Ruka 7 - NOVO TESTAMENTO EM NDAU

Kurapwa kwo muranda wo nduna yo zana

¹ Kwakati apeja mazwi ake ese mukuzwa kwo vandhu, wakanghwina mu Kaperanaume.

² No muranda wo nduna yo zana yakatikuti, waaidisisa, waihwara, ari phedo po kufa.

³ Kwakati yazwa ndi Jesu, yakatuma kwaari vakuru vo vajudha yechikumbira kuti aviye aponese muranda wayo.

⁴ Naavo apo vakaguma kuna Jesu, vakamupota kakurutu, vechiti: “Iyo inosisira kuti uyiitire ichi.

⁵ Ngokuti inoda jinja redu, nayo yakativakira nyumba yo kudira yedu.”

⁶ Na Jesu wakaenda navo, naapo waaphedo po nyumba, nduna yo zana yakatuma hama jayo kwaari, yechiti kwaari: “Mambo, usajinesa, ngokuti andisisiri kuti iwewe unghwine pasi po denga rangu.

⁷ Ndizvo andizivi kurangarija kuti ndinosisira ndambhwine kuviya kwouri, asi nangai ngo izwi, no muranda wangu unozoponeswa.

⁸ Ngokuti na ininivo ndiri mundhu wakaemeswa pasi po simba, ndine masocha pasi pangu: Neni ndinoti kuno iri, endayi, naro rinoenda; nokuno rimweni, viyai, naro rinoviya; no kuno muranda wangu, itai ichi, naye unochiyita.”

⁹ Naapo Jesu azwa ichi wakashamiswa ndiyo, naye wakakunukukira kuno mbungano yaimutevera, wakati kwoiri: “Ndinoti kwomuri, andizivi kutongombovona kugonda kukuru kwakadaro, pikija mu Israeri.”

¹⁰ Naavo vakatumwa, vakahwirira ku nyumba, vakavona muranda wapona.

Kumuswa kwo mwana wo shirikaji

¹¹ Kwakaitika ngosure kwo izvo, wakaenda ku dhoropa rinozwi Naeni; no vajiji vake vakaenda naye, no mbungano huru.

¹² Kwakaitika apo echikwedera pamusuvo wo dhoropa, vonanyi kwaibudiswa mundhu wakafa kubva mu dhoropa, uwo wayiva ari mwana umwe ega wa mayi wake, vayiva shirikaji; no vandhu vazhinji vo dhoropa vayiva naye.

¹³ Naapo Mambo naamuvona, wakamuzwira kutambujika, wakati kwaari: “Usachema.”

¹⁴ Naye wakakwedera, akapshasa mandhi; no vatwari vakayima, wakati: “Jaha, ndinoti kwouri, mukayi.”

¹⁵ No uwo wayinga wafa, wakamuka akagara, wakatanga kuvereketa, naye wakamupa kuna mayi wake.

¹⁶ No kutya kwakavagumira vese, navo vakairikija Mwari, vechiti: “Muprofeti mukuru watumbujuka pakati pedu. Zve, kuti Mwari wakafambira vandhu vake.”

¹⁷ No mbiri iyi yakateketeswa ngo ndava yake, mu Judhiya mwese, no mu nyika jese jaitendeneja.

Mupinguro wa Jesu kuna vajiji va Johani Mubhapatisi

¹⁸ Na Johani wakaziviswa izvi zvese ngo vajiji vake.

¹⁹ Na Johani echidanija kwaari vajiji vake vaviri, wakavatuma kuna Mambo, echiti: “Ndiwe here uwo unoviya, nokuti ticharindira umweni?”

²⁰ Naapo vanarume avo vaguma kwaari, vakati: “Johani Mubhapatisi wakatituma kwouri, echiti: Ndiwe here unoviya, nokuti ticharindira umweni?”

²¹ Ngo nguva iyo wakarapa vazhinji vaihwara, no ndhenda, no mweya yakashata; no vazhinji vayiva vari mapofu, wakavapembenuja.

²² Iye wakapingura, wakati kwavari: “Endanyi, mubvunje Johani zvomwavona, no zvomwazwa; mapofu anopembenujwa, zvirema zvinofamba, vano mapere vanosambiswa, vano mandondo vozwa, no vakafa vanomuswa, no varombo vano masoko akanaka anochumaihwa kwavari.

²³ Naye unomuchena usikakhugunywi ndini.”

Jesu unovereketa ngo ndava ya Johani Mubhapatisi

²⁴ Apo ndhumwa ja Johani jainga jaenda, wakatanga kuvereketa kuno mbungano ndiye Johani, echiti: “Mwakabuda kuenda ku bani kwoovonenyi? Runjanga rwakazungunyiswa ngo bepo here?

²⁵ Asi mwakabuda kuenda kwoovonenyi? Mundhu wakasimira machira akapfava here? Vonanyi avo vanosimira zvipani, vakagarisika, vanogara mu ngome.

