Ruka 8 - NOVO TESTAMENTO EM NDAU

Majimayi ayishandira Jesu

¹ Kwakaitika kuti, ngosure kwo izvo, wakafamba mukati mwo madhoropa, no maguta, echichumaira no kupangijira masoko akanaka oUmambo hwa Mwari, no vari gumi na vaviri vayiva naye,

² no vanakaji vakatikuti, avo vayinga vakaponeswa mweya yakashata, no ndhenda, Mariya uwo waizwi Magadhareni, uwo wakabviswa mabzoka manomwe.

³ Na Jowana mukaji wa Chuza mungwariri wa Herodhi, na Suzana, no vazhinji vamweni avo vayimushandira ngo zviro zvavo.

Muezaniso wo mukushi

⁴ Apo mbungano yaungana pamwepo no vandhu vayinga vakabuda kuviya kwaari, kubva ku madhoropa ese, iye wakavereketa ngo muezaniso, echiti:

⁵ “Mukushi wakabuda kookusha mbewu jake, naapo achakusha mbewu jimweni jakawira pa njira, najo jakachikwachikwa ngo tshoka, no shiri jo mu gore jakajiha.

⁶ No jimweni jakawira pa mapuwe, paripo jakamera jakazeketera, ngokuti inga jisina mwando.

⁷ Jimweni jakawira mukati mwo minzwa, no minzwa yakakura pamwepo najo, yakajipshinya.

⁸ Jimweni jakawira mu mavhu akanaka, jakakura, jakabereka mbhumba jiri zana rakapetwa.” Achavereketa izvi wakadanijira, echiti: “Uwo uno njeve jo kuzwa, ngaazwe.”

Ngo ndava yo muezaniso

⁹ No vajiji vake vakamubvunjisa, kuti: “Muezaniso uwo wayida kurevenyi?”

¹⁰ Wakati kwavari: “Kwakapuwa kwomuri kuziva zvakafishika zvo Umambo hwa Mwari, asi kuno vamweni, kuti vazwe ngo muezaniso, kuti pikija vechivona, avavonesesi, vechizwa avazwisisi.”

Jesu unodurujira muezaniso wo mukushi

¹¹ “Zvino muezaniso ndiwo uwu: Mbeu riri izwi ra Mwari.

¹² Naapo vari pambhiri po njira, ndivo avo vakazwa; unoviya dhiyabhorosi, no kubvisa izwi mu mwoyo yavo, kuti vasazotenda, no kuponeswa.

¹³ Naavo vari pa mapuwe, ndivo avo vambozwa izwi, vanoriashira ngo kudakara, navo avana muji, vanotenda mukuvo mudoko, na ngo nguva yo kuejwa vanokhugunywa.

¹⁴ No ijo jakawira pakati po minzwa, ndivo avo vanozwa, vachienda mberi vanopshinywa ngo kudembatemba, na ngo upfumi, na ngo zvidakajiso zvo ndaramo ino, vasikabereki michero kwayo.

¹⁵ No ijo jakawira mu mavhu akanaka, ndivo avo vanozwa izwi ngo mwoyo usina kuchengeja, no wakanaka vanoringwarira, vanobereka michero ngo kusengerera.”

Chivheneko cho kujekisa

¹⁶ “Akuna mundhu apo wabasa chivheneko wochidumaija ngo chimujiyo, nokuti kuchidira pasi po mubhedhi. Asi unochidhira panyezuru po chigajikiro cho chivheneko, kuti avo vanonghwina vavone kujeka.

¹⁷ Ngokudaro akuna chiro chakafishika chisikazovoniswi, no chakadumaijwa chisikazozivikanwi, chisikazoviyi mukujeka.

¹⁸ Ndizvo ngwaranyi ngo kuzwa kwo munoita, ngokuti pikija no uwo unacho, kunozonyengejehwa kwaari, asi iye usina kunozobviswa kwaari, no icho chaanorangarija kuti unacho.”

Ukama wa Jesu

¹⁹ Kwakaviya kwaari mayi wake, no vanukuna vake, navo avazivi kukwanisa kuguma kwaari, ngo ndava yo mbungano.

²⁰ Wakabvunjwa, kuti, mayi wako, no vanukuna vako vakayima ngo kunja, vanoda kukuvona.

²¹ Asi iye wakapingura kwavari, akati: “Mayi wangu no vanukuna vangu ndivo avo vanorizwa izwi ra Mwari, no kuriyita.”

Jesu unonyaraja bepo

²² Zvino kwakaitika ngo rimwe raao mazuva kuti wakanghwina mu ngarava no vajiji vake; naye wakati kwavari: “Ngatiambuke mwombera kwo gandhwa.” Ndizvo vakaenda.

²³ Asi vechienda iye wakabatwa ngo hope; kwakabzuka muvhumo wo bepo panyezuru po gandhwa; nayo yayinga yozara ngo kumwa, navo vayiva mungozi.

²⁴ Navo vakaviya kwaari, vakamumusa, vechiti: “Mujijisi, Mujijisi, tofa.” Naye wakamuka akanyaraja bepo no mavimbi okumwa; nao akatura, kwakavepo kunyarara.

²⁵ Naye wakati kwavari: “Kugonda kwenyu kuri kwapi?” Navo vakatya no kushamiswa, vechiti umwe kwo umweni: “Uwu ungaita yani, unopanga bepo no kumwa, nazvo zvinomupurukira.”

Kurapwa kwo mundhu wayiva no mabzoka

²⁶ Navo vakaguma ku nyika yo vaGerasene, iyo yakaita maringwa no Garire.

