Ruka 9 - NOVO TESTAMENTO EM NDAU

Jesu unotuma vapostori

¹ Naye wakadanija pamwepo vari gumi na vaviri, akavapa simba ro kukurira mabzoka ese, no kurapa ndhenda.

² Naye wakavatuma kuenda kwoochumaira Umambo hwa Mwari, no kurapa vanohwara.

³ Wakati kwavari: “Musatora chiro cho hwendo hwenyu, haiwa ndonga, nokuti nyede, nokuti chimanda, nokuti mare; zve, musava no mabhachi maviri.

⁴ Pikija ngoyani nyumba yo munozonghwina, garanyimwo, mbhera mubvepo.

⁵ Naavo vasikazomuashiri, mwoobva mu dhoropa iro, munozophumbuja bukuta pasi po tshoka jenyu kuitira chapupu kuvaitira ndava.”

⁶ Navo vakaenda, vakapupura mu maguta ese, vechichumaira vhangeri, no kurapa ku ndau jese.

Herodhi wakakakaseka ndi Jesu

⁷ Zvino apo Herodhi mutungamiriri naaziva zvese zvayinga zvaitika, wakakakaseka, ngokuti vamweni vainanga kuti Johani wayinga wamuka kubva kwo vakafa;

⁸ no vamweni vaiti kuti, Erija wakavoneka; no vamwenizve vaiti kuti, mumwe wo vaprofeti vokare wakamukazve.

⁹ Na Herodhi wakati: “Johani ndakamugura musoro, asi uwu ndiyani, uwo wondinozwa ndiye zviro zvakadari.” Naye wakapshaka kuti amuvone.

Jesu unopekeja zvokuha kuna mbungano

¹⁰ Vapetuka, vapostori vakamuverengera zvese izvo zvakaitika. Naye wakavatora, akajipaura kuenda vari vega ku dhoropa raizwi Bhetisaidha.

¹¹ Mbungano yaziva yakamutevera, naye wakavaashira ngo kudakara, wakavereketa kwavari ngo Umambo hwa Mwari naavo vaitama kurapwa wakavarapa.

¹² Naapo zuva rotanga kubira; no varigumi na vaviri vakaviya, vakati kwaari: “Wechiparaja mbungano kuti yiende mu maguta no mundharaunda inotendeneja, vavatemwo, no kuwana zvokuha, ngokuti pano tiri pa bani.”

¹³ Asi iye wakati kwavari: “Vapenyi imwimwi zvokuha.” Vakati: “Atina zvimweni kwega zvimanda zvishanu no hove mbiri; dangani kuti tiende tivatengere zvokuha ava vandhu vese.”

¹⁴ Ngokuti vayiva vanonga vari zviuru zvishanu (5.000) zvo vanarume. Naye wakati ku vajiji vake: “Vagarisenyi pasi ngo zvikwata, zvo makumi mashanu.”

¹⁵ Navo vakayita kudaro, vakavagarisa pasi vese.

¹⁶ Naye echitora zvimanda zvishanu, no hove mbiri, wakaringira mu gore, akazvibonga, akazvigura; wakazvipa ku vajiji kuti vazvidire pamberi po mbungano.

¹⁷ Navo vakaha, vakaguta vese; navo vakaunganija izvo zvakasara zvo matshekeneswa, zvitengu zviri gumi na zviviri.

Pedru unopupura kuti Jesu ndi Kristu wa Mwari

¹⁸ Kwakaitika kuti echikumbira ari ega, vajiji vake vayiva naye, naye wakavabvunjisa, kuti: “Mbungano inoti kuti inini ndiri yani?”

¹⁹ Navo vakapingura, vakati: “Johani Mubhapatisi, asi vamweni vanoti, Uri Erija; asi vamweni vanoti, Uri umwe wo vaprofeti vokare wamukazve.”

²⁰ Asi wakati kwavari: “Imwimwi munoti inini ndiri yani?” Na Pedru echipingura, wakati: “Iwewe uri Kristu wa Mwari.”