²⁶ Asi mwakabuda kuenda kwoovonenyi? Muprofeti here? Eya, ndinoti kwomuri, no uwo unonyanya kupinda muprofeti.

²⁷ Uwu ndiye wo kwakatahwa ndiye, kwechiti: Vonanyi, ndinozotuma ndhumwa yangu pamberi po hope yako, iyo ndiyo inozonasirira njira yako pamberi pako.

²⁸ Ndinoti kwomuri, mukati mwaavo vakaberekwa ngo vanakaji, akuna mukuru kupinda Johani. Asi iye uri mudoko mu Umambo hwa Mwari uri mukuru kupinda iye.”

²⁹ Vandhu vese apo vazwa, no vashabisi navo vakatenda kururama kwa Mwari, ngo kubhapatiswa ngo rubhapatiso rwa Johani.

³⁰ Asi vafarisi no magweta vakajirambira zano ra Mwari, vakaramba kubhapatiswa ndiye.

³¹ “Ndizvo ndovaezanisa nenyi vandhu vo mubarihwana uwu, vanotojaniswa nenyi?

³² Vanotojaniswa no vana vanogara pandau yo musika, vechidanijana, vechiti: Takarija munyere kwomuri, nemwi amuzivi kutamba; takarija mbhere, nemwi amuzivi kuchema.

³³ Ngokuti Johani Mubhapatisi wakaviya asikahi chimanda, nokuti kumwa vhini, nemwi munoti. Uno bzoka.

³⁴ Mwana wo Mundhu wakaviya echiha, no kumwa; nemwi munoti, vonanyi mundhu uno makoro no mumwisi wo vhini, shamwari yo vashabisi, no yo vashaishi!

³⁵ No kungwara kunopembejwa ngo vana vakwo vese.”

Jesu mu nyumba yo mufarisi

³⁶ Umwe wo vafarisi wakada kuti ahe naye. Naye wakanghwina mu nyumba yo uwo mufarisi, akacheama pano kuha.

³⁷ Vonanyi, mujimayi wakatikuti, wayiva mu dhoropa, ari mushaishi; naapo aziva kuti waigara pano kuha mu nyumba yo mufarisi, wakaviyisa chitandha cho aribhastera ro mafuta okunuhira,

³⁸ naye echiyima ngosure kwo kutshoka jake, echichema, wakatanga kunyakatisa tshoka jake ngo musoji yake, akajipukuta ngo bvuji ro musoro mwake, akachungamija tshoka jake ngo muromo akajizoja ngo mafuta okunuhira.

³⁹ Asi mufarisi uwo wakamukoka, echivona, wakati mukati mwake: “Uwu mundhu kudari wayiva muprofeti inga aziva kuti uriyani, nokuti mujimayi uwu wakadini unomupshasa, ngokuti iye uri mushaishi.”

⁴⁰ Na Jesu echipingura, wakati kwaari: “Simoni, ndinacho chokuvereketa newe.” Naye wakati: “Mujijisi chiverekete.”

⁴¹ “Kwayivapo mushongesi wakatikuti wakashongesa vandhu vaviri: Umwe wavo wakamushongesa madhenariyo ari mazana mashanu (500), no umweni madhenariyo ari mashanu.

⁴² Kwakati vasina chokuripa ndicho, iye wakavaregerera vese. Ndizvo ndiyani kwavari unozopindisisa kumuda?”

⁴³ Simoni wakapingura, akati: “Dangani uwo wakaregerehwa zvakapinda kuwanda.” Wakati kwaari: “Wanasa kutonga.”

⁴⁴ Echikunukukira kuno mujimayi wakati kuna Simoni: “Unomuvona here uwu mujimayi? Inini ndanghwina mu nyumba yako, auzivi kundipa kumwa yo kusuka tshoka jangu; asi iye wanyakatisa tshoka jangu ngo musoji yake, akajipukuta ngo bvuji rake.

⁴⁵ Iwewe auzivi kundichungamija ngo muromo, asi iye kubvira mukuvo wondanghwina ndiwo, aazivi kurega kuchungamija tshoka jangu ngo muromo.

⁴⁶ Iwewe auzivi kuzoja musoro wangu ngo mafuta, asi iye wazoja tshoka jangu ngo mafuta okunuhira.

⁴⁷ Ndizvo ndinoti kwouri, zvishaishi zvake zviri zvakawanda zvaregerehwa kwaari; ngokuti iye wada kakurutu; asi kwaari waregerehwa zvishomani, iye unondodavo zvishomani.”

⁴⁸ Naye wakati kwaari: “Zvishaishi zvako zvaregerehwa kwouri.”

⁴⁹ Navo vaitseama naye panokuha vakatanga kuvereketa mukati mwavo: “Ndiyani uwu unokona kuregerera zvishaishi?”

⁵⁰ Naye wakati kuno mujimayi: “Kugonda kwako kwakuponesa, Enda ngo kunyarara.”