Titosi 3 - NOVO TESTAMENTO EM NDAU

Fanero ro vatendi

¹ Vacherechejise kuti vapfavire kuvatongi no kune vano simba, kuti vapurutane, kuti vanasirihwe kuyita mishando yese yakanaka,

² kuti vasavereketa zvakashata ngo mundhu, kuti vasaita hasha, vayite vakapfava, vechipangijira kupfava ku vandhu vese.

³ Ngokuti isisuvo ngo pamberi tayiva no upenji, tisikapurutani, techichengejehwa, techishandira kuemura no zvidakajiso zvo nyama zvakaparajana, tine khururu, no ndurumwa, techinyenya, no kunyenyana.

⁴ Asi apo nyasha ja Mwari Muponesi wedu no rudo rwake ku vandhu zvavoneka,

⁵ haiwa ngo mishando yakarurama yotakaita isisu, asi kudari ngo uwandu hwo nyasha jake wakatiponesa, ngo kushambijwa kwo kubahwa kupsha, no kumusijihwa ndi Mweya Wakachena,

⁶ uwo wakadururihwa panyezuru pedu ngo kuwanjisa, ndiye Jesu Kristu Muponesi wedu.

⁷ Kuti isisu techipembejwa ngo nyasha jake, tiite vanogara ndhaka kudari ngo gonda ro kupona kusikaperi.

⁸ Iri izwi rinogondeka, ngo ndava yo izvi ndinoda kuti ugwinyisise kuzvinanga, kuti avo vakatenda Mwari vangwarire kuyita mishando yakanaka, izvi zviri zvakanaka zvinobesera ku vandhu.

⁹ Asi tiza mibvunjo yo upenji no kuverenguja kwo majibaba mukuru; no hasha, no kukanijana ngo ndava yo mipango; ngokuti izvo azvibetseri, azvina shwiro.

¹⁰ Mundhu unojijisa zvinopshapshana no gwinyiso, ngosure kwo kumupangira kamwe no kwo chipiri, murambe;

¹¹ wechiziva kuti wakadaro wakapauka, unoshaisha, unojirasha.

Mazwi okupejisira

¹² Apo ndootuma Atema, nokuti Tukiko kwouri, gwinya kuviya kwendiri Nikopori; ngokuti ndakajiemesera kugara apo nguva yo chipepo.

¹³ Ita zvese zvounokona kubesera Zenani gweta, na Aporo, muhwendo hwavo, kuti kusazovapo chinotamika kwavari.

¹⁴ No vandhu veduzve ngavajije kuyita mishando yakanaka kuti vavone zvinosisira, nokuti vasazoita vasina michero.

¹⁵ Vese vendinavo vanokutambisa. Tambisa avo vanotida mukugonda. Nyasha ngajive nemwi mwese.