Jesu unovereketa ngo kufa no kumuka kwake

²¹ Asi wakavabvunja no kuvapanga kuti vasazobvunja mundhu naumwe izvi.

²² Echiti: “Kunodikana kuti Mwana wo Mundhu atambujike ngo zvakawanda, arambwe ngo vakuru, no vapristi vakuru, no vatari, aurawe, na ngo zuva ro chitatu amuswe.”

²³ Naye wakati kwavari vese: “Kudari uripo mundhu unoda kuviya sure kwangu, ngaajirambe, atore muchinjiko wake zuva ngo zuva anditevere.

²⁴ Ngokuti pikija ndiyani ungada kungwarira kurarama kwake, unozorashikihwa ndikwo; asi pikija ndiyani unorasha kurarama kwake ngo ndava yangu, ndiye unozokuponesa.

²⁵ Ngokuti unodetsehwa ngenyi mundhu kudari echizoviyihwa ngo nyika yese, ajirashe, nokuti ajinyaje kupona kwake.

²⁶ Ngokuti iye unozoyita nyowa ndini, na ngo mazwi angu, Mwana wo Mundhu unozoyita nyowa ndiye, apo oviya mu uthende hwake, no hwa Baba, no hwo ngirosi jakachena.

²⁷ Asi ndinomubvunja ngo gwinyiso, kuti varipo vakatikuti veavo vanoyima pano, avo vasikazoraviri kufa, mbhera vavone Umambo hwa Mwari.”

Kusandujwa kwa Jesu

²⁸ Nakwo kwakaitika, anonga mazuva masere ngosure kwo kuvereketa izvi, kuti wakatora naye Pedru, na Johani, na Jakobe, wakakwira pa dundhu kwookumbira.

²⁹ Echikumbira, kuvoneka kwo hope yake kwakasandujwa, no zvokusimira zvake zvakachena zvechin'anikira.

³⁰ Vonanyi kwakavereketa naye vandhu vaviri, ndi Mosi na Erija;

³¹ avo vakavoneka vari mu uthende, vakavereketa ngo ndava yo kuenda kwake mukufa, ukwo kwaaizoita mu Jerusarema.

³² Zvino Pedru naavo vayiva naye vayinga vabatwa ngo hope: Asi apo vamuka, vakavona uthende hwake, no vandhu vaviri avo vakayima naye.

³³ Kwakaitika, apo vaparajana naye, Pedru wakati kuna Jesu: “Mujijisi, kwakanaka kwetiri kuti tigare pano; ngativake zvitumba zvitatu; chimwe chako, chimweni cha Mosi, no chimweni cha Erija.” Asikazivi chaaivereketa.

³⁴ Kwakati echivereketa izvi, gore rakaviya, rikavafukijira; navo vakatya apo vakambonywa ngo gore.

³⁵ No izwi rakabuda rechibva mu gore, rechiti: “Uwu uri Mwana wangu, uwo wakasananguhwa; mupurukirenyi.”

³⁶ Naapo izwi rapinda Jesu wakaenda ari ega. Navo vakanyarara, avazivi kutongobvunja mundhu ngo mazuva ao chimwe cho izvo zvovakavona.

Jesu unorapa mundhu wayiva no mabzoka

³⁷ No cho mangwanani, apo vabzuka kubva ku dundhu, kwakaitika kuti mbungano huru yakasongana naye.

³⁸ Vonanyi, mundhu wakatikuti echibva mukati mwembungano wakadanijira echiti: “Mujijisi, ndinokupota kuti uringire mwana wangu, ngokuti ndiye ega wondinaye.

³⁹ Vonanyi, mweya unomubata; paripo ngo kukasira orija mbhere; nawo unomubvununguja kwokuti abudise mafuro, unotora nguva yakareba, unomukuvaja kakurutu.

⁴⁰ Neni ndapota vajiji vako kuti vaumbirimbije, navo vaukonehwa.”

