Titosi 1 - NOVO TESTAMENTO EM NDAU

Muchungamijo

¹ Pauri, muranda wa Mwari, no mupostori wa Jesu Kristu, kudari ngo kugonda kwo vakatsananguhwa va Mwari, no kuziva gwinyiso riri ro uMwari,

² mugonda ro kupona kusikaperi, kwaakagondisa Mwari, uwo usikakoni kunyepa, nguva jisati jaavepo;

³ asi ngo nguva yake wakavonisa izwi rake mukuteketeswa, kwo ndakagondwa ndikwo kudari ngo mupango wa Mwari Muponesi wedu;

⁴ kuna Titosi, mwana wangu wo gwinyiso, ngo kugonda kwotinakwo tese: Nyasha, kukungurihwa no kunyarara ngazvive kwomuri zvinobva kuna Mwari Baba no kuna Kristu Jesu Muponesi wedu.

Mushando wa Titosi mu Krete

⁵ Ngo iyi ndava ndakakusiya Krete, kuti urongeje izvo zvakasara kuitwa, nokuti uemese vakuru ku madhoropa ese, kudari ngo zvondakakupanga;

⁶ kudari aripo mundhu usikashoreki, uno mukaji umwe, ano vana vanotenda, vasikaitihwi ndava yo kusikajibata, nokuti vasikapurutani.

⁷ Ngokuti kunosisira kuti muvonisi aite usikashoreki, kudari ngozvaari mutungamiriri wo nyumba ya Mwari; usina mutikizizi, usikakasiri kucheneka, usikadi vhini, usikarovi, usikadisisi pfuma ina svina;

⁸ asi unoashira vapfumba, unoiyana no vandhu vakanaka, wakangwara, wakarurama, wakacheneswa, unojibata;

⁹ echibatisisa izwi rinogondeka kudari ngo zvaakajijiswa, kuti awane simba rokuyita zvese kupanga zvijijiso zvo gwinyiso no kuvanyisa vanoyita hasha.

¹⁰ Ngokuti varipo vazhinji vasikapangwi, vanovereketa zvisina shwiro, vanochengeja, kakurutu avo vari vo kuchekwa,

¹¹ avo kunosisira kuti miromo yavo inyarajwe; vari vanarume vanoparaja aembho mbhuri yese, vechijijisa zvisikasisiri, ngo ndava yokuda pfuma ina svina.

¹² Umwe wavo wayiva muprofeti wo kwavo, wakati vaKrete vari vanyepi nguva jese, no zvikara zvakashata, vanokara vano nungo.

¹³ Chapupu ichi chino gwinyiso. Ngo iyi ndava varambije kakurutu kuti vagwinyisire mukugonda,

¹⁴ vasikapurutani kungano jo vajudha, no mipango yo vandhu vanofuratira gwinyiso.

¹⁵ Kune vakasukika zvese zvakasukika; asi kwavari vakasvipiswa vasikatendi apana chakasukika; asi vese mipinimijo yavo no mwoyo yavo, zvakasvipiswa.

¹⁶ Vanopupura kuti vanomuziva Mwari; asi ngo mishando yavo vanomuramba, vechiita vanonyangaja no vasikapurutani, no vasikadetseri chiro kumishando yese yakanaka.