Vaefesu 5 - NOVO TESTAMENTO EM NDAU

¹ Ndizvo itanyi vatevejeri va Mwari, kudari ngo vana vanodikana;

² mufambe ngo rudo, kudarizve ndi Kristu wakamuda, wakajipira ngo ndava yedu, kuyita mudiro no mubairo kuna Mwari, zviite gwema rakanaka.

³ Asi upombo, no zvinosvipisa zvese, no kuemura, zvisazovereketwa ndizvo pakati penyu, kudari ngo zvinosisira vakacheneswa.

⁴ Nokuti svina, nokuti kuvereketa zvo upenji, nokuti zvinobaya mwoyo zvisikasisiri, asi paugaro po izvo, ngakuitwe kubonga.

⁵ Ngokuti munonasa kuziva izvi: Kuti akuna nyaupombo nokuti wakasvipiswa, nokuti unoemura uri mudiri wo muezaniso, unozoashira ndhaka mu Umambo hwa Kristu na Mwari.

Kupona mukujeka kwa Kristu

⁶ Musachengejehwa ngo mundhu ngo mazwi asina shwiro, ngokuti ngo ndava yo izvi hushungu hwa Mwari hunoviya panyezuru po vana vasikapurukiri.

⁷ Ndizvo musavhengana navo;

⁸ ngokuti imwimwi kare mwayiva chidima, asi zvino muri kujeka kuna Mambo; fambanyi kudari ngo vana vo kujeka,

⁹ (ngokuti michero yo kujeka iri kunaka kwese no kururama no gwinyiso),

¹⁰ mwechieja kuziva zvinonasa kudakajisa Mambo.

¹¹ Musikaiyani no mishando yo chidima isina michero, asi paugaro po izvo kuti muimbirimbije.

¹² Ngokuti zvinopsheruja no kuvereketa ngo izvo zvinoitwa ndivo mukufishika.

¹³ Asi zvese apo zvinombirimbijwa zvinovoneka ngo kujeka, ngokuti zviro zvese zvinovoniswa zviri kujeka.

¹⁴ Ndizvo iye unoti: Mukai iwewe unovata, umuke kwo vakafa, na Kristu unozokubvenekera.

¹⁵ Ndizvo nasanyi kungwara mukufamba kwenyu, musikadari ngo mapenji, asi kudari ngo vakangwara,

¹⁶ mwechingwarira mukuvo, ngokuti mazuva ari akashata.

¹⁷ Ndizvo musaita mapenji, asi mwechiziva zviri kuda kwa Mambo.

¹⁸ Musarejera ngo vhini, iro rinopara kusikajibata, asi mwechizariswa ndi Mweya;

¹⁹ mwechivereketa umwe kuno umweni ngo nduyo no ngoma, ngo kuemba kwo Mweya, mwechiemba ngo kutetemba ngo mwoyo yenyu kuna Mambo.

²⁰ Mwechibonga kuna Mwari Baba ngo zviro zvese ngo nguva jese ngo zina ra Mambo wedu Jesu Kristu.

Maponero wo vakachadha

²¹ Mwechipfavirana umwe no umweni mukutya Kristu.

²² Vakaji, pfairanyi vamuna venyu, kudari ngo zvomunoita kuna Mambo.

²³ Ngokuti mwamuna uri musoro wo mukaji, kudari ndi Kristu uri musoro wo chiara, ari muponesi wo muviri.

²⁴ Asi kudari ngo chiara chinomupfavira Kristu, ngokudaro vakaji ngavapfavire vamuna vavo ngo zviro zvese.

²⁵ Vamuna idanyi vakaji venyu, kudarivo ndi Kristu wakachida chiara wakajipira ngo ndava yacho;

²⁶ kuti achichenese, ayinga achisuka ngo kusamba kwo kumwa ngo izwi,

²⁷ kuti ajiviisire chiara kwaari chiri chiara chino uthende, chisina ndava nokuti kuonyana, nokuti chiro chimweni chakadaro; asi kuti chiite chakacheneswa chisina chishaishi.

²⁸ Ngokudaro kunodikana kuti vamuna vade vakaji vavo kudari ngo zvovanoda muviri yavo, uwo unoda mukaji wake unojida pachake.

²⁹ Ngokuti apana mundhu unonyenya nyama yake; asi unoikorondha no kuingwarira kudari ngo zvaanoitazve Kristu kuna chiara;

³⁰ ngokuti isisu tiri ndhengo jo muviri wake.

³¹ Ngo iyi ndava mundhu unozosia Baba wake na mayi wake unozobatana no mukaji wake; navo vaviri vanozoita nyama imwe.

³² Ichi chiri chakafishika chikuru; asi ndinovereketa ngo ndava ya Kristu no chiara.

³³ Asi umwe ngaumwe wenyu ngaade mukaji wake kudari ngo zvaanojida pachake; no mukaji ngaangwarire kuti atye mwamuna wake.