Vaefesu 6 - NOVO TESTAMENTO EM NDAU

Vabari no vana

¹ Vana, purukiranyi vabari venyu ngo zviri kuda kwa Mambo, ngokuti izvi zvakanaka.

² Reremeja Baba wako na mayi wako, uwu uri mupango wokutanga uno chigondiso,

³ kuti zvinake kwouri, zve, kuti upone mukuvo wakareba mu nyika.

⁴ Imwimwi majibaba, musatsenekesa vana venyu; asi muvarere mukupangira no mukupanga kwa Mambo.

Varanda no majimambo

⁵ Varanda, purukiranyi avo vari majimambo enyu ngo kwenyama, ngokutya na ngo kuhuta ngo mwoyo wakarurama, kudari inga munoitira Kristu,

⁶ musikashandi ngo kuvoneka ngo majiso, kudari ngo vanodakajisa vandhu; asi kudari ngo varanda va Kristu, mwechiita kuda kwa Mwari kwo mumwoyo,

⁷ mwechishanda ngokuda kudari inga munoitira Mambo, kusiri ku vandhu.

⁸ Mwechiziva kuti pikija ichinyi chakanaka chaanoyita mundhu, unozochiashirazve kuna Mambo, pikija ari muranda nokuti wakasununguka.

⁹ Nemwivo majimambo, itanyi zvakadaro kwavari, murege kuvatyisijira; mwechiziva kuti Mambo wavo no wenyuzve uri mu gore, kwaari akuna mutsananguro ku vandhu.

Kurwa no zvakashata

¹⁰ Pakugumisira, itanyi vakagwinya kuna Mambo, no kugwinya kwo simba rake.

¹¹ Simiranyi ndhumbi jese jo kurwa ndijo ja Mwari kuti mukone kuyima kurwa no mazano aDhiabhorosi.

¹² Ngokuti atirwi no nyama no ngazi, asi tinojipana no umambo, no vano simba, naavo vanotonga nyika yo chidima chino, no mweya yakashata yo mundau jo mu gore.

¹³ Ndizvo toranyi ndhumbi jese jokurwa ja Mwari, kuti mukone kurwisa ngo zuva rakashata no kugara mwakayima apo mwapeja zvese.

¹⁴ Ndizvo imanyi, mwakasimira gwinyiso muzviunu zvenyu, mwadira chihlangu cho paditi, chiri kururama,

¹⁵ mwakasimira mutshoka jenyu kunasirihwa kwo vhangeri ro kunyarara;

¹⁶ panyezuru po izvi zvese toranyi chihlangu cho kugonda, cho munozokona kujima ndicho miseve yese yo muriro yo uwo wakashata.

¹⁷ Toranyizve chigqoko cho ruponeso, no shoti yo Mweya riri izwi ra Mwari.

¹⁸ Ngo kukumbira kwese no kupota, mwechikumbira ngo nguva jese mu mweya, mwechingwarira kuyita kudaro ngo kuvangirira kwese no kukumbirira vakacheneswa vese,

¹⁹ no kukumbira ngo ndava yangu kuti ndipuwe ukuru hwo kuvereketa ngo kushinga, kuti ndizivise chakafishika cho vhangeri,

²⁰ iro ngo ndava yaro ndiri samukuru wo kusungwa; kuti ndiverekete ngo kushinga ndiro, kudari ngo zvinosisira kuti ndiverekete.

Mazwi okupejisira

²¹ Asi kuti muzive magariro angu, no zvendinoita, Tukiko munukuna unodikana mutungamiriri unogondeka kuna Mambo, unozomuzivisa zvese,

²² ndakamutumira kwomuri ndava iyi, kuti muzive kugara kwedu, zve, kuti iye aembezere mwoyo yenyu.

²³ Kunyarara ngakuve no hamadoni no rudo pamwepo no kugonda, zvinobva kuna Mwari Baba na Mambo Jesu Kristu.

²⁴ Nyasha ngajive kwavari vese vanomuda Mambo wedu Jesu Kristu ngo kusingaperi.