Vaefesu 4 - NOVO TESTAMENTO EM NDAU

Kukura mu rudo no kuiyana

¹ Ndizvo inini, musungwa wa Mambo, ndinomupota kuti mufambe ngo zvinosisira kudanijwa kwo mwakadanijwa ndikwo.

² Ngo kujininipisa kwese no kupfava, na ngo kusengerera, mwechisengerera umwe no umweni ngo rudo;

³ mwechivangirira kungwarira kuiyana kwo Mweya ngo chisungo cho kunyarara.

⁴ Uripo muviri umwe, no Mweya umwe, kudari ngo zvo mwakadanijwa mukugonda kumwe kwo kudanijwa kwenyu;

⁵ Mambo umwe, gonda rimwe, rubhapatiso rumwe,

⁶ Mwari umwe, vari Baba wedu tese, vari panyezuru pavo vese, zvese zvakavapo ndiye, naye uri mukati mwenyu mwese.

⁷ Asi kwetiri tese nyasha jakapuwa kudari ngo kuwanda kwo zvipo zva Kristu.

⁸ Ndizvo unoti: “Apo akwira mu gore wakatora vakabatwa, akapa zvipo ku vandhu.”

⁹ Zvino, kuti; iye wakakwira, zvinorevenyi kwega kuti wakabzukazve kundau jiri pasi mu nyika?

¹⁰ Uwo wakabzuka ndiyezve wakakwira ngo panyezuru mu makore ese, kuti azarise zviro zvese.

¹¹ Ndiye wakapa vamweni kuti vayite vapostori; no vamweni kuyita vaprofeti, no vamweni kuyita vavhangeri, no vamweni kuyita vahavisi no vajijisi,

¹² kuti vakacheneswa vaperere, ku mushando wo kushandira, kwo kuvaka muviri wa Kristu;

¹³ mbhera tigume pakutenda kumwe, kuziva Mwana wa Mwari, kuyita vandhu vakaperera, kuezana no ukuru hwakaperera hwa Kristu;

¹⁴ kuti tichagara tiri vana vadoko, techizungunyiswa ngo kujijisa kwese kwakaparajana, ngo mazano ovandhu, no urimbwi, kuti vapaukise ngo kuchengeja;

¹⁵ asi techivereketa gwinyiso ngo rudo, tikure kwaari ngo zviro zvese, uwo uri soro, ndi Kristu,

¹⁶ kwaari muviri wese wechirunganijwa no kubatanijwa kudari ngo zvinosisira ngo izvo zvinopuwa ngo ndhengo jese, kudari ngo mushando wakaemesehwa ndhengo imwe ngaimwe, zvinoita kuti muviri ukure kuti ujivake murudo.

Homi hupsha muna Kristu

¹⁷ Ndizvo ndinovereketa izvi, no kupupura kuna Mambo, kuti muchafambazve kudari ngo vo majinja, mu mipinimijo yavo isina shwiro,

¹⁸ vasikanasi kuzwisisa, vari vo nyikanja mukupona kwa Mwari ngo ndava yo kutama kuziva kwavo, na ngo ndava yo kupata kwo mwoyo yavo;

¹⁹ avo vechiita vasikazwi vakajipira mukuemura, vechishanda zvese zvina svina no upombo.

²⁰ Asi imwimwi amuzivi kujija zvakadaro kuna Kristu;

²¹ kudari zvakadaro kuti mwakamuzwa mukajijiswa ndiye, kudari ngo gwinyiso riri kuna Jesu,

²² rokuti murashe mundhu wo kare, ukwo kunoti kupona kwenyu kwo kare, uwo unovoreswa ngo kuemura kwo kuchengeja;

²³ zve, kuti mumusijihwe mu mweya wo mupinimijo yenyu,

²⁴ kusimira mundhu mupsha, uwo wakasikwa ndi Mwari mukunaka no mukucheneswa kwo gwinyiso.

Mipango yo kupona kupsha

²⁵ Ndizvo mwechiregera kunyepa, vereketanyi gwinyiso mundhu wese kuno muvakihwana wake, ngokuti tiri ndhengo umwe kuno umweni.

²⁶ Tsenekanyi, musikashaishi; musatendera kuti zuva ribire mwakatseneka.

²⁷ Zve, musapa ndau kuna Dhiabhorosi.

²⁸ Uwo wakaba ngaaregere kuba; asi paugaro po izvo ngaashande, echishanda zvakanaka ngo nyara jake, kuti awane zvokupa kwaari unotama.

²⁹ Musatendera kuti kuvereketa kwakashata kubude mu miromo yenyu, asi ukwo kwakanaka kunovaka kudari ngo zvinosisira, kuti kupe nyasha kwavari vanokuzwa.

³⁰ Zve, musachamwisa Mweya Wakachena wa Mwari, womwakadihwa chinamiro ndiwo mbhera kuguma kuzuva ro kuripihwa.

³¹ Kushatihwa kwese, no ushungu, no kutseneka, no bope, no kutuka, no khururu rese, ngazvibviswe kwomuri.

³² Muitirane nyasha umwe kuno umweni, muve no mwoyo yakapfava, mwechiregererana umwe no umweni kudari ndi Mwarizve wakamuregerera ndiye Kristu.