mukuziva no kuzwisisa kwese;

¹⁰ kwokuti mueje muzive zviri zvakapinda kunaka; kuti muite vakacheneswa, vasina ndava mbhera rigume zuva ra Kristu.

¹¹ Mwechizariswa ngo michero yo kururama, iyo iripo ndiye Jesu Kristu, mukukuja no kuirikija Mwari.

Kupona muna Kristu

¹² Asi ndinoda kuti muzive, hama, kuti izvo zvakaitika kwendiri zvakashanda kufambisa vhangeri;

¹³ ndizvo zvisungo zvangu ngo ndava ya Kristu zvakavoneka kwavari vese vari mu nyumba ya mambo, no kuno vamweni vese;

¹⁴ no hama zhinji jiri kuna Mambo, jechigwinyiswa ngo zvisungo zvangu, jinopinda kushinga kuvereketa izwi ra Mwari jisikatyi.

¹⁵ Ngo gwinyiso vamweni vanochumaira Kristu ngo thima no hasha; no vamwenizve ngo mwoyo unoda.

¹⁶ Asi vamweni vanoyita kudaro ngo rudo, vechiziva kuti ndakaemeswa kurwira vhangeri;

¹⁷ asi vamweni vanochumaira Kristu ngo hasha, vasikaiti ngo gwinyiso, vechipinimija kututsira kutambujika kwendiri muzvisungo zvangu.

¹⁸ Ndizvo chinyi? Kwega kuti ngo njira jese, pikija ngo kujiitisa, nokuti ngo gwinyiso, Kristu unochumaihwa; neni ndinodakara ndizvo, eya, ndinozodakara.

¹⁹ Ngokuti ndinoziva kuti izvi zvinozokunukuka kuyita ruponeso rwangu, ngo kukumbira kwenyu na ngo kubesera kwo Mweya wa Jesu Kristu.

²⁰ Kudari ngo kugwinya kwo kugarira no kwo kugonda kwangu, kuti andizopsheruki ngo chiro na chimwe, asi kuti ngo kushinga kwese, kudari ngo nguva jese, kuti na zvino Kristu akuriswe mu muviri wangu pikija mukurarama nokuti mukufa.

²¹ Ngokuti kwendiri kurarama kuri Kristu, no kufa kuri kuviihwa.

²² Asi kudari ndechiva no muviri, uwu ndiwo muchero wo mushando wangu, no chondinozotsanangura andichizivi.

²³ Asi ndinomanikijwa pakati po izvi zviviri, ndinoemurira kuenda koogara na Kristu; ngokuti ndizvo zvakapinda kunaka.

²⁴ Asi kugara mumuviri kunopinda kusisira ngo ndava yenyu.

²⁵ Ndechigonda ichi, ndinoziva kuti ndinozogara, ndechivangirira kuva nemwi mwese, mukuenda mberi no kudakara mukugonda;

²⁶ kuti kukujwa kwenyu kuwande kuna Jesu Kristu ndini ngokuvapo kwanguzve nemwi.

²⁷ Kwega kuti mufambe kudari ngo zvinosisira vhangeri ra Kristu; kuti pikija ndechiviya kumuvona, nokuti ndisipo, ndingazwa ngo ndava yokugara kwenyu kuti munoyima mwakagwinya ngo mweya umwewo, ngo mwoyo umwe mwechirwira ukwo kutenda kwo vhangeri;

²⁸ musikatyiswi ngo chiro na chimwe ngo avo vanorwisana nemwi, ukwo kuri chivoniso chiri pambhene kwavari cho kurashwa, asi kwomuri kuri chivoniso cho ruponeso rwenyu, no urwo runobva kuna Mwari.

²⁹ Ngokuti kwakatendehwa kwomuri ngo ndava ya Kristu, andikwo kwega kwo kumutenda, asi kuti mutambujikevo ngo ndava yake,

³⁰ mwechiva no kuambana kwomakavona kwendiri, na zvino munozwa kuti kuri kwendiri.