²⁷ Kwakati aambuka mu ngarava, wakasongana naye mundhu wakatikuti, echibva mu dhoropa, uno mabzoka; no mukuvo wakareba aazivi kusimira nguvo, naye inga asikagari mu nyumba, asi mu makuva.

²⁸ Naapo avona Jesu wakamima, akawa pasi pamberi pake, akati ngo izwi guru: “Ndinenyi newe, Jesu, iwewe Mwana wa Mwari Uri panyezuru po zvese. Ndinokupota, usanditambuja.”

²⁹ Ngokuti iye inga apanga mweya wakashata kuti ubude mumundhu. Ngokuti kazhinji waimubata; naye waingwarihwa ngo varindi, akasungwa ngo magaragajero, no matanda; asi waidajura zvisungo izvo, echikwehwa kuenda ku bani ngo mabzoka.

³⁰ Na Jesu wakamubvunjisa, akati: “Zina rako uriyani?” Naye wakati, “Ndiri Hondo.” Ngokuti mabzoka akawanda ayinga akanghwina mukati mwake.

³¹ Nao akamupota kuti asazoapanga kuti aende murindi.

³² Zvino kwayivapo mushambi wo nguruve jakawanda jechihava panyezuru po dundhu: Nao akamupota kuti aatendere kuti anghwine kwojiri. Naye wakaatendera.

³³ No mabzoka akabuda kubva kuno mundhu akanghwina munguruve, no mushambi uwo wakagogoma kubzuka ngo pa gomokomo kunghwina mu gandhwa, najo jakandondomera jikafa.

³⁴ Naavo vaijihusha vavona chakaitika vakatiza, vakateketesa zvakaitika mu dhoropa no mu ndharaunda.

³⁵ Navo vakabuda kuenda kwoovona zvakaitika; vakaviya kuna Jesu, vakamuvona mundhuwo waakabvisa mabzoka akagara, wakasimira, atimbunda, patshoka ja Jesu; navo vakatya.

³⁶ Naavo vakazvivona vakavabvunja ngo njira yaakaponeswa ndiyo uwo wayinga uno mabzoka.

³⁷ No vandhu vese vondharaunda yo nyika yo vaGerasene vakamukumbira kuti abve kwavari; ngokuti vese vakagumihwa ngokutya kukurutu. Naye wakanghwina mu ngarava akahwirira.

³⁸ Asi mundhu uwo wakabviswa mabzoka, wakamukumbira kuti aende naye; asi iye wakamuendesa echiti:

³⁹ “Hwirira ku nyumba yako, upupure ngo kukura kwo izvo zvaakakuitira Mwari.” Naye wakafamba echiteketesa mu dhoropa rese kukura kwo izvo zvaakaita Jesu kwaari.

Kumuswa kwo mwana wa Jairosi no kurapwa kwo mutenda

⁴⁰ Naapo Jesu waviyazve, mbungano yakamuashira ngo kudakara; ngokuti vese inga vakamugarira.

⁴¹ Vonanyi, kwakaviya, mundhu zina rake raizwi ndi Jairosi, naye wayiva mukuru wo nyumba yo kudira; naye wakawa patshoka ja Jesu, wakamupota kuti aviye ku nyumba yake;

⁴² ngokuti wayiva no mwana wo kaji umwe ega, wayinga ano makore anonga gumi no maviri, naye wayiva woda kufa. Asi echienda mbungano yakamutsikinija.

⁴³ No jimayi raibuda ngazi makore ari gumi no maviri, iro rayinga rapeja zvese zvoraipona ndizvo ngo man'anga, pasina waikona kurirapa.

⁴⁴ Iro rakaviya ngosure kwake, rakapshasa mupendero wo nguvo yake: Paripo ndhenda yo kubuda ngazi yakakhauka.

⁴⁵ Na Jesu wakati: “Ndiyani uwo wandipshasa?” Naapo vese vakanija, Pedru naavo vayiva navo, vakati: “Mujijisi mbungano inokutsikinija, no kukupshinya.”

⁴⁶ Asi Jesu wakati: “Uripo wandipshasa, ngokuti ndinozwa kuti simba rangu rabuda kwendiri.”

⁴⁷ Naapo jimayi ravona kuti arizivi kufishika, rakaviya richitetemera, rakawa pasi pamberi pake, rikapanga zvese pamberi po vandhu vese kuti ramupshasa ngo ndava yenyi, nokuti raponeswa chiriporipo.

⁴⁸ Iye wakati kweriri: “Mwana, kugonda kwako kwakuponesa; enda ngo kunyarara.”

⁴⁹ Achavereketa, kwakaviya umwe echibva ku nyumba yo mukuru wo nyumba yo kudira, echiti: “Mwana wako wo kaji watofa; usachamunesa Mujijisi.”

⁵⁰ Asi Jesu echizwa, wakapingura kwaari, echiti: “Usatya; kwega tenda, naye unozoponeswa.”

⁵¹ Kwakati aguma ku nyumba, aazivi kutendera kuti mundhu anghwine naye, kwega Pedru na Johani na Jakobe, na baba wo musikana, na mayi wake.

⁵² Navo vese vaimuchema vechimutsumba; asi wakati: “Musachema; ngokuti aazivi kufa, asi wakavata.”

⁵³ Navo vakamuseka kwokumusvororeja, vechivona kuti watofa.

⁵⁴ Asi iye naamubata ngo nyara wakadanijira, echiti: “Musikana muka.”

⁵⁵ No mweya wake wakaviyazve, naye wakamuka, chiriporipo. Iye wakapanga kuti apuwe chokuha.

⁵⁶ No vabari vake vakashamiswa, asi wakavapanga kuti vachazobvunja mundhu icho chayinga chaitwa.