⁴¹ Jesu wakapingura, akati: “A, mubarihwana usikatendi no unopauka, ndinozogara nemwi mukuvo wakaitawani, ndechindo musengerera? Zisai pano mwana wako.”

⁴² Kwakati achaviya bzoka rakamuwisa pasi, rikamubvununguja kakurutu. Asi Jesu wakauthusa mweya wakashasa, akamurapa murumbwana akamupazve kuna baba wake.

⁴³ Navo vese vakashamiswa ngo ukuru hwa Mwari. Kwakati vese vachashamiswa ngo izvo zvaakaita, wakati ku vajiji vake:

Jesu unovereketazve ngo kufa no kumuka kwake

⁴⁴ “Mazwi aya ngaagare munjeve jenyu; ngokuti Mwana wo Mundhu unozopihwa mu nyara jo vandhu.”

⁴⁵ Asi avazivi kuzwisisa izwi iro, rakafishika kwavari, kuti vasazoriziva; navo vakatya kumubvunjisa ngo iro izwi.

Ndiyani unozova mukuru

⁴⁶ Kwakamuka hasha pakati pavo kuti ndiyani wavo unozoyita mukuru.

⁴⁷ Asi apo Jesu wavona murangarijo yo mwoyo yavo, wakatora mwana mudoko, wakamugajika parutivi rwake.

⁴⁸ Wakati kwavari: “Iye unoashira mwana uwu mudoko ngo zina rangu unondiashira inini; no uwo unondiashira inini unoashira uwo wakandituma; ngokuti iye uri mudoko mukati mwenyu mwese, ndiye uri mukuru.”

Ndiyani usikaambani nesu unesu

⁴⁹ Na Johani wakapingura, akati: “Mujijisi, tamuvona umwe echimbirimbija mabzoka ngo zina rako; nesu takamurambisa, ngokuti aazivi kutevera nesu.”

⁵⁰ Asi Jesu wakati kwaari: “Musazomurambisa, ngokuti iye usikaambani nemwi, unomurwira imwimwi.”

Jesu aashihwi zvakanaka mu Samariya

⁵¹ Apo mazuva okwedera okuti aashihwe mu gore, wakaringira hope yake kuenda Jerusarema.

⁵² Naye wakatuma ndhumwa pamberi po hope yake, navo vanghwina mu guta ro vaSamariya, kuti vamunasirire.

⁵³ Asi avazivi kumuashira, ngokuti hope yake yairingira kuenda Jerusarema.

⁵⁴ Naapo vajiji vake Jakobe na Johani vavona ichi, vakati: “Mambo, unoda kuti tinange kuti muriro ubzuke kubva mu gore, uvapeje?”

⁵⁵ Asi wakakunukuka, akavarambisa.

⁵⁶ Navo vakaenda ku guta rimweni.

Mukoka wo kutevera Jesu

⁵⁷ Vachafamba mu njira, mundhu wakatikuti wakati kwaari: “Ndinozokutevera pikija kwapi kwounoenda.”

⁵⁸ Na Jesu wakati kwaari: “Muhwe jino marindi, no shiri jo mu gore jino zvisaki; asi Mwana wo Mundhu aana no po kutsamira musoro wake.”

⁵⁹ Naye wakati kuno umweni: “Nditevere iwewe.” Asi iye wakati: “Mambo, tenda kuti ndiende kutanga ndimbochira baba wangu.”

⁶⁰ Asi wakati kwaari: “Siya vakafa vachire vakafa vavo; asi enda iwewe uteketese Umambo hwa Mwari.”

⁶¹ No umwenizve wakati: “Ndinozokutevera Mambo, asi kutanga tenda kuti ndiende ndivaeneke vo nyumba yangu.”

⁶² Asi Jesu wakati kwaari: “Akuna mundhu, ungadira nyara yake kubata baja ro n'ombe, echiringira sure, ungasisira Umambo hwa Mwari.”